വാരിയംകുന്നത്ത്​ കുഞ്ഞഹമ്മദ്​ ഹാജി ധീരനായ ബ്രിട്ടീഷ്​ വിരുദ്ധ പടനായകനായിരുന്നെന്ന്​ മുഖ്യമന്ത്രി പിണറായി വിജയൻ. വാരിയംകുന്നത്തിനെ എല്ലാ കാലത്തും കേരളം ആദരിച്ചിട്ടുണ്ടെന്നും മുഖ്യമന്ത്രി വ്യക്തമാക്കി. വാർത്താ സമ്മേളനത്തിൽ മാധ്യമപ്രവർത്തകരുടെ ചോദ്യത്തിന്​ മറുപടി പറയുകയായിരുന്നു അദ്ദേഹം.

വാരിയംകുന്നത്തിൻെറ ജീവിതകഥ ആസ്​പദമാക്കി പുതിയ സിനിമ ചിത്രീകരിക്കുന്നതുമായി ബന്ധപ്പെട്ടുയർന്ന വിവാദത്തിൽ മുഖ്യമന്ത്രിയുടെ ​പ്രതികരണം തേടിയതായിരുന്നു മാധ്യമപ്രവർത്തകർ. വിവാദം ശ്രദ്ധയിൽ പെട്ടിട്ടില്ലെന്നും എന്നാൽ, നമ്മുടെ നാട്ടിൽ ബ്രിട്ടീഷ്​ സാമ്രാജ്യത്തിനെതിരെ പടപൊരുതിയ ധീരനായിരുന്നു വാരിയംകുന്നത്തെന്നും​ മുഖ്യമന്ത്രി പറഞ്ഞു.

നടൻ പൃഥ്വിരാജ്​ -സംവിധായകൻ ആഷിക്​ അബു ടീമാണ്​ വാരിയംകുന്നൻ എന്ന പേരിൽ സിനിമ വരുന്നതായി കഴിഞ്ഞ ദിവസം പ്രഖ്യാപിച്ചത്​. ഇതിനെതിരെ കടുത്ത സൈബർ ആക്രമണമാണ്​ സംഘപരിവാർ അണികളിൽ നിന്നുണ്ടായത്​. മുസ്​ലിം വർഗീയകലാപത്തെ വെള്ളപൂശാനുള്ള ശ്രമമാണ്​ എന്നായിരുന്നു സംഘ പരിവാർ ഉയർത്തിയ വിമർശനം.