ഏറെ സ്വപ്നങ്ങളോടെയും പ്രതീക്ഷകളോടെയും കാത്തിരുന്ന കുടുംബ ജീവിതം ആരംഭിച്ച് തുടങ്ങിയപ്പോൾ തന്നെ ജീവിത പങ്കാളിയെ പിരിയേണ്ടി വന്നു.വെറും ഒരു മാസത്തെ വിവാഹജീവിതം അപഹരിച്ചത് നാടിനെ നടുക്കിയ വലിയൊരപകടം. കോയമ്പത്തൂർ-സേലം ദേശീയപാതയിൽ അവിനാശി മേൽപ്പാലത്തിനു സമീപം കെ.എസ്.ആർ.ടി.സി ഗരുഡ കിംഗ് ക്ലാസ് ബസിൽ നിയന്ത്രണം വിട്ട കണ്ടെയ്‌നർ ലോറി ഇടിച്ചുകയറിയുണ്ടായ ദുരന്തത്തിൽ മരിച്ച അഞ്ച് സ്ത്രീകളുൾപ്പെടെ 19 പേരും മലയാളികളിൽ ഒരാൾ അനുവായിരുന്നു.

മധുവിധു കഴിയും മുന്നേ പ്രിയതമൻ സ്നിജോയെ തനിച്ചാക്കി അനു ഈ ലോകത്തോട് വിട പറയുകയായിരുന്നു . കൃത്യം ഒരു മാസം മുമ്പാണ് അനു സ്‌നിജോയുടെ ജീവിത സഖിയാകുന്നത് ബംഗളൂരുവിൽ ജോലി നോക്കുന്ന അനു ഞായറാഴ്ച ഭർത്താവിനെ ഗൾഫിലേക്ക് യാത്രയാക്കാൻ പോകും വഴിയാണ് മരണം കൂട്ടിക്കൊണ്ടുപോയത്. എരുമപ്പെട്ടി വാഴപ്പിള്ളി ജോസ്‌-ലിസി ദമ്പതികളുടെ മകനായ സ്‌നിജോ എയ്യാൽ കൊള്ളന്നൂർ വർഗീസ് - മർഗലി ദമ്പതികളുടെ മകളായ അനുവിന് മിന്ന് ചാർത്തിയത് ജനുവരി 19ന് ആണ് .ബംഗളൂരുവിലെ ഒപ്റ്റം മെഡിക്കൽ സെന്ററിൽ ഹാർട്ട് സർജറി വിഭാഗത്തിൽ ടെക്നീഷ്യനാണ് അനു. ഖത്തറിൽ ജോലിനോക്കുന്ന സ്‌നിജോ ലീവ് കഴിഞ്ഞ് ഞായറാഴ്ച മടങ്ങിപ്പോകാനിരിക്കെയായിരുന്നു. വിവാഹത്തിന് ശേഷം ലീവ് കിട്ടാത്തതിനാൽ അനു വിവാഹത്തിന്റെ മൂന്നാം നാൾ ബാംഗളൂരുവിലേക്ക് മടങ്ങി പോയി. ഫെബ്രുവരി രണ്ടിന് എരുമപ്പെട്ടി തിരുഹൃദയ പള്ളി പെരുന്നാളിന് തിരിച്ചെത്തി. ആഘോഷത്തിലും കുടുംബ സത്കാരങ്ങളിലും പങ്കെടുത്ത നവദമ്പതികൾ നാലിന് മധുവിധു ആഘോഷിക്കുന്നതിനായി ദില്ലിയിലേക്ക് പോയി. നാല് ദിവസത്തിന് ശേഷം ഇരുവരും ബംഗളൂരുവിലേക്ക് മടങ്ങുകയും ചെയ്തു . 9ന് ജോലിയിൽ പ്രവേശിച്ച അനുവിനൊപ്പം ഒരാഴ്ച ബംഗളൂരുവിൽ സ്നിജോയും ഉണ്ടായിരുന്നു. 17ന് നാട്ടിലേക്ക് മടങ്ങിയ സ്നിജോയ്ക്കൊപ്പം അനുവിന് തിരിക്കാനായില്ല. കമ്പനി അവധി അനുവദിച്ചത് വ്യാഴാഴ്ചയായിരുന്നു. ബുധനാഴ്ചത്തെ ഡ്യൂട്ടിയും കഴിഞ്ഞതിനുശേഷമാണ് രാത്രി ഒമ്പതോടെ അനു ബസിൽ കയറിയത്.

ഭാര്യയെ കൊണ്ടുവരാൻ സ്‌നിജോ കാറുമായി ഇന്നലെ പുലർച്ചെ 3.30 ന് തന്നെ തൃശൂർ കെ.എസ്.ആർ.ടി.സി സ്റ്റാൻഡിൽ കാത്തുനിന്നിരുന്നു . വരേണ്ട സമയം കഴിഞ്ഞിട്ടും ബസ് എത്താത്തതിനാൽ ഫോണിൽ വിളിച്ചപ്പോൾ എടുത്തില്ല. മണിക്കൂറുകൾക്ക് ശേഷമാണ് ദുരന്ത വിവരം പൊലീസ് അറിയിക്കുന്നത്. അനുവിന് പരിക്കേറ്റിട്ടേയുള്ളുവെന്നും പെട്ടെന്ന് വരണമെന്നുമാണ് പോലീസ് അറിയിച്ചത്. ബന്ധുക്കളോടൊപ്പം സ്‌നിജോ അപകടം നടന്ന തിരുപ്പൂർ അവിനാശിയിലേക്ക് യാത്ര തിരിച്ചു. എന്നാൽ തിരുപ്പൂരിലെ ആശുപത്രിയിൽ എത്തിയ സ്‌നിജോ കണ്ടത് പ്രിയതമയുടെ ചേതനയറ്റ ശരീരമായിരുന്നു . പ്രിയതമയുടെ മൃതശരീരവുമായി സ്‌നിജോ വീട്ടിലെത്തിയ രംഗം കണ്ടു നിൽക്കാനാവാതെ ബന്ധുക്കളും നാട്ടുകാരും പൊട്ടിക്കരഞ്ഞു.ഹൃദയം നുറുങ്ങും കാഴ്ചകളാണ് പിന്നീട് അവിടെ നടന്നത് .അനുവിനെ ഖത്തറിലേക്ക് കൊണ്ടു പോകാനുള്ള തയ്യാറെടുപ്പിലായിരുന്നു സ്നിജോ. പക്ഷേ, വിധിയുടെ തീരുമാനം മറ്റൊന്നായിരുന്നു.

കോയമ്പത്തൂർ-സേലം ദേശീയപാതയിൽ അവിനാശി മേൽപ്പാലത്തിനു സമീപം കെ.എസ്.ആർ.ടി.സി ഗരുഡ കിംഗ് ക്ലാസ് ബസിൽ നിയന്ത്രണം വിട്ട കണ്ടെയ്‌നർ ലോറി ഇടിച്ചുകയറിയുണ്ടായ ദുരന്തത്തിൽ അഞ്ച് സ്ത്രീകളുൾപ്പെടെ 19 പേരും മലയാളികൾ ആണ് മരണമടഞ്ഞത്. ബസ് ഡ്രൈവറും കണ്ടക്ടറും മരിച്ചവരിൽ ഉൾപ്പെടുന്നു. കേരളത്തിലെ പൊതുഗതാഗത ബസ് സർവീസിന്റെ ജന്മദിനമായ ഇന്നലെ പുലർച്ചെ 3.25നാണ് അപകടം നടന്നത് . ബംഗളൂരുവിൽ നിന്ന് എറണാകുളത്തേക്കു വന്ന ബസിന്റെ മുൻഭാഗത്തേക്ക്, എതിർഭാഗത്തുന്നിന്ന് വൺവേ തെറ്റിച്ച്, ഡിവൈഡറിൽ തട്ടി തിരിച്ചുവന്ന ലോറി പതിക്കുകയായിരുന്നു. ലോറി ഡ്രൈവർ പാലക്കാട് സ്വദേശി ഹേമരാജ് പൊലീസ് സ്‌റ്റേഷനിൽ കീഴടങ്ങി. കൊച്ചി വല്ലാർപാടം ടെർമിനലിൽ നിന്നു ടൈൽ നിറച്ചു പോയതാണ് ലോറി.