പട്ടാമ്പി റെയില്‍വേ സ്റ്റേഷനില്‍ നിന്ന് ബസ് സ്റ്റാന്‍ഡിലേക്ക് ഇറങ്ങുന്ന എളുപ്പ വഴി അടച്ചു; പ്രതിഷേധം
പല തവണ അടയ്ക്കാന്‍ നടന്ന നീക്കങ്ങളെല്ലാം നാട്ടുകാരുടെ അഭ്യര്‍ഥനയെ മാനിച്ച് മാറ്റി വച്ചിരുന്ന, പട്ടാമ്പി റെയില്‍വേ സ്റ്റേഷനില്‍നിന്ന് ബസ് സ്റ്റാന്‍ഡിലേക്ക് ഇറങ്ങുന്ന എളുപ്പ വഴി റെയില്‍വേ അടച്ചു. പതിറ്റാണ്ടുകളുടെ പഴക്കമുള്ള വഴി അടയ്ക്കരുതെന്ന നാട്ടുകാരുടെ ആവശ്യം കോവിഡ് വ്യാപന ഭീതി നിലനില്‍ക്കുന്നതിനാല്‍ അംഗീകരിക്കാനാവില്ലെന്ന നിലപാടില്‍ ഉറച്ച് നിന്ന റെയില്‍വേ ഇന്നലെയാണ് വഴി അടച്ചത്.
പുരാതനമായുള്ള ആ വഴി നൂറ് കണക്കിന് യാത്രക്കാര്‍ ഉപയോഗിക്കുന്ന വഴിയായതിനാല്‍ നാട്ടുകാര്‍ പ്രതിഷേധവുമായി എത്തിയതോടെ പണി തല്‍ക്കാലം നിര്‍ത്തിയിരുന്നു. ഡിആര്‍എമ്മിനെ കണ്ട് കാര്യങ്ങള്‍ ബോധ്യപ്പെടുത്താന്‍ സമയം അനുവദിക്കണമെന്ന പ്രതിഷേധക്കാരുടെ ആവശ്യം പരിഗണിച്ചാണ് പണി താല്‍ക്കാലികമായി നിര്‍ത്തിയത്.
കോവിഡ് വ്യാപന ഭീതി നിലവിലുള്ള സാഹചര്യത്തില്‍ റെയില്‍വേ എല്ലാ സ്റ്റേഷനുകളിലേക്കും പ്രവേശിക്കാനും , പുറത്തേക്ക് പോകാനും ഒറ്റ വഴി മാത്രമാക്കുന്നതിന്റെ ഭാഗമായുള്ള തീരുമാനമായതിനാല്‍ വഴി അടയ്ക്കാതിരിക്കാന്‍ കഴിയില്ലെന്ന മറുപടിയാണ് ഡിആര്‍എം നല്‍കിയത്.
തുടര്‍ന്ന് മണ്ണ് മാന്തി യന്ത്ര സഹായത്തോടെ റെയില്‍വേ കഴിഞ്ഞ ദിവസം സ്റ്റേഷനില്‍നിന്ന് ബസ് സ്റ്റാന്‍ഡിലേക്ക് ഇറങ്ങുന്ന വഴിയിലെ പടികള്‍ പൊളിച്ച് നീക്കി. കോവിഡ് വ്യാപന ഭീതിയെ തുടര്‍ന്ന് എല്ലാ റെയില്‍വേ സ്റ്റേഷനുകളും സുരക്ഷിതമാക്കുന്നതിന്റെ ഭാഗമായാണ് തീരുമാനമെന്നും വഴി അടയ്ക്കാനുള്ള തീരുമാനവുമായി മുന്നോട്ട് പോകുക തന്നെ ചെയ്യുമെന്നും റെയില്‍വേ അധികൃതര്‍ പ്രതിഷേധക്കാരെ അറിയിച്ചിരുന്നു.
സ്റ്റേഷനില്‍ നിന്ന് ബസ് സ്റ്റാന്‍ഡിലേക്ക് ഇറങ്ങുന്ന വഴിയെക്കുറിച്ച് റെയില്‍വേക്ക് നേരത്തെ പരാതികള്‍ ലഭിച്ചിട്ടുണ്ടെന്നും സ്റ്റേഷനില്‍ സാമൂഹിക വിരുദ്ധരുടെയും, അലഞ്ഞ് തിരിയുന്നവരുടെയും , യാചകരുടെയും , കഞ്ചാവ് വില്‍പനക്കാരുടെയുമെല്ലാം ശല്യം വര്‍ധിക്കാന്‍ ഈ വഴി കാരണമെന്നാണ് പരാതിയെന്നും റെയില്‍വേ സംരക്ഷണ സേന ഉദ്യോഗസ്ഥര്‍ പ്രതിഷേധക്കാരെ അറിയിച്ചിരുന്നു.
വഴി അടയ്ക്കുന്നത് ഒഴിവാക്കാന്‍ ഇടപെടണമെന്ന പട്ടാമ്പിയിലെ യുഡിഎഫ് നേതാക്കളുടെയും, യുഡിഎഫ് നഗരസഭ കൗണ്‍സിലര്‍മാരുടെയും ആവശ്യത്തെ തുടര്‍ന്ന് വി.കെ. ശ്രീകണ്ഠന്‍ എംപി ഡിആര്‍എമ്മുമായി ചര്‍ച്ച നടത്തിയിരുന്നു. വര്‍ഷങ്ങളായി പ്രദേശത്തുകാര്‍ ഉപയോഗിക്കുന്ന വഴിയാണിതെന്ന് ശ്രദ്ധയില്‍പ്പെടുത്തിയെന്നും കോവിഡ് ഭീതി ഒഴിഞ്ഞാല്‍ വഴി പുന:സ്ഥാപിക്കുന്ന കാര്യം പരിഗണിക്കണമെന്ന് ആവശ്യപ്പെട്ടതായും വി.കെ. ശ്രീകണ്ഠന്‍ അറിയിച്ചു.
https://www.facebook.com/Malayalivartha
