വർഷങ്ങളായി തുടർന്ന പീഡനം പുറത്താകുമെന്നായപ്പോൾ പെണ്‍കുട്ടികളുടെ ആത്മഹത്യാശ്രമം. മുണ്ടക്കയത്ത് രണ്ടു പെൺകുട്ടികൾ ആറ്റിൽ ചാടി ആത്മഹത്യയ്ക്കു ശ്രമിച്ച സംഭവത്തിൽ വൻ വഴിത്തിരിവ്. വര്ഷങ്ങളായി തുടർന്ന പീഡനം പുറത്തറിയുമെന്ന സാഹചര്യത്തിലാണ് ഇരുവരും ആത്മഹത്യയ്ക്ക് ശ്രമിച്ചതെന്നാണ് പൊലീസ് കണ്ടെത്തൽ. ഇതിൽ ഒരു പെൺകുട്ടിയുടെ മൊഴിയുടെ അടിസ്ഥാനത്തിൽ മുണ്ടക്കയം, എരുമേലി സ്വദേശികളായ മഹേഷ്, അനന്തു, രാഹുൽ രാജ് എന്നിവരെ പൊലീസ് അറസ്റ്റു ചെയ്തു. ഒരാൾ കൂടി അറസ്റ്റിലാകാനുണ്ട്. 2016 മുതൽ പീഡനം നടക്കുന്നതായാണ് പ്രാഥമിക വിവരം. പാഞ്ചാലിമേട്, മുണ്ടക്കയം എന്നിവിടങ്ങളിൽ വീടുകളിലും മറ്റുമായി നാല് പേർ ആദ്യ പെൺകുട്ടിയെ പീഡിപ്പിച്ചിരുന്നെന്നാണ് സൂചന.

പെൺകുട്ടികളുടെ സ്വകാര്യ ഭാഗങ്ങൾ മൊബൈൽ ഫോണിൽ പകർത്തിയ ശേഷമാണ് പ്രതികൾ ഭീഷണിപ്പെടുത്തിയിരുന്നു. 2016 മുതൽ മൂന്നു പ്രതികൾ പെൺകുട്ടികളെ പീഡിപ്പിച്ചു വരികയായിരുന്നുവെന്നാണ് കണ്ടെത്തിയിരിക്കുന്നത്. നിലവിൽ പെൺകുട്ടികൾക്കു രണ്ടു പേർക്കും പതിനഞ്ചു വയസുമാത്രമാണ് പ്രായം.

സ്‌കൂളിൽ പഠിക്കുന്ന പെൺകുട്ടികളെ മഹേഷാണ് ആദ്യം പരിചയപ്പെട്ടത്. തുടർന്നു, ഇയാൾ ഇരുവരെയും ലൈംഗികമായി പീഡിപ്പിച്ചു. തുടർന്നു പ്രതിയായ മഹേഷ് പെൺകുട്ടികളുടെ അശ്ലീല ചിത്രങ്ങൾ സുഹൃത്തുക്കൾക്കു കൈമാറി. തുടർന്നു, ഈ അശ്ലീല ചിത്രങ്ങൾ ഉപയോഗിച്ചു സുഹൃത്തുക്കളും മറ്റുള്ള പ്രതികളും ചേർന്നു പെൺകുട്ടികളെ പല തവ പല സ്ഥലങ്ങളിൽ എത്തിച്ചു ലൈംഗികമായി പീഡിപ്പിച്ചു.

തിങ്കളാഴ്ചയാണ് ഒരു പതിനഞ്ചുകാരിയും സുഹൃത്തും വിഷം കഴിച്ച ശേഷം മണിമലയാറ്റിൽ ചാടി ജീവനൊടുക്കാൻ ശ്രമിച്ചത്. ഇവരെ നാട്ടുകാർ രക്ഷപ്പെടുത്തി. ആദ്യം ടിക്ക് ടോക്ക് വീഡിയോ ചെയ്തതിൽ വീട്ടുകാർ വഴക്കു പറയുമെന്നു ഭയന്നാണ് ആത്മഹത്യയ്ക്ക് ഒരുങ്ങിയതെന്നായിരുന്നു പെൺകുട്ടികൾ പൊലീസിനു നൽകിയ മൊഴി. ഇവരുടെ മൊഴിയിൽ സംശയം തോന്നിയ പൊലീസ് സംഘം പെൺകുട്ടികളെ മെഡിക്കൽ കോളേജ് ആശുപത്രിയിൽ എത്തിച്ചു വൈദ്യ പരിശോധനയ്ക്കു വിധേയനാക്കി. ഇതോടെയാണ് പെൺകുട്ടി പീഡനത്തിന് ഇരയായതായി കണ്ടെത്തിയത്. മൊബൈൽ ഫോൺ വാങ്ങി ശബ്ദ സന്ദേശങ്ങളടക്കം പരിശോധിച്ചപ്പോൾ ചില ആൺകുട്ടികളുമായുള്ള ബന്ധം പൊലീസ് കണ്ടെത്തി. വൈദ്യപരിശോധന നടത്തിയപ്പോൾ പീഡനം നടന്നതായി സ്ഥിരീകരിക്കുകയും ചെയ്തു.

തുടർന്ന് ഒരു പെൺകുട്ടിയെ വിളിച്ചു വരുത്തി വിശദമായി ചോദ്യം ചെയ്യുകയായിരുന്നു. അറസ്റ്റിലായവർ അടക്കം നാലുപേർ കഴിഞ്ഞ ഒരു വർഷത്തിനിടെ പലയിടങ്ങളിലും എത്തിച്ച് പീഡിപ്പിക്കുകയായിരുന്നു. ഇത് പുറത്തറിയുമെന്നു ഭയന്നാണ് ആത്മഹത്യയ്ക്കു ശ്രമിച്ചത്. പെൺകുട്ടികളുടെ ആരോഗ്യനില ഇപ്പോൾ തൃപ്തികരമാണ്. നാലാമത്തെ പ്രതിക്കായി പൊലീസ് തിരച്ചിൽ നടത്തുന്നുണ്ട്.