നടുവത്തൂര്‍ പ്രദേശം ആനപ്പാറയിലെ ഖനനം മൂലം കുലുങ്ങുന്നു, വീടിന്റെ ചുമരുകള്‍ക്ക് വിള്ളല്‍
കോഴിക്കോട് ജില്ലയില്‍ മേപ്പയൂര്‍ കീഴരിയൂരിലെ നടുവത്തൂര്‍ ശിവക്ഷേത്രത്തിനു സമീപം പ്രവര്‍ത്തിക്കുന്ന കരിങ്കല്‍ ക്വാറി പ്രദേശവാസികള്‍ക്കു ഭീഷണിയാവുന്നു. പാറ പൊട്ടിക്കുമ്പോഴുണ്ടാവുന്ന സ്‌ഫോടനത്തെ തുടര്‍ന്നു 7 വീടുകളുടെ ചുമരുകള്‍ക്ക് വിള്ളലുണ്ടായെന്നു പരിസ്ഥിതി പ്രവര്‍ത്തകന്‍ പഴയന ഉദ്യാനം ബാബു റവന്യു മന്ത്രിക്കും കലക്ടര്‍ക്കും പരാതി നല്‍കി.
കീഴരിയൂര്‍ പഞ്ചായത്തിലെ നാലാം വാര്‍ഡിലെ കരിങ്കല്‍പ്പാറ പകുതിയിലേറെ പൊട്ടിച്ചു കഴിഞ്ഞു. മണ്ണിനടിയിലെ പാറ പൊട്ടിക്കാനും തുടങ്ങി. ഇതിനായി മുകള്‍ത്തട്ടിലെ മണ്ണുമാറ്റി ഖനനം തുടങ്ങി. വര്‍ഷങ്ങളായി നടക്കുന്ന ഖനനം പ്രദേശത്തിന്റെ പരിസ്ഥിതി സന്തുലിതാവസ്ഥയെ ബാധിച്ചിട്ടുണ്ട്. പ്രദേശത്തെ ഒരിക്കലും വറ്റാത്ത കിണറുകള്‍ കഴിഞ്ഞ വര്‍ഷം വേനലിനു മുന്‍പേ വറ്റി.
ഒരു സുരക്ഷാ മാനദണ്ഡവും പാലിക്കാതെയാണ് ക്വാറി പ്രവര്‍ത്തിക്കുന്നതെന്ന് ക്വാറിക്ക് സമീപം പ്രവര്‍ത്തിക്കുന്ന അങ്കണവാടിയിലെ കുട്ടികളുടെ രക്ഷിതാക്കള്‍ ആരോപിച്ചു. എംഎല്‍എ ഫണ്ട് ഉപയോഗിച്ചു പണിത നടുവത്തൂര്‍ ശിവക്ഷേത്രം കുറുമയില്‍ താഴ റോഡ് തകരാനും കാരണം ക്വാറിയാണെന്നു നാട്ടുകാര്‍ പറഞ്ഞു. ക്വാറിയില്‍ നടക്കുന്നത് അനധികൃത ഖനനമാണെന്ന് ആരോപിച്ച് നാട്ടുകാര്‍ ചേര്‍ന്നു കര്‍മസമിതി രൂപീകരിച്ചു.
https://www.facebook.com/Malayalivartha
