ബെനാമി അക്കൗണ്ടിലൂടെ സബ്‌സിഡി ആനുകൂല്യം തട്ടിയെടുത്ത കൃഷി അസിസ്റ്റന്റിന് സസ്പെന്ഷന്
കൃഷി വകുപ്പില്‍ നിന്നുള്ള സബ്‌സിഡി ആനുകൂല്യങ്ങള്‍ ബെനാമി അക്കൗണ്ടിലൂടെ പല തവണ തട്ടിയെടുത്തെന്ന കണ്ടെത്തലിനെ തുടര്‍ന്ന് കൃഷി അസിസ്റ്റന്റിന് സസ്പെന്ഷന്. നെന്‍മേനി കൃഷി ഓഫിസിലെ എം. കൃഷ്ണജ ആണ് വ്യാജ അപേക്ഷകളുണ്ടാക്കി സബ്‌സിഡി ആനുകൂല്യങ്ങള്‍ തട്ടിയെടുത്തത്. ഇവരെ അന്വേഷണവിധേയമായി ജില്ലാ കൃഷി ഓഫിസര്‍ സസ്‌പെന്‍ഡ് ചെയ്തു.
വ്യാജ അപേക്ഷകള്‍ തയാറാക്കി നെല്ല്, കുരുമുളക്, പച്ചക്കറി എന്നീ കൃഷികള്‍ക്കായുള്ള വിവിധ പദ്ധതികളിലേക്ക് സബ്‌സിഡി തുക അനുവദിപ്പിക്കുകയും കൃഷ്ണജയുടെ ബന്ധുവും സഹായിയുമായ എം. സുനിതയുടെ എസ്ബിഐ കൊളഗപ്പാറ ശാഖയിലും ഗ്രാമീണ്‍ ബാങ്ക് ബത്തേരി ശാഖയിലും ഉള്ള ബാങ്ക് അക്കൗണ്ടുകളിലേക്ക് തുക മാറ്റുകയുമാണ് ചെയ്തിരുന്നത്.
സുനിതയുടെ പേരില്‍ ആനുകൂല്യങ്ങള്‍ക്കായി കൃഷി ഓഫിസില്‍ ഒന്നിലധികം അപേക്ഷകള്‍ ശ്രദ്ധയില്‍പെടുകയും അപേക്ഷയിലുള്ള ഫോണ്‍ നമ്പറില്‍ വിളിച്ചപ്പോള്‍ അതു കൃഷ്ണജയുടേതാണെന്ന് കണ്ടെത്തുകയും ചെയ്തതോടെ നടത്തിയ പരിശോധനകളിലാണു തിരിമറി കണ്ടെത്തിയതെന്ന് കൃഷി ഓഫിസര്‍ അനുപമ കൃഷ്ണന്‍ പറഞ്ഞു.
കൃഷ്ണജയുടെ പരിശോധനാ പരിധിയിലുള്ള സ്ഥലങ്ങളുടെ വിവരങ്ങളാണു വ്യാജ അപേക്ഷകളില്‍ ഉണ്ടായിരുന്നത്. തുക അനുവദിച്ച ഏഴ് വ്യാജ അപേക്ഷകളാണ് ഇത്തരത്തില്‍ കൃഷി ഓഫിസില്‍ നിന്ന് കണ്ടെത്തിയത്.
വിവിധ പദ്ധതികളിലെ ആനുകൂല്യങ്ങളായി കഴിഞ്ഞ ഒന്നര വര്‍ഷത്തിനിടെ 25,000 രൂപയോളം തട്ടിച്ചെടുത്തതായാണ് ഇന്നലെ വരെ കൃഷി ഓഫിസില്‍ നിന്ന് കണ്ടെത്തിയിട്ടുള്ളത്. എന്നാല്‍ ഇതേ അക്കൗണ്ടിലേക്ക് ട്രഷറി വഴി 80,000 രൂപയോളം വന്നതായാണു വിവരം. കൂടുതല്‍ പരിശോധനകള്‍ നടത്തി വരികയാണ്.
https://www.facebook.com/Malayalivartha
