ആഡംബര ബൈക്കുകള്‍ മോഷ്ടിക്കുന്നതു പതിവാക്കിയ ജില്ലാന്തര സംഘം മാളയില്‍ പൊലീസ് പിടിയില്‍. ലഹരിമരുന്നു കടത്താനാണ് ഇവര്‍ മോഷ്ടിക്കുന്ന ബൈക്കുകള്‍ ഉപയോഗിച്ചിരുന്നത്.

കൊടുങ്ങല്ലൂര്‍ വെമ്പല്ലൂര്‍ തയ്യില്‍ സൗരവ് (23), മേത്തല എല്‍ത്തുരുത്ത് തലപ്പിള്ളി അമല്‍ദേവ് (23), എറിയാട് ഉണ്ണിയമ്പാട്ട് ഹസീബ് (26), കോട്ടപ്പുറം എടപ്പിള്ളി മാലിക് (18) എന്നിവരെയും പ്രായപൂര്‍ത്തിയാകാത്ത രണ്ടു പേരെയുമാണ് മാള സിഐ വി. സജിന്‍ ശശിയുടെ നേതൃത്വത്തിലുള്ള സംഘം പിടികൂടിയത്. 4 പേര്‍ കൂടി ഉടന്‍ പിടിയിലായേക്കും. ചെങ്ങമനാട്ടെ എടിഎം കുത്തിത്തുറന്നു മോഷണം നടത്താന്‍ ശ്രമിച്ചതും ഇതേ സംഘമാണെന്നാണ് സൂചന.

ആഡംബര ബൈക്കുകള്‍ മോഷ്ടിച്ചു പണയം വയ്ക്കുകയും പൊളിച്ചുവില്‍ക്കുകയും ചെയ്യുന്ന ഇവരുമായി ബന്ധമുള്ള 2 പേര്‍ ബൈക്ക് മോഷ്ടിച്ചു കടത്തുന്നതിനിടെ മൂന്നാറില്‍ അപകടത്തില്‍പ്പെട്ടിരുന്നു. ഇവര്‍ കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലുണ്ടെന്നാണ് പൊലീസിനു ലഭിച്ച വിവരം. പൊയ്യ, പൂവ്വത്തുശ്ശേരി, അഷ്ടമിച്ചിറ, കൊമ്പിടി എന്നിവിടങ്ങളില്‍ നിന്നാണ് ഇവര്‍ ബൈക്കുകള്‍ കടത്തിയത്. വാഹന പരിശോധനയ്ക്കിടെ പൊലീസിനെ ഇടിച്ചുവീഴ്ത്തി രക്ഷപ്പെടാന്‍ ശ്രമിച്ച കേസിലും ഇവര്‍ പ്രതിയാണ്.

പ്രതികളിലൊരാളായ സൗരവ് സ്വകാര്യ ലോ കോളജിലെ കെഎസ്‌യു പ്രവര്‍ത്തകനാണ്. അടിപിടിക്കേസിലും മതിലകം സ്റ്റേഷനില്‍ പോക്‌സോ കേസിലും ഇയാള്‍ പ്രതിയാണ്. അമല്‍ദേവ് ഒട്ടേറെ കഞ്ചാവ് കേസുകളില്‍ പ്രതിയാണ്.

മോഷ്ടിച്ച ബൈക്കുകളില്‍ 2 എണ്ണം പൊലീസ് കണ്ടെടുത്തു. മൂന്നാമത്തേതു പൊളിച്ചു കഷണങ്ങളാക്കിയ ശേഷം കൊടുങ്ങല്ലൂര്‍ പുല്ലൂറ്റ് പാലത്തില്‍ നിന്നു താഴേക്കെറിഞ്ഞതായി കണ്ടെത്തി. പൊലീസ് പിടികൂടുമെന്നു സംശയം തോന്നിയപ്പോഴായിരുന്നു ഈ തന്ത്രം. ഒരു മത്സ്യത്തൊഴിലാളിയുടെ വലയില്‍ ബൈക്കിന്റെ ഷാസി കുടുങ്ങിയതാണ് മോഷണമുതല്‍ പുറത്തുകൊണ്ടുവരാന്‍ സഹായിച്ചത്. തിരച്ചിലില്‍ മറ്റു ഭാഗങ്ങള്‍ കൂടി കണ്ടെടുത്തു.

എസ്‌ഐ എ.വി. ലാലു, എഎസ്‌ഐമാരായ സുധാകരന്‍, ബിജു വാളൂരാന്‍, വിശ്വംഭരന്‍, തോമസ്, സിപിഒമാരായ ആര്‍. മിഥുന്‍കൃഷ്ണ, പി.കെ. ബിജു, ജോബി, എം.എക്‌സ്. ഷിജു, വിനോദ്, സുജിത് എന്നിവര്‍ അടങ്ങിയ സംഘമാണ് പ്രതികളെ പിടികൂടിയത്.