കേരളം മുഴുവന്‍ ഒരിക്കല്‍ കലാപക്കൊടി ഉയര്‍ത്തിയ തീരുമാനമായിരുന്നു ശബരിമലയിലെ സ്ത്രീപ്രവേശനം.ആചാര ലംഘനമെന്ന് ഒരു കൂട്ടരും അവകാശമെന്ന് മറുകൂട്ടരും വാദിച്ചു. ഒടുവില്‍ ശബരിമലയില്‍ ആ ചരിത്ര സംഭവം നടന്നു. കനക ദുര്‍ഗ,ബിന്ദു അമ്മിണി എന്നീ രണ്ടുസ്ത്രീകള്‍ ശബരിമലയില്‍ ദര്‍ശനം നടത്തി. അതിനെത്തുടര്‍ന്നുണ്ടായ കോലാഹലങ്ങള്‍ കെട്ടടങ്ങിയിട്ടുമില്ല. ഇപ്പോഴും പല കോണിലും അതിന്റെ പ്രതിഫലനങ്ങള്‍ ഉയരുന്നുണ്ട്.

ഇപ്പോഴിതാ ശബരിമല കയറിയ മലപ്പുറം അങ്ങാടിപ്പുറം സ്വദേശി കനക ദുര്‍ഗ വിവാഹ മോചിതയായി എന്ന വാര്‍ത്തയാണ് പുലര്‍ത്തുവരുന്നത് . ശബരിമല കയറിയതുമായി ബന്ധപെട്ട് ഭര്‍ത്താവുമായുണ്ടായ തര്‍ക്കമാണ് വിവാഹ മോചനത്തില്‍ കലാശിച്ചത്. കഴിഞ്ഞ വ്യാഴാഴ്ചയാണ് കനക ദുര്‍ഗ വിവാഹ മോചിതയായത്. ശബരിമലയില്‍ ദര്‍ശനം നടത്തിയതുമായി ബന്ധപെട്ടാണ് ഭര്‍ത്താവ് കൃഷ്ണനുണ്ണിയുമായി അഭിപ്രായ വ്യത്യാസമുണ്ടായതെന്ന് കനക ദുര്‍ഗപറഞ്ഞു. അഭിഭാഷകര്‍ മുഖേനയുണ്ടാക്കിയ ഒത്തുതീര്‍പ്പ് പ്രകാരം പരസ്പര ധാരണയിലായിരുന്നു വിവാഹ മോചനം.

പ്രായഭേദമന്യേ സ്ത്രീകള്‍ക്ക് ശബരിമലയില്‍ പ്രവേശനം അനുവദിച്ച് കൊണ്ടുള്ള സുപ്രീം കോടതി വിധിയ്ക്ക് പിന്നാലെയാണ് കനക ദുര്‍ഗ ശബരിമലയില്‍ പ്രവേശിച്ചത് . ശബരിമല പ്രവേശനത്തോടെ വഴിവെച്ച വിവാദങ്ങള്‍ ഒടുവില്‍ വിവാഹ മോചനത്തില്‍ കലാശിച്ചു .മല കയറിയ പിന്നാലെ തങ്ങള്‍ അറിയാതെയാണ് കനക ദുര്‍ഗ വീട്ടില്‍ നിന്നും പോയതെന്നാരോപിച്ച് ഇവരുടെ ഭര്‍ത്താവ് രംഗത്തെത്തിയിരുന്നു. ഇതിന് പിന്നാലെ ഇവരെ വീട്ടില്‍ നിന്നും പുറത്താക്കുകയും ചെയ്തിരുന്നു.സുപ്രീം കോടതി വിധിയ്ക്ക് പിന്നാലെ 2019 ജനുവരി രണ്ടിനായിരുന്നു പെരിന്തല്‍മണ്ണയില്‍ നിന്നുള്ള കനക ദുര്‍ഗയും, കൊയിലാണ്ടിയില്‍ നിന്നുള്ള ബിന്ദുഅമ്മിണിയും ശബരിമലയില്‍ സന്ദര്‍ശനം നടത്തിയത്. പുലര്‍ച്ചയോടെ പോലീസ് സംരക്ഷണത്തില്‍ ഇവര്‍ ദര്‍ശനം നടത്തി മടങ്ങുകയായിരുന്നു. സംഭവം വലിയ വിവാദത്തിനാണ് വഴിവെച്ചത്.
തിരുവനന്തപുരത്ത് സപ്ലൈകോയുടെ യോഗത്തിന് പോകുകയാണ് എന്ന് പറഞ്ഞ് കൊണ്ടായിരുന്നു വീട്ടില്‍ നിന്ന് പോയതെന്നും മാധ്യമങ്ങളില്‍ വാര്‍ത്ത വന്നപ്പോള്‍ മാത്രമാണ് സംഭവം തങ്ങള്‍ അറിഞ്ഞതെന്നുമായിരുന്നു ഇവരുടെ വീട്ടുകാര്‍ അന്ന് വ്യക്തമാക്കിയത്. ദര്‍ശനത്തിന് പിന്നാലെ ഇവര്‍ക്കെതിരെ സംഘപരിവാര്‍ ഭീഷണി ഉയര്‍ത്തിയിരുന്നു.

തുടര്‍ന്ന് ദിവസങ്ങളോളം ഒളിവില്‍ കഴിഞ്ഞ ശേഷമായിരുന്നു കനക ദുര്‍ഗ വീട്ടിലേക്ക് മടങ്ങിയത്. എന്നാല്‍ വീട്ടിലെത്തിയതോടെ ഭര്‍ത്താവിന്റെ അമ്മ സ്മൃതിയും കനക ദുര്‍ഗയും തമ്മില്‍ സംഘര്‍ഷം ഉടലെടുത്തു. ഇതില്‍ ഇരുവര്‍ക്കും പരിക്കേല്‍ക്കുകയും ചികിത്സ തേടുകയും ചെയ്തിരുന്നു.


തുടര്‍ന്ന് പോലീസ് സ്റ്റേഷനില്‍ വെച്ച് കനകദുര്‍ഗയുടെ ഭര്‍ത്താവുമായി ചര്‍ച്ച നടത്തിയെങ്കിലും കനകദുര്‍ഗയെ വീട്ടില്‍ പ്രവേശിപ്പിക്കാന്‍ ആകില്ലെന്ന നിലപാടിലായിരുന്നു ഭര്‍ത്താവ്. തുടര്‍ന്ന് കോടതി ഉത്തരവിന്റെ പിന്‍ബലത്തിലാണ് കനകദുര്‍ഗ്ഗ കൃഷ്ണനുണ്ണിയുടെ വീട്ടില്‍ കയറിയത്.
അതേസമയം ഇതിന് പിന്നാലെയും പൊരുത്തക്കേടുകള്‍ ഉണ്ടായതോടെ ഇരുവരും വേര്‍പിരിയാന്‍ തിരുമാനിക്കുകയായിരുന്നു.കൃഷ്ണനുണ്ണിയാണ് തനിക്ക് വിവാഹമോചനം വേണമെന്ന് കാട്ടി ഹര്‍ജി നല്‍കിയത്. ഇതോടെ 15 ലക്ഷവും വീടും വേണമെന്നായിരുന്നു കനകദുര്‍ഗയുടെ ആവശ്യം. എന്നാല്‍ ഇത് നല്‍കാനാകില്ലെന്ന് കൃഷ്ണനുണ്ണി അറിയിച്ചതോടെ ഒത്തുതീര്‍പ്പിലെത്തി.

ഭര്‍ത്താവ് കൃഷ്ണനുണ്ണിയുമായി ഉണ്ടാക്കിയ ഉഭയസമ്മതപ്രകാരമുള്ള ഉടമ്പടി പ്രകാരമാണ് ഇപ്പോഴത്തെ വേര്‍പിരിയില്‍. കനക ദുര്‍ഗയ്ക്ക് 10 ലക്ഷം രൂപനല്‍കാനും മലപ്പുറം കുടുംബ കോടതി നിര്‍ദേശം നല്‍കി.കൃഷ്ണനുണ്ണിയുടെ അമ്മയും കനക ദുര്‍ഗയും പരസ്പരം നല്‍കിയ പരാതികളും പിന്‍വലിച്ചു.വിവാഹ മോചനത്തിന് പിന്നാലെ കരാര്‍ പ്രകാരം വീട് മുന്‍ ഭര്‍ത്താവിനും കുട്ടികള്‍ക്കും ഒഴിഞ്ഞുകൊടുത്ത് കനകദുര്‍ഗ പെരിന്തല്‍മണ്ണയിലെ ഫ്‌ലാറ്റിലേക്ക് താമസം മാറി.