കൊവിഡിന്റെ മറവില്‍ സംസ്ഥാനത്ത് വന്‍ അഴിമതി; ആരോപണവുമായി പ്രതിപക്ഷനേതാവ് രമേശ് ചെന്നിത്തല
കൊവിഡിന്റെ മറവില്‍ സംസ്ഥാനത്ത് വന്‍ അഴിമതി നടക്കുന്നതായി പ്രതിപക്ഷനേതാവ് രമേശ് ചെന്നിത്തല. 4500 കോടി രൂപ മുടക്കി മൂവായിരം ഇലക്‌ട്രിസിറ്റി ബസ് വാങ്ങാനുള്ള സര്‍ക്കാരിന്റെ ഇ-മൊബിലിറ്റി പദ്ധതിക്കായി കണ്‍സള്‍ട്ടന്‍സി ഏല്‍പ്പിച്ചത് ലണ്ടന്‍ ആസ്ഥാനമായ പ്രൈസ് വാട്ടര്‍ ഹൗസ് കൂപ്പര്‍ കണ്‍സള്‍ട്ടന്റ് എന്ന കമ്ബനിക്കാണ് . രണ്ട് വര്‍ഷത്തേക്ക് സെബി നിരോധിച്ച കമ്ബനിയാണിതെന്നും ചെന്നിത്തല ആരോപിച്ചു
മുഖ്യമന്ത്രി നേരിട്ടാണ് കണ്‍സള്‍ട്ടന്‍സിക്കായി കരാര്‍ ഏല്‍പ്പിച്ചത്. സത്യം കുംഭകോണം ഉള്‍പ്പെടെ ഒമ്ബത് കേസുകളാണ് ഈ കമ്ബനി നേരിടുന്നത്. ടെന്‍ഡര്‍ വിളിക്കാതെയാണ് കമ്ബനിക്ക് കരാര്‍ ഏല്‍പ്പിച്ചത്. 2017 മുതല്‍ കേരളം കമ്ബനിക്ക് കരാര്‍ നല്‍കുന്നു. കമ്ബനിക്ക് കരാര്‍ നല്‍കിയതില്‍ സെക്രട്ടറിയേറ്റ് മാന്വല്‍ പാലിച്ചിട്ടില്ല. ഈ കമ്ബനിക്ക് കരാര്‍ നല്‍കിയത് ഗതാഗത വകുപ്പ് മന്ത്രി അറിഞ്ഞാണോയെന്ന് വ്യക്തമാക്കണം. കരാറിന് കൂട്ടു നിന്നവര്‍ക്കെതിരെ സര്‍ക്കാര്‍ നടപടി എടുക്കണം. മുഖ്യമന്ത്രി നേരിട്ട് ഇടപെട്ട് എന്തിനാണ് ഈ കരാര്‍ കമ്ബനിക്ക് നല്‍കിയതെന്ന് സര്‍ക്കാര്‍ വ്യക്തമാക്കണം. കെ.പി.എം.ജിക്കെതിരെ ഉന്നയിച്ച അഴിമതി ആരോപണത്തില്‍ ഉറച്ച്‌ നില്‍ക്കുന്നു. സമാനമായ അഴിമതിയാണ് സ്പ്രിന്‍ക്ലറിലും ഉണ്ടായതെന്നും ചെന്നിത്തല പറഞ്ഞു. ജസ്റ്റിസ് എ.പി ഷാ കമ്ബനിക്കെതിരെ മുഖ്യമന്ത്രിക്ക് കത്ത് അയച്ചിരുന്നു. നിയമങ്ങളേയും ചട്ടങ്ങളേയും കാറ്റില്‍പറത്തി ക്യാബിനറ്റ് പോലുമറിയാതെയാണ് കരാര്‍ നല്‍കിയിരിക്കുന്നതെന്നും പ്രതിപക്ഷനേതാവ് പറഞ്ഞു.
ലണ്ടന്‍ കമ്ബനിയോട് കമ്മ്യൂണിസ്റ്റ് മുഖ്യമന്ത്രിക്ക് എന്താണ് താത്പര്യമെന്ന് വ്യക്തമാക്കണം. സാങ്കേതിക സര്‍വകലാശാലയിലെ പരീക്ഷകള്‍ മാറ്റിവയ്ക്കണമെന്ന് ആവശ്യപ്പെട്ട് ഉന്നതവിദ്യാഭ്യാസമന്ത്രിക്ക് കത്തയയ്ക്കും. തോട്ടപ്പള്ളിയിലെ സമരത്തെ ആക്ഷേപിക്കുന്ന തരത്തിലാണ് ഇ.പി ജയരാജന്‍ പ്രസ്താവന നടത്തിയത്. ജയരാജന്‍ പ്രസ്താവന പിന്‍വലിച്ച്‌ ജനങ്ങളോട് മാപ്പ് പറയണമെന്നും ചെന്നിത്തല ആവശ്യപ്പെട്ടു.
കേരളകോണ്‍ഗ്രസ് തര്‍‌ക്കത്തില്‍ അന്തിമ തീരുമാനം യു.ഡി.എഫ് നാളെയെടുക്കും. യു.ഡി.എഫ് നിര്‍ദേശം എന്താണെന്ന് കണ്‍വീനര്‍ ബെന്നിബഹനാന്‍ ജോസ് വിഭാഗത്തെ അറിയിച്ചിട്ടുണ്ട്. പക്ഷെ തീരുമാനം ഇതുവരെ അവര്‍ പാലിച്ചിട്ടില്ലെന്നും രമേശ് ചെന്നിത്തല വ്യക്തമാക്കി.
https://www.facebook.com/Malayalivartha
