കോവിഡ് 19 ചികിത്സയ്ക്കായി ഉദ്യോഗസ്ഥര്‍ ധരിക്കുന്ന പിപിഇ കിറ്റിനൊപ്പം ഉപയോഗിക്കുന്ന മുഖാവരണമായ ഫെയ്‌സ് ഷീല്‍ഡുകള്‍ 5000 എണ്ണം നിര്‍മിക്കാന്‍ കെപ്ലര്‍ റോബട്ടിക്‌സിന് ജില്ലാ കലക്ടറുടെ അനുമതി. പത്തനംതിട്ട ജില്ലയ്ക്ക 5000-ല്‍ പരം ഫെയ്‌സ് ഷീല്‍ഡുകള്‍ ആവശ്യമുണ്ടെന്ന് കരുതുന്നു. 

ചെങ്ങന്നൂര്‍ സ്വദേശിയായ കെ.എസ് ജിഷ്ണുവും കൂട്ടുകാരായ അതുല്‍ ചന്ദ്രസേനന്‍, ആല്‍വിന്‍ എം. കുര്യന്‍, പി. ഹരികുമാര്‍ എന്നിവര്‍ ചേര്‍ന്ന് തുടങ്ങിയ കെപ്ലര്‍ റോബട്ടിക്‌സും ജില്ലാ ഭരണകൂടവും ചേര്‍ന്നാണ് ആവശ്യമായ ഫെയ്‌സ് ഷീല്‍ഡ് നിര്‍മിക്കുന്നത്. ത്രീ ഡി പ്രിന്റിങ്ങിലൂടെ നിര്‍മിക്കുന്ന ഫെയ്‌സ് ഷീല്‍ഡുകള്‍ ഭാരം കുറഞ്ഞതും ഇലാസ്റ്റിക് ബാന്‍ഡുകളില്ലാതെ അനായാസം ധരിക്കാനും സാധിക്കുന്നതാണ്. അണുവിമുക്തമാക്കി വീണ്ടും ഉപയോഗിക്കുകയും ചെയ്യാം.

നേരത്തെ ഇവരുടെ നിര്‍മാണരീതി അറിയിക്കുകയും ട്രയല്‍ എന്ന രീതിയില്‍ നിര്‍മിച്ചു കാണിക്കുകയും ചെയ്തിരുന്നു. മെഡിക്കല്‍ ടീമിന്റെ നിര്‍ദേശപ്രകാരം അനുയോജ്യമായ മാറ്റങ്ങളും വരുത്തി.

പിന്നീട് നിര്‍മാണത്തിന് ആവശ്യമായ ഫെയ്‌സ് ഷീല്‍ഡ് നിര്‍മിക്കാനുള്ള സാമഗ്രികള്‍ വാങ്ങിനല്‍കി. നിര്‍മിക്കുന്നതിന്റെ ചാര്‍ജ് ഈടാക്കാതെയാണു പ്രിന്റിങ്. ലോക്ഡൗണ്‍ ആയതിനെ തുടര്‍ന്ന് ജിഷ്ണുവിന്റെയും അതുലിന്റെയും വീടുകളിലാണു നിര്‍മാണം. 10 മെഷീനുകള്‍ ഉപയോഗിച്ച് 400 ഫെയ്‌സ് ഷീല്‍ഡുകളാണ് ദിവസേന നിര്‍മിക്കുന്നത്.