പച്ചക്കറി വിലകൂട്ടി വില്‍പ്പന നടത്തവേ മഫ്തിയില്‍ എത്തിയ എസ്‌ഐയോട് മോശമായ പെരുമാറ്റം; കടയുടമയ്‌ക്കെതിരേ കേസ്
മാവേലിക്കര കെഎസ്ആര്‍ടിസി ജംഗ്ഷനില്‍ പച്ചക്കറി കട നടത്തുന്ന ഭരണിക്കാവ് പള്ളിക്കല്‍ നടുവിലേമുറി ശ്രുതിലയത്തില്‍ സതീശന് (55) എതിരെ മാവേലിക്കര പോലീസ് കേസെടുത്തു. കൊറോണ വ്യാപനത്തിന്റെ പശ്ചാത്തലത്തിലെ ലോക്ക് ഡൗണിന്റെ മറവില്‍ പച്ചക്കറികള്‍ക്ക് അമിത വില ഈടാക്കുകയും നിരോധിത പ്ലാസ്റ്റിക് കവര്‍ അന്യായ വിലയ്ക്കു വില്‍ക്കുകയും ചെയ്തതിനാണ് കേസ്.
മാവേലിക്കര സിഐയ്ക്ക് ഈ കടയിലെ ജനദ്രോഹ വില്‍പനയ്‌ക്കെതിരെ നിരവധി പരാതികള്‍ ലഭിച്ചിരുന്നു. സമൂഹമാധ്യമങ്ങളിലൂടെ വ്യാപക പ്രതിഷേധവും ഉയര്‍ന്നിരുന്നു. തുടര്‍ന്ന് പോലീസ് ഇത്തരം നടപടികള്‍ ആവര്‍ത്തിക്കരുതെന്ന് കടയുടമയ്ക്ക് താക്കീത് നല്‍കിയിരുന്നു.
ഇതു വകവെയ്ക്കാതെ പ്രവൃത്തി തുടര്‍ന്നപ്പോഴാണ് സിഐ നേരിട്ട് പരിശോധനയ്ക്കിക്കിറങ്ങിയത്. പച്ചക്കറി വാങ്ങാന്‍ ശനിയാഴ്ച രാവിലെ 8.30-ന് മഫ്തിയില്‍ കടയിലെത്തിയ സിഐ പച്ചക്കറി വാങ്ങിയ ശേഷം കവര്‍ ചോദിച്ചു.
പ്ലാസ്റ്റിക് കവര്‍ കൊടുത്ത ശേഷം വില 10 രൂപയെന്നറിയിച്ചു. ഇത് നിയമ ലംഘനമാണെന്ന് പറഞ്ഞ സിഐ യോട് ഇയാള്‍ വേണമെങ്കില്‍ വാങ്ങിയാല്‍ മതിയെന്നു പറഞ്ഞ കടയുടമയെ സ്റ്റേഷനിലേക്ക് വിളിച്ചു വരുത്തി കേസെടുക്കുകയായിരുന്നു.
വീണ്ടും ഇത്തരം നടപടികള്‍ ആവര്‍ത്തിച്ചാല്‍ കൂടുതല്‍ കര്‍ക്കശമായ നിയമ നടപടികള്‍ സ്വീകരിക്കുമെന്ന് സിഐ അറിയിച്ചു. ലോക്ക് ഡൗണിന്റെ മറവില്‍ ജനങ്ങളെ ദ്രോഹിക്കുന്ന സമീപനം സ്വീകരിക്കുന്ന കച്ചവടക്കാര്‍ക്കെതിരെ ശക്തമായ നടപടി പോലീസിന്റെ ഭാഗത്തു നിന്നുണ്ടാവുമെന്നും അദ്ദേഹം പറഞ്ഞു.
https://www.facebook.com/Malayalivartha
