കോട്ടയം പായിപ്പാട് അതിഥി തൊഴിലാളികളുടെ പ്രതിഷേധവുമായി ബന്ധപ്പട്ട് ഒരാള്‍ അറസ്റ്റില്‍... ലോക് ഡൗണ്‍ ലംഘിച്ച് ആളുകളെ കൂട്ടം കൂടാന്‍ പ്രേരിപ്പിച്ചതിന് പിന്നില്‍ ഗൂഢാലോചന സംശയിക്കുന്ന സാഹചര്യത്തില്‍ ഇയാളെ വിശദമായി ചോദ്യം ചെയ്യും
കോട്ടയം പായിപ്പാട് അതിഥി തൊഴിലാളികളുടെ പ്രതിഷേധവുമായി ബന്ധപ്പട്ട് ഒരാള്‍ അറസ്റ്റില്‍ . പശ്ചിമ ബംഗാള്‍ നാദേശി മുഹമ്മദ് റിഞ്ചുവാണ് അറസ്റ്റിലായത്. ഇയാളാണ് ഫോണിലൂടെ അതിഥി തൊഴിലാളികളെ സഘടിക്കാന്‍ പ്രേരിപ്പിച്ചതെന്നാണ് പൊലീസിന്റെ കണ്ടെത്തല്‍. ലോക് ഡൗണ്‍ ലംഘിച്ച് ആളുകളെ കൂട്ടം കൂടാന്‍ പ്രേരിപ്പിച്ചതിന് പിന്നില്‍ ഗൂഢാലോചന സംശയിക്കുന്ന സാഹചര്യത്തില്‍ ഇയാളെ വിശദമായി ചോദ്യം ചെയ്യും. ഇന്നലെ രാത്രി തന്നെ തൊഴിലാളികള്‍ താമസിക്കുന്ന ക്യാംപുകളില്‍ പൊലീസ് തെരച്ചില്‍ നടത്തി. നിരവധി പേരെ ചോദ്യം ചെയ്തു. എറണാകുളം റേഞ്ച് ഐജി മഹേഷ്‌കുമാര്‍ കാളിരാജിന്റെ നേതൃത്വത്തിലാണ് അന്വേഷണം.
ലോക്ക് ഡൗണ്‍ ലംഘിച്ച് ആയിരത്തിലധികം വരുന്ന അതിഥി തൊഴിലാളികളാണ് ഇന്നലെ കോട്ടയം പായിപ്പാട്ടെ തെരുവിലിറങ്ങി പ്രതിഷേധിച്ചത്. ലോക് ഡൗണ്‍ നിലനില്‍ക്കുന്നതിനിടെ നാട്ടിലേക്ക് പോകാന്‍ വാഹനം ഏര്‍പ്പെടുത്തണം എന്നാവശ്യപ്പെട്ടായിരുന്നു പ്രതിഷേധം. രാവിലെ പതിനൊന്ന് മണിയോടെ പായിപ്പാട് കവലയിലേക്ക് ആയിരത്തോളം വരുന്ന അതിഥി തൊഴിലാളികള്‍ സംഘടിച്ചെത്തുകയായിരുന്നു.കൂട്ടത്തോടെയെത്തിയ തൊഴിലാളികള്‍ റോഡില്‍ കുത്തിയിരുന്നു. ആദ്യ മണിക്കൂറില്‍ പൊലീസ് കുറവായിരുന്നതിനാല്‍ തൊഴിലാളികളെ നിയന്ത്രിക്കാനായില്ല. പിന്നീട് പത്തനംതിട്ട, കോട്ടയം ജില്ലകളില്‍ നിന്ന് കൂടുതല്‍ പൊലിസെത്തി. അരമണിക്കൂറോളം നീണ്ട ചര്‍ച്ചയ്ക്കൊടുവില്‍ രണ്ട് മണിയോടെ അതിഥി തൊഴിലാളികള്‍ ക്യാമ്പുകളിലേക്ക് മടങ്ങുകയായിരുന്നു.
പായിപ്പാട് ഇതരസംസ്ഥാനതൊഴിലാളികളുടെ പ്രതിഷേധം ആസൂത്രിതമെന്നു മുഖ്യമന്ത്രി പിണറായി വിജയന്‍. ഗൂഢാലോചന നടത്തിയവരെ പുറത്തുകൊണ്ടുവരും. പ്രതിഷേധത്തിനു പിന്നില്‍ പ്രവര്‍ത്തിച്ചത് സമൂഹത്തില്‍ അസ്വസ്ഥതയുണ്ടാക്കാന്‍ ശ്രമിക്കുന്ന ശക്തികള്‍. തൊഴിലാളികളെ തെറ്റിദ്ധരിപ്പിച്ചത് നാടിനെതിരായ നീക്കമാണ്. ആരേയും നാട്ടിലേക്ക് മടങ്ങാന്‍ അനുവദിക്കില്ലെന്നും പിണറായി കൂട്ടിച്ചേര്‍ത്തു.
ഇതരസംസ്ഥാന തൊഴിലാളികളുടെ പ്രതിഷേധവും ആശങ്കയും പായിപ്പാട് പൊതുവായി പ്രകടിപ്പിക്കപ്പെട്ട സാഹചര്യത്തിലാണ് സര്‍ക്കാര്‍ ഇക്കാര്യത്തില്‍ നിലപാട് വ്യക്തമാക്കിയത്. ഇതരസംസ്ഥാനതൊഴിലാളികളെ അവരുടെ നാടുകളിലേക്ക് അയക്കാനാവില്ല. ഇത് രാജ്യവ്യാപക ലോക്ഡൗണിനെയും കോവിഡ് പ്രതിരോധ നടപടികളെയും അട്ടിമറിക്കും. ഇതരസംസ്ഥാന തൊഴിലാളികളുടെ ക്ഷേമപ്രവര്‍ത്തനങ്ങള്‍ക്ക് മുതിര്‍ന്ന ഐഎഎസ് ഉദ്യോഗസ്ഥന്‍ നേതൃത്വം നല്‍കും.
സുരക്ഷക്കും ക്ഷേമത്തിനും മുന്‍ഗണന നല്‍കുമെന്ന് മുഖ്യമന്ത്രി ട്വിറ്ററില്‍കുറിച്ചു. എല്ലാ ഇതര സംസ്ഥാന തൊഴിലാളികള്‍ക്കും സൗജന്യഭക്ഷണം ഉറപ്പാക്കും. അവര്‍ക്ക് ആവശ്യമുള്ള പലവ്യഞ്ജനങ്ങള്‍ നല്‍കും. ഹിന്ദി സംസാരിക്കുന്ന ആരോഗ്യപ്രവര്‍ത്തകരെ ക്യാമ്പുകളിലേക്ക് നിയോഗിച്ചതായും മുഖ്യമന്ത്രി അറിയിച്ചു. എറണാകുളം ജില്ലയിലെ ഇതരസംസ്ഥാന തൊഴിലാളികള്‍ സുരക്ഷിതരാണെന്ന് മന്ത്രി വിഎസ് സുനില്‍കുമാര്‍ പറഞ്ഞു. തൊഴിലാളികള്‍ക്ക് സംരക്ഷണം നല്‍കാത്ത തൊഴിലുടമകള്‍ക്കെതിരെ കര്‍ശന നടപടിയെടുക്കും.
ഇതര സംസ്ഥാന തൊഴിലാളികളുടെ ആശങ്ക പരിഹരിക്കാന്‍ പെരുമ്പാവൂരില്‍ പൊലീസ്റൂട്ട് മാര്‍ച്ചും ബോധവല്‍ക്കരണവും നടത്തി. ആരോഗ്യ സുരക്ഷയ്ക്കും ഭക്ഷണ വിതരണത്തിനും ഏര്‍പ്പെടുത്തിയ ക്രമീകരണങ്ങള്‍ വിവിധ ഭാഷകളില്‍ അനൗണ്‍സ് ചെയ്തു. വാടകയുടെ പേരില്‍ തൊഴിലാളികളെ കെട്ടിടമുടമകള്‍ ഇറക്കിവിടില്ലായെന്നും പൊലീസ് ഉറപ്പു നല്‍കി.
https://www.facebook.com/Malayalivartha
