ലോക നേതാക്കൾക്കൊപ്പം തലയെടുപ്പോടെ കേരളത്തിന്റെ ടീച്ചറമ്മയും. കൊവിഡ് പ്രതിരോധ പ്രവർത്തനങ്ങളുടെ പേരിൽ കേരളത്തിന് ഐക്യരാഷ്ട്ര സഭയുടെ ആദരം. ലോക നേതാക്കൾക്കൊപ്പം ഐക്യരാഷ്ട്ര സഭയുടെ വെബിനാറിൽ ആരോഗ്യമന്ത്രി കെ കെ ശൈലജ പങ്കെടുക്കും. ന്യൂയോർക്ക് ​ഗവർണർ, ലോകാരോ​ഗ്യ സംഘടന ഡയറക്ടർ ജനറൽ, യുഎൻ സെക്രട്ടറി ജനറൽ എന്നിവർക്കൊപ്പമാണ് കെ കെ ശൈലജ വെബിനാറിൽ പങ്കെടുക്കുക.

ലോക പൊതുപ്രവർത്തക ദിനമായ ഇന്നാണ് കോവിഡ് പ്രതിരോധത്തിൽ മുന്നണിപ്പോരാളികളായവരെ ഐക്യരാഷ്ട്ര സഭ ആദരിക്കുന്നത്. ഇന്ത്യൻ സമയം ആറരയ്ക്കാണ് വെബിനാർ. യു.എൻ സാമ്പത്തിക - സാമൂഹ്യകാര്യ വിഭാഗമാണ് ചടങ്ങ് സംഘടിപ്പിക്കുന്നത്.

കൊവിഡിന് 19 നെതിരായ കേരളത്തിന്റെ പ്രതിരോധ പ്രവര്‍ത്തനങ്ങൾ അന്താരാഷ്ട്ര തലത്തിൽ വളരെയധികം ചർച്ചയായിരുന്നു. നിരവധി മാധ്യമങ്ങളാണ് കേരളത്തിന്റെ കൊവിഡ് പ്രതിരോധ പ്രവർത്തനങ്ങളെയും ആരോ​ഗ്യമന്ത്രി കെ കെ ശൈലജയെയും പ്രശംസിച്ച് ലേഖനങ്ങൾ പ്രസിദ്ധീകരിച്ചത്. ബിബിസി ചാനലിൽ തത്സമയ പരിപാടിയിൽ ആരോ​ഗ്യമന്ത്രി അതിഥിയായി എത്തുകയും ചെയ്തിരുന്നു. കേരളത്തിന്റെ കൊവി‍ഡ് പ്രവർത്തനങ്ങൾ മന്ത്രി തത്സമയം വിശദീകരിച്ചതും വലിയ ചർച്ചയായിരുന്നു. പ്രതിരോധപ്രവർത്തനങ്ങളുടെ ചിത്രങ്ങളും വിഡിയോകളും ചര്‍ച്ചയായ പരിപാടിയില്‍ ആർദ്രം പദ്ധതിയെ കുറിച്ചും പ്രാഥമികാരോഗ്യകേന്ദ്രങ്ങളെ കുറിച്ചും മന്ത്രി വിശദീകരിച്ചു. ബിബിസി വേള്‍ഡ് ന്യൂസ് വിഭാഗത്തിലാണ് കൊവിഡ് പ്രതിരോധത്തിലെ കേരള മോഡല്‍ ചര്‍ച്ചയായത്.

തൽസമയ ചർച്ചയുടെ വിഡിയോ സമൂഹമാധ്യമങ്ങളിലും വൈറലായി. വൈറസ് സ്ഥിരീകരിച്ച ആദ്യഘട്ടത്തില്‍ തന്നെ കൃത്യമായ നിര്‍ദേശങ്ങള്‍ നല്‍കി പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി. വിവിധയിടങ്ങളില്‍ നിന്നും എത്തിയവരെ പരിശോധിച്ചതിനൊപ്പം രോഗലക്ഷണങ്ങള്‍ ഉള്ളവരെ ഐസലേറ്റ് ചെയ്തു. രോഗികള്‍ക്കുമേല്‍ ആരോഗ്യപ്രവര്‍ത്തകരുടെ കൃത്യമായ നിരീക്ഷണം ഏര്‍പ്പെടുത്തി തുടങ്ങിയ പ്രതിരോധ പ്രവര്‍ത്തനങ്ങള്‍ കെ കെ ശൈലജ അന്ന് വിശദീകരിച്ചിരുന്നു. നിരവധി അന്തർദേശീയ മാസികകളാണ് കെ കെ ശൈലജയെ അഭിനന്ദിച്ച് കവർ സ്റ്റോറി പ്രസിദ്ധീകരിച്ചത്.

ലോറ ‘ദി ഗാര്‍ഡിയന്‍’ ദിനപത്രത്തില്‍ ആരോഗ്യമന്ത്രിയെ കേരളത്തിന്റെ ‘റോക്ക് സ്റ്റാര്‍’ എന്ന് വിശേഷിപ്പിച്ച് മെയ് 14-ന് ലേഖനം എഴുതിയിരുന്നു. ലോറ മന്ത്രിയെ ‘റോക്ക് ഡാന്‍സര്‍’ എന്ന് വിളിച്ചുവെന്ന് മുല്ലപ്പള്ളി രാമചന്ദ്രന്‍ പ്രസ്താവിച്ചിരുന്നു. കൂടാതെ, കേരള സര്‍ക്കാരിനു വേണ്ടി പിആര്‍ ജോലി ചെയ്യുകയായിരുന്നു ലോറയെന്നും അദ്ദേഹം ആരോപിച്ചിരുന്നു. എന്നാല്‍ വാര്‍ത്തയെ രാഷ്ട്രീയവല്‍ക്കരിക്കണമെങ്കില്‍ അത് മുല്ലപ്പള്ളിയുടെ അവകാശമാണെന്ന മറുപടിയാണ് ലോറ ട്വീ റ്റില്‍ നൽകിയത്. കൂടാതെ, മന്ത്രിയെ റോക്ക്സ്റ്റാര്‍ എന്ന് വിശേഷിപ്പിച്ചത് താനല്ല എന്നും മറ്റുള്ളവരുടെ വിശേഷണം റിപ്പോര്‍ട്ടില്‍ ഉപയോഗിച്ചത് ആണ് എന്നും അവര്‍ പറഞ്ഞു. നിപാ വൈറസിനെ മന്ത്രി വിജയകരമായി കൈകാര്യം ചെയ്തത് ഒരു സിനിമയ്ക്കും വിഷയമായി എന്നും അവര്‍ കൂട്ടിച്ചേര്‍ത്തു.

വെള്ളിയാഴ്ച്ച മുല്ലപ്പള്ളി ആരോഗ്യമന്ത്രിയെ നിപാ രാജകുമാരിയെന്നും കോവിഡ് റാണിയെന്നും വിളിച്ചിരുന്നു. ഇതിനെ തുടര്‍ന്നുണ്ടായ വിമര്‍ശനത്തില്‍ വിശദീകരണവുമായി എത്തിയപ്പോഴാണ് ഗാര്‍ഡിയന്‍ പത്രം ശൈലജയെ റോക്ക്ഡാന്‍സര്‍ എന്ന് വിശേഷിപ്പിച്ചതിനെ കുറിച്ച് കെപിസിസി പ്രസിഡന്റ് പറഞ്ഞത്. എന്നാല്‍ ചടുലമായ നീക്കങ്ങള്‍ നടത്തിയെന്ന അര്‍ത്ഥത്തിലാണ് ആ വാക്ക് പ്രയോഗിച്ചിരിക്കുന്നതെന്ന് മാധ്യമ പ്രവര്‍ത്തകര്‍ ചൂണ്ടിക്കാണിച്ചുവെങ്കിലും അദ്ദേഹം ഗാര്‍ഡിയന്‍ ചെയ്തത് പിആര്‍ ജോലിയാണെന്നും വിശേഷിപ്പിച്ചു. നിപാ രോഗത്തിന്റെ പിടിയില്‍ നിന്നും കേരളത്തെ രക്ഷിച്ചതിന്റെ ക്രഡിറ്റ് ആരോഗ്യ പ്രവര്‍ത്തകര്‍ക്കുള്ളതാണെന്നും അത് ആരോഗ്യമന്ത്രിക്കുള്ളതല്ലെന്നുമാണ് മുല്ലപ്പള്ളിയുടെ വാദം. ഈ വാദങ്ങളൊക്കെ കൊഴുക്കുന്ന അവസരത്തിലാണ് ഐക്യരാഷ്ട്ര സഭയുടെ ആദരം തേടിയെത്തിയത് എന്നത് കേരളത്തെ സംബന്ധിച്ച് ഏറെ അഭിമാന കരമായ നിമിഷം തന്നെയാണ്.