സംസ്ഥാനത്ത് സ്‌പെഷ്യാലിറ്റി മരുന്നുകള്‍ക്ക് ക്ഷാമം... ലോക്ഡൗണ്‍ കാലത്തും ചെക്കിന് നിര്‍ബന്ധംപിടിച്ച് കമ്ബനികള്‍; കൊറിയര്‍ സര്‍വീസില്ലാത്തതിനാല്‍ ചെക്ക് എത്തിച്ച് നല്‍കാനാവുന്നില്ലെന്ന് ഏജന്‍സികള്‍
കോവിഡ് 19 ബാധയെ തുടര്‍ന്ന് സംസ്ഥാനം ലോക് ഡൗണിലാണെങ്കിലും അവശ്യ സര്‍വ്വീസുകള്‍ക്ക് ഇത് ബാധകമല്ല. എന്നാല്‍ കൊറിയര്‍ സേവനങ്ങളുടെ അപര്യാപ്തത കാരണം സ്‌പെഷ്യാലിറ്റി മരുന്നുകള്‍ക്ക് ക്ഷാമം നിലനില്‍ക്കുന്നു. ലോക്ഡൗണ്‍ കാലത്തും ഓര്‍ഡറുകള്‍ക്ക് ചെക്ക് ചോദിച്ച് മരുന്നു കമ്ബനികള്‍. കൊറിയര്‍ സര്‍വീസില്ലാത്തതിനാല്‍ ചെക്ക് എത്തിച്ച് നല്‍കാനാവുന്നില്ലെന്ന് ഏജന്‍സികള്‍ പറയുന്നു.
അവശ്യ സര്‍വിസിന്റെ കാര്യത്തിലും നിര്‍ബന്ധംപിടിക്കുന്ന ചില കമ്പനികളുണ്ടെന്ന് ഓള്‍ കേരള കെമിസ്റ്റ്‌സ് ആന്‍ഡ് ഡ്രഗിസ്റ്റ്‌സ് അസോസിയേഷന്‍ (എ.കെ.സി.ഡി.എ) സംസ്ഥാന പ്രസിഡന്റ് എ.എന്‍. മോഹനന്‍ 'മാധ്യമ'ത്തോടു പറഞ്ഞു. സനോഫി എന്ന അന്താരാഷ്ട്ര കമ്ബനിയുടേതുള്‍പ്പെടെ നേരത്തെ ഇന്ത്യയില്‍ ഇറക്കുമതി ചെയ്തിരുന്ന മരുന്നുകളും തീരെ ലഭ്യമല്ലാത്ത സ്ഥിതിയുണ്ട്.
ലോക്ഡൗണ്‍ കാരണം ആളുകള്‍ ഡോക്ടറെ കാണാത്തതിനാല്‍ ജീവന്‍രക്ഷ മരുന്നുകള്‍ക്ക് ക്ഷാമമില്ല. വേദനസംഹാരി മരുന്നുകള്‍ക്കും വില്‍പന കുറവാണ്. ഹൃദ്രോഗം, രക്തസമ്മര്‍ദം, കൊളസ്‌ട്രോള്‍ ഉള്‍പ്പെടെ സ്ഥിരം കഴിക്കുന്ന മരുന്നുകള്‍ക്കാണ് ആവശ്യക്കാരുള്ളത്.
ഗുജറാത്ത്, ചണ്ഡീഗഡ്, ചെന്നൈ ഉള്‍പ്പെടെ വിവിധ സംസ്ഥാനങ്ങളില്‍ നിന്നും എറണാകുളത്തെ കോസ്റ്റ് ആന്‍ഡ് ഫ്രൈറ്റ് സേവനം നടത്തുന്ന കൊറിയര്‍ കേന്ദ്രങ്ങളിലാണ് മരുന്നെത്തുക. എന്നാല്‍, എറണാകുളത്തുനിന്ന് മലബാര്‍ ജില്ലകളിലെ വിതരണക്കാരിലേക്ക് മരുന്ന് എത്തുന്നത് വളരെ വൈകിയാണെന്ന് വിതരണക്കാര്‍ പറയുന്നു. മരുന്നു വിതരണത്തിന് കൊറിയര്‍ സംവിധാനങ്ങള്‍ക്ക് പ്രത്യേകാനുമതി നല്‍കിയാല്‍ ഈ ബുദ്ധിമുട്ട് പരിഹരിക്കാമെന്നാണ് വിതരണക്കാരുടെ പക്ഷം.
https://www.facebook.com/Malayalivartha
