സ്രാവുകള്‍ക്ക് പണി കൊടുക്കാന്‍ ജേക്കബ് തോമസ്; ജേക്കബ് തോമസ് ഐപിഎസിനെ പ്രോസിക്യൂട്ട് ചെയ്യാന്‍ സര്‍ക്കാര്‍ അനുമതി; വാക്കത്തി പ്രയോഗം ഉടന്‍?
വാക്കുകള്‍ ആയുധമാക്കി മാറ്റിയ ജേക്കബ് തോമസ്, കൂട്ടിലിട്ട തത്തയാകാതെ വമ്പന്‍ സ്രാവുകള്‍ക്കൊപ്പം നീന്തുന്ന ജേക്കബ് തോമസിന്റെ പുതിയ നിലപാടുകള്‍ക്ക് കാതോര്‍ക്കുകയാണ് കേരളം. ഏതായാലും പരാജയപ്പെടാനില്ലെന്ന് പറഞ്ഞ് സര്‍ക്കാരിന് മുന്നില്‍ തലയെടുപ്പോടെ വന്ന ജേക്കബ് തോമസ്
മെറ്റല്‍ ഇന്‍ഡസ്ട്രീസ് ലിമിറ്റഡിന്റെ എംഡിയായപ്പോള്‍ ഒതുങ്ങിയെന്ന് കരുതിയവര്‍ക്ക് തെറ്റി. കൂടുതല്‍ മൂര്‍ച്ചയുള്ള വാക്കത്തി പ്രയോഗങ്ങളുമായി കളത്തില്‍ തന്നെയുണ്ടായിരുന്നു ജേക്കബ് തോമസ്.
ഇപ്പോഴിതാ ജേക്കബ് തോമസ് ഐപിഎസിനെ പ്രോസിക്യൂട്ട് ചെയ്യാന്‍ സര്‍ക്കാര്‍ അനുമതി നല്‍കിയിരിക്കുന്നു. സര്‍ക്കാരിന്റെ അനുമതിയില്ലാതെ 'സ്രാവുകള്‍ക്കൊപ്പം നീന്തുമ്പോള്‍' എന്ന പുസ്തകം എഴുതിയതിന്റെ പേരിലാണ് നടപടി. ഔദ്യോഗിക രഹസ്യനിയമം അനുസരിച്ച് ഒരു ഉദ്യോഗസ്ഥന്‍ സൂക്ഷിക്കേണ്ട വകുപ്പുതല കാര്യങ്ങള്‍ പുസ്‌കത്തില്‍ പരാമര്‍ശിച്ചതായി ക്രൈംബ്രാഞ്ച് ഡയറക്ടറുടെ അന്വേഷണത്തില്‍ കണ്ടെത്തിയിരുന്നു. ഈ മാസം അവസാനം വിരമിക്കാനിരിക്കെയാണ് സര്‍ക്കാര്‍ നടപടി. ജേക്കബ് തോമസിനെ തരംതാഴ്ത്താനുള്ള ഫയല്‍ സര്‍ക്കാരിന്റെ പരിഗണനയിലാണ്. അനധികൃത സ്വത്ത് സമ്പാദനത്തിന് ജേക്കബ് തോമസിനെതിരെ കേസെടുക്കാന്‍ ക്രൈംബ്രാഞ്ചിന് സര്‍ക്കാര്‍ നേരത്തെ അനുമതി നല്‍കിയിരുന്നു.
തമിഴ്‌നാട്ടിലെ വിരുദുനഗര്‍ ജില്ലയിലെ രാജപാളയത്ത് 2001ല്‍ 50.55 ഏക്കര്‍ വസ്തു വാങ്ങിയ വിവരം സ്വത്ത് വിവരങ്ങള്‍ വെളിപ്പെടുത്തിയപ്പോള്‍ സര്‍ക്കാരില്‍ നിന്നും മറച്ചുവച്ചെന്നും ഈ വസ്തു അനധികൃതമായി സമ്പാദിച്ചതാണെന്നുമാണ് ക്രൈംബ്രാഞ്ച് കണ്ടെത്തല്‍. 1985 ബാച്ച് ഐപിഎസ് ഓഫിസറായ ജേക്കബ് തോമസ് ഇപ്പോള്‍ മെറ്റല്‍ ഇന്‍ഡസ്ട്രീസ് ലിമിറ്റഡിന്റെ എംഡിയാണ്. ഓഖി ദുരന്തവുമായി ബന്ധപ്പെട്ട് സര്‍ക്കാരിനെ വിമര്‍ശിച്ചതിന് 2017 മുതല്‍ സസ്പെന്‍ഷനിലായിരുന്നു. പിന്നീട് കഴിഞ്ഞ വര്‍ഷം അവസാനമാണ് മെറ്റല്‍സ് ഇന്‍ഡസ്ട്രീസസ് ലിമിറ്റഡ് എംഡിയായി നിയമിച്ചത്. 2015ലാണ് ഡിജിപി പദവിയിലെത്തിയത്. ഏതായാലും കൊണ്ടും കൊടുത്തും കളത്തില്‍ നിറഞ്ഞ ജേക്കബ് തോമസ് അധികം വൈകാതെ പ്രതികരിക്കുമോ എന്നാണ് കേരളം കാത്തിരിക്കുന്നത്.
https://www.facebook.com/Malayalivartha
