കണ്ണൂര്‍ രാജ്യാന്തര വിമാനത്താവളത്തിന്റെ കുതിപ്പിന് ഇന്ധനമേകി ആദ്യ വലിയ വിമാനം ലാന്‍ഡ് ചെയ്തു. കുവൈത്ത് എയര്‍വെയ്‌സിന്റെ എയര്‍ ബസ് എ330-200 ചാര്‍ട്ടേഡ് വിമാനം ഇന്നലെ മട്ടന്നൂരിലിറങ്ങിയപ്പോള്‍ പിറന്നത് പുതുചരിത്രം. കണ്ണൂര്‍ രാജ്യാന്തര വിമാനത്താവളത്തിലെത്തുന്ന ആദ്യ വിദേശ വിമാനം, ആദ്യ വൈഡ് ബോഡി എയര്‍ക്രാഫ്റ്റ് എന്നീ രണ്ടു സവിശേഷതകള്‍ ഇന്നലത്തെ ലാന്‍ഡിങ്ങിനുണ്ട്. ഇന്നും നാളെയും എയര്‍ ഇന്ത്യയുടെ ബോയിങ് 777 വിമാനവും കണ്ണൂരിലെത്തും. ഫ്‌ലൈ ദുബായ്, സലാം എയര്‍ തുടങ്ങി കൂടുതല്‍ വിദേശ കമ്പനികള്‍ സര്‍വീസ് നടത്തുമെന്ന് അധികൃതര്‍ പറഞ്ഞു.

വൈഡ് ബോഡി വിമാനങ്ങള്‍ ഇറക്കാന്‍ സാധിക്കുന്ന തരത്തിലാണ് വിമാനത്താവളം ആരംഭിച്ചത്. കൂടുതല്‍ യാത്രക്കാര്‍, കൂടുതല്‍ കാര്‍ഗോ, ദീര്‍ഘദൂര യാത്രകള്‍ എന്നിവയാണ് വൈഡ് ബോഡി എയര്‍ക്രാഫ്റ്റിന്റെ മെച്ചങ്ങള്‍. എയര്‍ ഇന്ത്യ ബോയിങ് 777-ല്‍ 342 യാത്രക്കാര്‍ക്ക് കയറാനാകും.  3050 മീറ്റര്‍ നീളമുള്ള റണ്‍വേയില്‍ ഇത്തരം വിമാനം ഇറക്കിയിട്ടുണ്ട്. രാഷ്ട്രപതി കണ്ണൂരില്‍ എത്തിയപ്പോള്‍ സുരക്ഷാ വാഹനങ്ങള്‍ എത്തിക്കാന്‍ ഇതിന് മുന്‍പ് വലിയ വിമാനം ഇറങ്ങിയിട്ടുണ്ട്.

എല്ലാ സജ്ജീകരണങ്ങളോടും കൂടിയാണ് എയര്‍പോര്‍ട്ടിന്റെ പ്രവര്‍ത്തനം. കസ്റ്റംസ് അനുമതി ലഭിച്ചാല്‍ കാര്‍ഗോ സര്‍വീസിന്റെ കാര്യത്തിലുള്‍പ്പെടെ ഭാവിയില്‍ എയര്‍പോര്‍ട്ടിന് നേട്ടമാകുമെന്ന് കണ്ണൂര്‍ എയര്‍പോര്‍ട്ട് കമ്പനി മാനേജിങ്,ഡയറക്ടര്‍ വി.തുളസീദാസ് പറഞ്ഞു. കണ്ണൂര്‍ വിമാനത്താവളത്തിലെ പ്ലാന്റ് ക്വാറന്റീന്‍ സേവനങ്ങള്‍ക്ക് കൃഷിമന്ത്രാലയത്തിന്റെ അംഗീകാരം ലഭിച്ചിരുന്നു. ഇതോടെ പഴങ്ങളും പച്ചക്കറികളും പൂക്കളും ചെടികളും വിത്തും കയറ്റുമതി ചെയ്യാന്‍ സാധ്യത തെളിഞ്ഞു. കാര്‍ഗോ കോംപ്ലക്‌സ് പ്രവര്‍ത്തനം തുടങ്ങുന്നതോടെ ഇവയുടെ കയറ്റുമതിയും ഇറക്കുമതിയും സാധ്യമാവും. ജീവനോടെ മൃഗങ്ങളെയും മത്സ്യങ്ങളെയും കയറ്റി അയയ്ക്കുന്നതിനും ഇറക്കുമതി ചെയ്യുന്നതിനും ആനിമല്‍ ക്വാറന്റീന്‍ അനുവദിക്കുന്നതിനുള്ള അപേക്ഷയും നല്‍കിയിട്ടുണ്ട്. 1200 ചതുരശ്ര മീറ്റര്‍ വിസ്തൃതിയില്‍ 10,000 ടണ്‍ സംഭരണ ശേഷിയുള്ള കെട്ടിടമാണ് ഒരുങ്ങുന്നത്.

കോവിഡ് 19 പശ്ചാത്തലത്തില്‍ പ്രവാസികളെ നാട്ടിലെത്തിക്കുന്ന വന്ദേഭാരത് ദൗത്യത്തിന്റെ മൂന്നാം ഘട്ടത്തിന്റെ ഭാഗമായാണ് എയര്‍ ഇന്ത്യയുടെ ബോയിങ് 777 വിമാനങ്ങള്‍ ഇന്ന് കണ്ണൂരില്‍ ഇറങ്ങുന്നത്. ഇന്ന് ദമാമില്‍ നിന്നും നാളെ റിയാദില്‍ നിന്നുമാണ് 342 പേര്‍ക്ക് യാത്ര ചെയ്യാന്‍ കഴിയുന്ന വൈഡ് ബോഡി വിമാനം എത്തുക. മുംബൈയില്‍ നിന്ന് സൗദിയിലേക്ക് എത്തിച്ച വിമാനം ഇന്ന് വൈകിട്ട് 6.20-ന് ദമാമില്‍ എത്തി യാത്രക്കാരെ ഇറക്കിയതിന് ശേഷം 7.50ന് മുംബൈയിലേക്ക് തിരിക്കും. നാളെ വൈകിട്ട് 6.10-ന് റിയാദില്‍ നിന്ന് കണ്ണൂരില്‍ എത്തുന്ന വിമാനം തിരികെ 7.40-ന് മുംബൈയിലേക്ക് പോകും.

2700 മീറ്റര്‍ നീളമുള്ള വിമാനത്താവളത്തില്‍ വലിയ വിമാനങ്ങള്‍ സര്‍വീസ് നടത്തുന്നുണ്ട്. കണ്ണൂരില്‍ 3050 മീറ്റര്‍ റണ്‍വേയുണ്ട്. വലിയ വിമാനങ്ങള്‍ ഇറക്കുന്നതിനായി റണ്‍വേയുടെ വലിപ്പം കൂട്ടാന്‍ സ്ഥലം ഏറ്റെടുക്കുന്ന ജോലികള്‍, വിമാനം പാര്‍ക്ക് ചെയ്യുന്നതിന് ഏപ്രണ്‍ വിപുലീകരണം പുരോഗമിക്കുന്നുണ്ട്.

എയര്‍ ഇന്ത്യ ബോയിങ് 777 (300 ഇആര്‍)

സീറ്റുകളുടെ എണ്ണം- 342, ചിറകുകളുടെ വീതി - 64.8 മീറ്റര്‍, നീളം- 73.85 മീറ്റര്‍, ഉയരം - 18.7 മീറ്റര്‍, പരമാവധി പറക്കാവുന്ന ഉയരം- 13,136 മീറ്റര്‍, ടേക്ക് ഓഫ് സമയത്ത്
വഹിക്കാവുന്ന പരമാവധി ഭാരം- 351 .5 ടണ്‍

വിമാനത്താവളം പ്രവര്‍ത്തനം തുടങ്ങിയത്. 2018 ഡിസംബര്‍ 9, റണ്‍വേയുടെ നീളം: 3050 മീറ്റര്‍ (4000 ആയി ഉയര്‍ത്തും), റണ്‍വേകളുടെ എണ്ണം 2
ഏപ്രണില്‍ 20 വിമാനങ്ങള്‍ ഒരേ സമയം പാര്‍ക്ക് ചെയ്യാം. (40 ആയി ഉയര്‍ത്തുന്നു), പ്രവര്‍ത്തനം തുടങ്ങി 9 മാസം കൊണ്ട് 10 ലക്ഷം യാത്രക്കാര്‍.
ഒരു വര്‍ഷത്തിനുള്ളില്‍ പ്രതിദിനം 50 എയര്‍ ക്രാഫ്റ്റ് മൂവ്‌മെന്റ്, ഏത് കാലാവസ്ഥയിലും വിമാനം ഇറങ്ങാന്‍ സഹായിക്കുന്ന ഇന്‍സ്ട്രുമെന്റ് ലാന്‍ഡിങ് സിസ്റ്റം സംവിധാനം.കാര്‍ഗോ കെട്ടിടം ഉടന്‍ പ്രവര്‍ത്തനം ആരംഭിക്കും (രാജ്യാന്തര കാര്‍ഗോ നിര്‍മാണത്തില്‍).