ക്ഷേത്രോത്സവങ്ങളിലെ ആനച്ചന്തം ഇനി ഓർമ. ശബരി ഗ്രൂപ്പിന്റെ ഉടമസ്ഥതയിലുള്ള ആനത്തറവാട്ടിലെ ഗജവീരൻ ചെർപ്പുളശ്ശേരി നീലകണ്ഠൻ കാറൽമണ്ണ ആനക്കോട്ടയിൽ ചരിഞ്ഞു. തിങ്കളാഴ്ചരാവിലെ 7.10-നായിരുന്നു പാദരോഗത്തിന് ചികിത്സയിലായിരുന്ന നീലകണ്ഠൻ ചരിഞ്ഞത്. 47 വയസ്സ് പ്രായമുണ്ട്.

കേരളത്തിലെ ക്ഷേത്രോത്സവങ്ങളിൽ അഴകിന്റെ നിറസാന്നിധ്യമായിരുന്ന ചെർപ്പുളശ്ശേരി നീലകണ്ഠൻ പാദരോഗത്തെത്തുടർന്ന് മൂന്നു മാസത്തിലേറെയായി ചികിത്സയിലായിരുന്നു. ലക്ഷണമൊത്ത കൊമ്പൻ മധ്യകേരളത്തിലെ പൂരങ്ങൾക്കും ഉത്സവങ്ങൾക്കും നിറസാന്നിധ്യമായിരുന്നു. തൃശ്ശൂർ പൂരം എഴുന്നള്ളിപ്പിലും പങ്കാളിയായിരുന്നു.. 308 സെന്റീമീറ്റർ ഉയരമുണ്ടായിരുന്നു. വനം വകുപ്പുദ്യോഗസ്ഥരും പൊലീസും എത്തി നടപടികൾ പൂർത്തിയാക്കി ജഡം വാളയാറിൽ സംസ്കരിച്ചു.
ആനപ്രേമികളുടെ ആവേശമായിരുന്നു ചെർപ്പുളശ്ശേരി നീലകണ്ഠൻ എന്ന ഗജ വീരൻ..ചിനക്കത്തൂർ, പരിയാനംപറ്റ, ഉത്രാളിക്കാവ്, ചേറമ്പറ്റ തുടങ്ങി തൃശൂർ പൂരം വരെയുള്ള ഉത്സവങ്ങളിൽ തിടമ്പുമായി എഴുന്നള്ളിയിട്ടുണ്ട്‌ പാദരോഗത്തെത്തുടർന്ന് ഈ സീസണിൽ ഉത്സവ എഴുന്നള്ളിപ്പിൽ നീലകണ്ഠൻ പങ്കെടുത്തിരുന്നില്ല. ലോക്ഡൗൺ സമയത്തും പൊലീസിന്റെ സഹായത്തോടെ തിരുവനന്തപുരം പോത്തൻകോടുനിന്ന് ആയുർവേദ മരുന്ന് എത്തിച്ചു ചികിത്സ നടത്തിയിരുന്നു.പക്ഷെ നീലകണ്ഠനെ രക്ഷിക്കാനായില്ല.

 ചെർപ്പുളശ്ശേരി ശേഖരൻ, ചെർപ്പുളശ്ശേരി മണികണ്ഠൻ, ചെർപ്പുളശ്ശേരി പാർഥൻ എന്നീ ആനകൾക്കു ശേഷം നാലാമനായാണു ചെർപ്പുളശ്ശേരി നീലകണ്ഠൻ ശബരി ഗ്രൂപ്പിന്റെ ചെർപ്പുളശ്ശേരിയിലെ ആനത്തറവാട്ടിൽ എത്തിയത്. തനി നാടൻ ആനകളുടെ സൗന്ദര്യവും ശൗര്യവുമൊക്കെയുള്ള ഒരു ആനയായിരുന്നു ചെർപ്പുളശ്ശേരി നീലകണ്ഠൻ; കുട്ടിയായിരിക്കുമ്പോൾ തമിഴ്നാട്ടിലെ പള്ളിവാസലിൽനിന്ന് പറവൂരിൽ ഉള്ള ഒരു ജ്വല്ലറി ഉടമയാണ് ഈ ആനയെ കേരളത്തിലെത്തിച്ചത്. പറവൂരിൽ ഉള്ളപ്പോൾ പാണ്ടിഭാസ്കർ എന്നായിരുന്നു പേര്.

2006ൽ ശബരി ഗ്രൂപ്പ് സ്വന്തമാക്കിയതോടെ ചെർപ്പുളശ്ശേരി നീലകണ്ഠനായി. എല്ലാ അർഥത്തിലും ലക്ഷണമൊത്ത ആനയായിരുന്നു നീലകണ്ഠൻ. ഉയർന്ന വായുകുംഭവും ആകാരവടിവും . എല്ലാം കൊണ്ടും ഗജവീരൻ തന്നെയായിരുന്ന നീലകണ്ഠൻ ഉത്സവപ്പറമ്പുകളിൽ മുൻപനായി പേരെടുത്തു. തുമ്പിക്കയ്യിന് നല്ല നീളമുണ്ടായിരുന്നു. സാധാരണ ആനകൾ 25 മുതൽ 30 വരെ പട്ട തിന്നുമ്പോൾ നീലകണ്ഠൻ ഒറ്റനിൽപ്പിൽ 60 വരെ പട്ട തിന്നുമായിരുന്നു. അതുകൊണ്ടു തന്നെ നീലകണ്ഠന് നല്ല ആരോഗ്യവും നിലനിർത്താനായി.

വാശിക്കാരനായ കുറുമ്പനായിരുന്നെങ്കിലും അനുസരണശീലവും നല്ല സ്വഭാവ ലക്ഷണങ്ങളും കൊണ്ട് ആനത്തറവാട്ടിലെ പ്രിയങ്കരനായി മാറാനും നീലകണ്ഠനു പെട്ടന്ന് സാധിച്ചു. പാര്ഥന് ശേഷമാണ് നീലകണ്ഠൻ ചെർപ്പുളശേരിയിൽ എത്തുന്നത് .കഴിഞ്ഞ വർഷം മെയ് 7നാണ് ചെർപ്പുളശ്ശേരി പാർഥൻ ചരിഞ്ഞത്. ഒരു വർഷം കഴിഞ്ഞപ്പോഴേക്കും ചെർപ്പുളശ്ശേരി നീലകണ്ഠനും യാത്രയായത് ആനപ്രേമികൾക്കു തീരാവേദനയായി. പാർഥനു ശേഷം ആനത്തറവാട്ടിലെത്തിയ നീലകണ്ഠന്റെ മടക്കവും പാർഥനു പിന്നാലെയായിരുന്നു .

ചെർപ്പുളശ്ശേരി പാർഥനു മുൻപേ ചെർപ്പുളശ്ശേരി ആദിനാരായണനും ചെർപ്പുളശ്ശേരി ഹിരണും വിടവാങ്ങിയിരുന്നു. 9 ആനകളുണ്ടായിരുന്ന ചെർപ്പുളശ്ശേരി ആനത്തറവാട്ടിൽ നിലവിൽ ചെർപ്പുളശ്ശേരി ശേഖരൻ, ചെർപ്പുളശ്ശേരി അനന്തപത്മനാഭൻ ഉൾപ്പെടെ 6 ആനകളായി ചുരുങ്ങി.
ലോക്ഡൗണിനിടെ ഏപ്രിൽ 18-ന് തിരുവന്തപുരത്തുനിന്ന് ചെർപ്പുളശ്ശേരി പോലീസിന്റെ സഹായത്തോടെ നീലകണ്ഠന്റെ ചികിത്സക്കായി ആയുർവേദമരുന്നുകളെത്തിച്ചത് വാർത്തയായിരുന്നു. വനംവകുപ്പ്-പോലീസ് ഉദ്യോഗസ്ഥർ സ്ഥലത്തെത്തി തുടർനടപടികൾ പൂർത്തിയാക്കിയശേഷം വാളയാർ വനത്തിൽ സംസ്‌കരിച്ചു. ആനപ്രേമികലക്കും കേരളക്കരയ്ക്കും തീരാനഷ്ടം സമ്മാനിച്ച് അങ്ങനെ ചെർപ്പുളശ്ശേരി നീലകണ്ഠൻ എന്ന ഗജവീരനും യാത്രയായി.