മെഡിക്കൽ ബോർഡിന്റേത് പക്ഷപാതപരമായ നടപടിയെന്ന് ആരോപിച്ച് പ്രതാപനും അനിൽ അക്കരയും നിരാഹാരത്തിലേക്ക് .മന്ത്രി എ.സി മൊയ്തീന് ക്വാറന്റൈൻ വേണ്ടതില്ല എന്ന തൃശൂരിലെ മെഡിക്കൽ ബോർഡ് തീരുമാനത്തിനെതിരെയാണ് കോൺ​ഗ്രസ് നേതാക്കൾ ഇന്ന് നിരാഹാര സമരം നടത്തുന്നത് . ടി.എൻ. പ്രതാപൻ എം.പിയും അനിൽ അക്കര എം.എൽ.എയുമാണ് ചൊവ്വാഴ്ച്ച രാവിലെ പത്ത്മുതൽ 24 മണിക്കൂർ നിരാഹാഹര സമരം നടത്തുന്നത്.

മെഡിക്കൽ ബോർഡിന്റെ പക്ഷപാതപരമായ നിലപാടിനെതിരെയാണ് നിരാഹാര സമരം നടത്തുന്നതെന്ന് കോൺ​ഗ്രസ് വ്യക്തമാക്കിയിട്ടുണ്ട്.. വാളയാറിൽ കൊവിഡ് സ്ഥിരീകരിച്ച മലപ്പുറം സ്വദേശിയുമായി യു.ഡി.എഫ് ജനപ്രതിനിധികളെ കണ്ടുവെന്ന വാദം ശരിവെക്കുന്ന ഒരു തെളിവും ഇതുവരെ ലഭിച്ചിട്ടില്ലെന്നും ഈ പശ്ചാത്തലത്തിൽ എ.സി മൊയ്തീനെ മാത്രം ഒഴിവാക്കി യു.ഡി.എഫ് നേതാക്കളെ ക്വാറന്റൈനിലാക്കുന്ന നടപടി വിവേചനപരമാണ് എന്ന് ആരോപിച്ചാണ് നേതാക്കൾ നിരാഹാര സമരമിരിക്കുന്നത്.

ഇരുവരും ക്വാറന്റൈനിൽ കഴിയുന്ന സ്ഥലത്ത് തന്നെയാണ് നിരാഹാര സമരം നടത്തുക എന്നാണ് റിപോർട്ടുകൾ . നേരത്തെ ​ഗുരുവായൂരിൽ മന്ത്രി എ.സി മൊയ്തീൻ സന്ദർശനം നടത്തിയ കേന്ദ്രത്തിൽ ഉണ്ടായിരുന്ന പ്രവാസികൾക്ക് കൊവിഡ് സ്ഥിരീകരിച്ചിരുന്നു. ഈ സാഹചര്യത്തിൽ മന്ത്രിക്കും ക്വാറന്റൈൻ വേണമെന്ന ആവശ്യം ഉയർന്നിരുന്നു. എന്നാൽ മന്ത്രി അവരെ കണ്ടതായി തെളിയിക്കാൻ പറ്റാത്ത സാഹചര്യത്തിലാണ് തൃശൂർ മെഡിക്കൽ ബോർഡ് മന്ത്രിയെ ക്വാറന്റൈനിൽ നിന്ന് ഒഴിവാക്കിയത്.