ഒരമ്മച്ചിയുടെ ശരീരം ആരോ വലിച്ചെറിഞ്ഞതുപോലെ ദേഹത്ത്, പിന്നെ ചില്ലുപൊട്ടി പുറത്തേക്ക് ; അവിനാശി അപകടത്തിന്റെ ആഘാതത്തില്‍ നിന്നും ഇനിയും മുക്തയായിട്ടില്ലെങ്കിലും തലനാരിഴയ്ക്ക് രക്ഷപ്പെട്ടതിന്റെ ആശ്വാസത്തിൽ കോലഞ്ചേരി തിരുവാണിയൂര്‍ സ്വദേശി ആന്‍മേരി
അവിനാശി അപകടത്തിന്റെ ആഘാതത്തില്‍ നിന്നും ഇനിയും മുക്തയായിട്ടില്ലെങ്കിലും തലനാരിഴയ്ക്ക് രക്ഷപ്പെട്ടതിന്റെ ആശ്വാസത്തിലാണ് കോലഞ്ചേരി തിരുവാണിയൂര്‍ സ്വദേശി ആന്‍മേരി. അപകടത്തിന്റെ നടുക്കം വിട്ടുമാറാതെ ആന്‍മേരിക്ക് മണിക്കൂറുകള്‍ ശ്വാസംമുട്ടി, ശബ്ദമറ്റു പോയി. ദൈവകൃപയും ഭാഗ്യവുമാണ് തനിക്ക് ജീവന്‍ തിരികെ നല്‍കിയതെന്ന് അവിനാശിയില്‍ അപകടത്തില്‍പെട്ട കെഎസ്ആര്‍ടിസി ബസ്സിലെ യാത്രക്കാരിയായ ഈ വിദ്യാര്‍ഥിനി പറയുന്നു.
അപകടമുണ്ടായ ബസിലെ 48 പേരില്‍ ഒരാള്‍. അപകടത്തിനുശേഷം ദുരന്തമുഖത്തുനിന്ന് കോലഞ്ചേരിവരെ മറ്റൊരു ബസിലാണ് ആന്‍ മടങ്ങിയത്. ശബ്ദിക്കാന്‍പോലുമാകാത്തവിധം അപകടം അവളെ ഉലച്ചു.
'ഒരമ്മച്ചിയുടെ ശരീരം ആരോ വലിച്ചെറിഞ്ഞതുപോലെയാണ് ദേഹത്തുവന്നുവീണത്. ഇടിയുടെ ആഘാതത്തില്‍ തെറിച്ചുവന്ന ആ ശരീരം പിന്നീട്‌ ബസിന്റെ ജനല്‍ച്ചില്ലു തകര്‍ത്ത്‌ പുറത്തേക്കുതെറിച്ചു- നടുക്കംമാറാതെ ആന്‍ പറഞ്ഞു. രക്ഷാപ്രവര്‍ത്തകരായെത്തിയവര്‍ ആദ്യം എന്നെ കണ്ടില്ല. തകര്‍ന്ന്‌ ചില്ലുമുഴുവന്‍ പൊട്ടിച്ചു നീക്കിയശേഷമാണ്‌ അതിനിടയിലൂടെ എന്നെ അവര്‍ പുറത്തെടുത്തത്‌. പിന്നാലെയെത്തിയ പത്തനംതിട്ടയിലേക്കു പോകുന്ന കെ.എസ്.ആര്‍.ടി.സി. ബസിലെ ജീവനക്കാരും യാത്രക്കാരും എന്നെ അടുത്തുള്ള ആശുപത്രിയിലാക്കാമെന്നു പറഞ്ഞു. അതോടെ കൂടെക്കയറി. അപ്പോള്‍ ചെറിയ തോതില്‍ വിറയലോടെ സംസാരിക്കാന്‍ കഴിയുമായിരുന്നുവെങ്കിലും പിന്നീട്‌ ശ്വാസം മുട്ടിത്തുടങ്ങി. ആസമയത്ത്‌ എത്രയുംവേഗം വീട്ടിലെത്തണമെന്നും വീട്ടുകാരെക്കാണണമെന്നും തോന്നി.ഇതോടെ അടുത്ത ആശുപത്രിയിലിറങ്ങാതെ കുറച്ചുകൂടി പോകട്ടെ, അടുത്ത ആശുപത്രിയിലിറങ്ങാമെന്നു പറഞ്ഞ്‌ മുന്നോട്ടുപോന്നു. ഇതിനിടെ വീട്ടിലേക്ക്‌ എന്റെ അടുത്തിരുന്ന ആന്റി വിളിച്ചു. ഞാന്‍ സഞ്ചരിച്ച ബസിന്‌ അപകടമുണ്ടായതായും മറ്റൊരു ബസില്‍ വന്നുകൊണ്ടിരിക്കുകയാണെന്നും അവര്‍ പറഞ്ഞു. പിന്നീട്‌ ശ്വാസതടസ്സംമൂലം സംസാരിക്കാനാകാതെ വന്നതോടെ യാത്രക്കാരാണ്‌ വീട്ടുകാരുമായി സംസാരിച്ചത്‌. ബന്ധുക്കള്‍ ഉള്ളതിനാല്‍ പെരുമ്ബാവൂരിലിറങ്ങി- ആന്‍ പറഞ്ഞു. തോളിനുപിന്നില്‍ ചെറിയ പൊട്ടലുണ്ടന്നതല്ലാതെ ഗുരുതരമായ പരിക്കുകളൊന്നുമില്ല. മറ്റുള്ള യാത്രക്കാര്‍ ദേഹത്തുവീണതുമൂലമുള്ള ചതവു മാത്രമാണുള്ളതെന്നും ഡോക്ടര്‍മാര്‍ പറഞ്ഞു. ബെംഗളൂരുവിലെ തുമകൂരുവില്‍ ബി.ഡി.എസ്. വിദ്യാര്‍ഥിനിയാണ് ആന്‍. ഹൗസ്‌ സര്‍ജന്‍സിക്കിടെ കിട്ടിയ അവധിക്ക്‌ നാട്ടിലേക്ക്‌ പോരുംവഴിയാണ്‌ അപകടം. ആദ്യംകിട്ടിയത്‌ ഡ്രൈവറിനു തൊട്ടുപുറകിലെ സീറ്റായിരുന്നു. ബസ് കുറച്ചുദൂരം പോന്നശേഷം കണ്ടക്ടര്‍ നിര്‍ദേശിച്ചതനുസരിച്ചാണ്‌ ഇടതുവശത്തേക്ക്‌ മാറിയിരുന്നതെന്ന് ബന്ധുക്കള്‍ പറഞ്ഞു. ആ സീറ്റിലിരുന്നയാള്‍ അപകടത്തില്‍ മരിച്ചു.
പുലര്‍ച്ചെ കോയമ്പത്തൂരിന് സമീപം അപകടത്തില്‍ പെട്ട ബസിന്റെ വലതുഭാഗത്താണ് കണ്ടെയ്‌നര്‍ ലോറി ഇടിച്ചുകയറിയത്. ആന്‍മേരി ആദ്യം യാത്രചെയ്തിരുന്ന സീറ്റിലിരുന്ന യാത്രക്കാരനും കണ്ടക്ടറും ഡ്രൈവറും ഉള്‍പ്പെടെ 19 പേര് അപകടത്തില്‍ കൊല്ലപ്പെട്ടു. വാഹനാപകടത്തില്‍ പതിനെട്ട് മലയാളികളടക്കം 19പേരാണ് കൊല്ലപ്പെട്ടത്. 25 പേര്‍ക്ക് പരിക്കേറ്റു. ഇതില്‍ രണ്ട് പേരുടെ നില ഗുരുതരമാണ്. ബെംഗളൂരുവിൽ നിന്നു കേരളത്തിലേക്കു യാത്ര ചെയ്യുന്നവരുടെ പ്രിയപ്പെട്ട ബസാണ് ഗരുഡ കിങ് ക്ലാസ് എന്ന എസി ബസ്. കോയമ്പത്തൂർ-സേലം ദേശീയപാതയിൽ അവിനാശി മേൽപ്പാലത്തിനു സമീപം കെ.എസ്.ആർ.ടി.സി ഗരുഡ കിംഗ് ക്ലാസ് ബസിൽ നിയന്ത്രണം വിട്ട കണ്ടെയ്‌നർ ലോറി ഇടിച്ചുകയറി 19 പേർ മരിച്ച സംഭവത്തിൽ ഡ്രൈവർക്കെതിരെ കേസെടുത്തു. പാലക്കാട് സ്വദേശി ഹേമരാജിനെതിരെ മന:പൂർവമല്ലാത്ത നരഹത്യയ്ക്കാണ് പൊലീസ് കേസെടുത്തിരിക്കുന്നത്. അശ്രദ്ധമായി വാഹനം ഓടിച്ചതിനാണ് കേസെടുത്തിരിക്കുന്നത്. ഹേമരാജിന്റെ ലൈസന്‍സ് റദ്ദാക്കും. സംഭവ സ്ഥലത്ത് നിന്ന് ഓടി രക്ഷപ്പെട്ട ഇയാൾ എട്ട് മണിക്കൂറിന് ശേഷം പൊലീസിൽ കീഴടങ്ങിയിരുന്നു.
https://www.facebook.com/Malayalivartha
