മണ്ണഞ്ചേരി മനയ്ക്കല്‍ ദേവീക്ഷേത്രത്തില്‍ സ്ഥിരവാസി ആയിരുന്ന അപ്പുവെന്ന ആണ്‍ മയില്‍ വാഹനമിടിച്ചു പരുക്കേറ്റു ചത്തു. മണ്ണഞ്ചേരിക്കാരുടെ അരുമയായിരുന്ന അപ്പു ക്ഷേത്രങ്ങളിലും പള്ളികളിലും മസ്ജിദുകളിലും കയറിയിറങ്ങുകയും സ്‌കൂള്‍ ഗ്രൗണ്ടില്‍ കുട്ടികള്‍ക്കൊപ്പം പീലി വിടര്‍ത്തി കളിക്കുകയും ചെയ്യുമായിരുന്നുവെന്നു നാട്ടുകാര്‍ ഓര്‍ക്കുന്നു.

സമീപത്തെ കോഴി ഫാമിലെ ഇന്‍കുബേറ്ററില്‍ ആറ് വര്‍ഷം മുമ്പു മുട്ട വിരിയിച്ചെടുത്തപ്പോഴാണ് അപ്പുവിനെ കൂട്ടത്തില്‍ കിട്ടിയത്. വ്യത്യസ്തമായ ഇനത്തെ ശ്രദ്ധയില്‍പ്പെട്ട നാട്ടുകാര്‍ ഇതിനെ ധാന്യങ്ങളും മറ്റും നല്‍കി പരിപാലിക്കുകയായിരുന്നു. ആളുകളുമായി അടുപ്പം പുലര്‍ത്തിരുന്ന മയില്‍ ക്ഷേത്രത്തിനു മുന്നിലെ ആല്‍മരച്ചുവട്ടിലെ കൊടിമരത്തിലാണ് പതിവായി വിശ്രമിക്കാറുണ്ടായിരുന്നത്.

ക്ഷേത്രത്തില്‍ നിന്നുള്ള നിവേദ്യവും മറ്റ് ധാന്യങ്ങളുമാണു പ്രധാന ഭക്ഷണം. മണ്ണഞ്ചേരി ഹൈസ്‌കൂള്‍ ഗ്രൗണ്ടില്‍ കുട്ടികള്‍ക്കിടയിലും കളിക്കാന്‍ എത്തിയിരുന്നു. റോഡരികില്‍ പീലി വിടര്‍ത്തിയാടുന്നതും പതിവു കാഴ്ചയായിരുന്നു.

തിങ്കള്‍ രാത്രി ക്ഷേത്രത്തിന് സമീപത്താണു മയിലിനെ അവശനിലയില്‍ കണ്ടെത്തിയത്. നാട്ടുകാര്‍ അറിയിച്ചതിനെ തുടര്‍ന്നു വനം വകുപ്പ് ഉദ്യോഗസ്ഥരെത്തി ഏറ്റെടുത്തു.