സംസ്ഥാനത്തെ ഏറ്റവും മികച്ച പൊലീസ് സ്റ്റേഷന്‍ ഒല്ലൂര്‍ സ്റ്റേഷന്‍, ഒറ്റവര്‍ഷം കൊണ്ടു തീര്‍പ്പാക്കിയത് 5 വര്‍ഷമായി കെട്ടിക്കിടന്ന കേസ് ഫയലുകള്‍
സംസ്ഥാനത്തെ ഏറ്റവും മികച്ച പൊലീസ് സ്റ്റേഷന്‍ എന്ന ബഹുമതിക്ക് തൃശ്ശൂര്‍ ജില്ലയിലെ ഒല്ലൂര്‍ സ്റ്റേഷന്‍ അര്‍ഹമായി. കേന്ദ്ര ആഭ്യന്തര മന്ത്രാലയമാണ് സ്റ്റേഷന്‍ ഹൗസ് ഒഫിസര്‍ ബെന്നി ജേക്കബിന്റെ നേതൃത്വത്തിലുള്ള 40 പൊലീസുകാരുടെ കൂട്ടായ പ്രവര്‍ത്തനം വിലയിരുത്തി ഒന്നാം സ്ഥാനം നിര്‍ണയിച്ചത്.
ജനമൈത്രി പൊലീസ് നടപടികള്‍, പ്രളയകാലത്തെ പ്രവര്‍ത്തനങ്ങള്‍, ക്രമസമാധാനപാലനം, ലഹരിമരുന്നുവേട്ട, എക്‌സൈസ് നിയമവും ആയുധനിയവും അനുസരിച്ചുളള നടപടികള്‍, വാറന്റ് നടപ്പാക്കല്‍, കരുതല്‍ നടപടികള്‍, പഴയ കേസുകളിന്മേലുളള നടപടികള്‍, ശിക്ഷാവിധികള്‍ എന്നിങ്ങനെ വിവിധ ഘടകങ്ങള്‍ അടിസ്ഥാനമാക്കിയുളള വിലയിരുത്തലിനു ശേഷമാണ് പുരസ്‌കാരം നിര്‍ണയിച്ചത്. കഴിഞ്ഞ 5 വര്‍ഷമായി കെട്ടിക്കിടന്ന കേസ് ഫയലുകള്‍ ഒറ്റവര്‍ഷം കൊണ്ടു തീര്‍പ്പാക്കിയിരുന്നു.
1961-ല്‍ ആണ് ഔട്ട് പോസ്റ്റ് ആയി ഒല്ലൂരില്‍ പൊലീസ് സേവനം ആരംഭിച്ചത്. 1980-ല്‍ പൊലീസ് സ്റ്റേഷനായി. 1987-ല്‍ പുതിയ കെട്ടിടത്തിലേക്കു മാറി.കമ്മിഷണര്‍ ആര്‍. ആദിത്യ, എസിപി വി.കെ. രാജു എന്നിവര്‍ സ്റ്റേഷനിലെത്തി അഭിനന്ദനം അറിയിച്ചു.
പാസ്‌പോര്‍ട്ട്, ആയുധം എന്നിവ അനുവദിക്കുന്നതിനുളള പരിശോധന, റോഡ് നിയമങ്ങള്‍, ക്രൈം കേസുകള്‍, ക്രമസമാധാന മേഖലയിലെ പ്രവര്‍ത്തനങ്ങള്‍, ദുര്‍ബല വിഭാഗങ്ങള്‍ക്കെതിരായ അതിക്രമങ്ങള്‍ തടയല്‍ എന്നിവയും അവാര്‍ഡ് നിര്‍ണയത്തിന് മാനദണ്ഡങ്ങളായി.
https://www.facebook.com/Malayalivartha
