കാലിയായ പ്ലാറ്റ്ഫോമുകള്, ഒഴിഞ്ഞുകിടക്കുന്ന ഇരിപ്പിടങ്ങള്... ആദ്യമായാണ് ഇത്തരത്തിലൊരു കാഴ്ച!
ചരിത്രത്തില് ഒരിക്കലും പൂട്ടാത്ത സ്ഥലങ്ങളും കോവിഡ് 19 -ലോക്ഡൗണ് പ്രഖ്യാപിച്ചതോടെ കാലിയായി. ഹര്ത്താലുകളും പണിമുടക്കുകളും ഉണ്ടാകുമ്പോള് റോഡ് കാലിയാകുന്നതും കടകള് പൂട്ടുന്നതും നഗരം കണ്ടിട്ടുണ്ട്. എന്നാല് ബസുകള് ഇല്ലാത്ത ബസ് സ്റ്റാന്ഡും യാത്രാ ട്രെയിന് ഇല്ലാത്ത റെയില്വേ സ്റ്റേഷനുമെല്ലാം ഈ നൂറ്റാണ്ടിലെ ആദ്യ കാഴ്ചയാണെന്നു പറയാം.
റെയില്വേ സ്റ്റേഷനില് സ്റ്റേഷന് മാസ്റ്ററും അത്യാവശ്യം ജീവനക്കാരും മാത്രം എത്തുന്നുണ്ട്. ചരക്കു തീവണ്ടി ഓടുന്നതിനാല് പൊലീസിനും സിആര്പിഎഫ് ഉദ്യോഗസ്ഥര്ക്കും ജോലിയുണ്ട്. എന്നാല് റെയില്വേ സ്റ്റേഷന് കവാടം മുതല് ശ്മശാന മൂകമാണ്.
ആദ്യമായാണ് ഇത്തരത്തിലൊരു കാഴ്ച...കാലിയായ പ്ലാറ്റ്ഫോമുകള്, പ്രവര്ത്തിക്കാത്ത ഫാനുകള്, ഒഴിഞ്ഞുകിടക്കുന്ന ഇരിപ്പിടങ്ങള്! യാത്രക്കാര് ഇല്ലാത്തതിനാല് പട്ടിണിയിലായത് ചായ വില്പനക്കാര് മുതല് ഓട്ടോറിക്ഷാ തൊഴിലാളികള് വരെയുള്ളവരാണ്. പലരും സ്വന്തം വീട്ടിലേക്കും നാട്ടിലേക്കും മടങ്ങി.
സ്വകാര്യ ബസ് സ്റ്റാന്ഡുകളില് പൊലീസ് അല്ലാതെ ആരുമില്ല. കെഎസ്ആര്ടിസിയില് ഇപ്പോള് സുരക്ഷാ ഉദ്യോഗസ്ഥര് മാത്രമാണ് ജോലിക്ക് എത്തുന്നത്. എത്തുന്ന ജീവനക്കാര്ക്ക് പലപ്പോഴും ആഹാരമോ വെള്ളമോ ലഭിക്കാത്ത അവസ്ഥയാണ്. പ്രതിസന്ധി രൂക്ഷമായാല് എന്ത് ചെയ്യുമെന്ന ആശങ്കയിലാണ് ഇവരും.
https://www.facebook.com/Malayalivartha