ഡല്‍ഹി- തിരുവനന്തപുരം സ്‌പെഷല്‍ രാജധാനി ട്രെയിനില്‍ വരുന്ന യാത്രക്കാര്‍ക്കു റെയില്‍വേ സ്റ്റേഷനുകളില്‍ നിന്നു വീടുകളിലേക്ക് പോകാന്‍ പ്രത്യേക പാസ് വേണ്ട; ട്രെയിന്‍ ടിക്കറ്റ് കാണിച്ചാല്‍ മതിയെന്ന് ഡിജിപി ലോക്‌നാഥ് ബെഹ്‌റ അറിയിച്ചു. യാത്രക്കാരെ അകലം ഉള്‍പ്പെടെ മാനദണ്ഡങ്ങളുടെ അടിസ്ഥാനത്തില്‍ മാത്രമേ പുറത്തിറങ്ങാന്‍ അനുവദിക്കുകയുള്ളൂ. ട്രെയിനില്‍ നിന്നോ സ്റ്റേഷനില്‍ നിന്നോ ഒരുമിച്ച് പുറത്തിറക്കില്ല.

ജനമൈത്രി പൊലീസ് തിരുവനന്തപുരം, ആലുവ, കോഴിക്കോട് റെയില്‍വേ സ്റ്റേഷനുകളില്‍ ഹെല്‍പ് ഡെസ്‌ക്കുകള്‍ ആരംഭിക്കും. ആഭ്യന്തര സുരക്ഷയുടെയും റെയില്‍വേയുടേയും ചുമതലയുള്ള ഡിഐജി എ.അക്ബറിനാണ് യാത്രക്കാരുടെ സുരക്ഷാ പരിശോധന ഏകോപിപ്പിക്കുന്നതിന്റെ ഉത്തരവാദിത്തം. ക്രമസമാധാന ചുമതലയുള്ള എഡിജിപി ഡോ.ഷെയ്ഖ് ദര്‍വേഷ് സാഹിബ് മേല്‍നോട്ടം വഹിക്കും.

കേരളത്തിലേക്ക് ഡല്‍ഹിയില്‍ നിന്നുള്ള ആദ്യ സ്‌പെഷല്‍ ട്രെയിന്‍ നാളെ കേരളത്തില്‍ പ്രവേശിക്കും. നാളെ രാത്രി 11.52-ന് കോഴിക്കോട് എത്തുന്ന ട്രെയിന്‍, 15-ന് പുലര്‍ച്ചെ 1.40-ന് എറണാകുളം ജംക്ഷനിലും രാവിലെ 5.25 -ന് തിരുവനന്തപുരത്തും എത്തും.

കേരളത്തിലേക്കുളള രാജധാനി ട്രെയിനുകളില്‍ 19 വരെ ടിക്കറ്റുകള്‍ വിറ്റു തീര്‍ന്നു. തിരക്ക് കൂടുന്നതനുസരിച്ചു നിരക്ക് കൂടുന്നതു മൂലം വന്‍ തുകയാണു പലര്‍ക്കും ചെലവായത്. തിങ്കളാഴ്ച രാത്രി ബുക്കിങ് തുടങ്ങുമ്പോള്‍ ന്യൂഡല്‍ഹി-തിരുവനന്തപുരം യാത്രയ്ക്കു ഫസ്റ്റ് എസിയില്‍ 7345, സെക്കന്‍ഡ് എസിയില്‍ 4260, തേഡ് എസിയില്‍ 2930 എന്നിങ്ങനെയായിരുന്നെങ്കില്‍ ഇന്നലെ രാവിലെ ഇത് യഥാക്രമം 7345, 5920, 4065 എന്നിങ്ങനെയായി.