ആലത്തൂര്‍ മലക്കുളത്തു നിര്‍മാണ ജോലിക്കിടെ അതിഥിത്തൊഴിലാളിയായ ബംഗാള്‍ മൂര്‍ഷിബാദ് എസ്.കെ. രാംനഗര്‍ ഇമാജുദ്ദീന്റെ മകന്‍ ഫാത്തിക് (38) 25-ാം തീയതി 12-ന് കുഴഞ്ഞു വീണു. ആലത്തൂര്‍ താലൂക്ക് ആശുപത്രിയില്‍ എത്തിച്ചപ്പോഴേക്കു മരിച്ചു. പിന്നീടു സ്രവം പരിശോധനയ്ക്ക് അയച്ചു.

ആശുപത്രി രേഖകളിലും സ്രവ പരിശോധനയ്ക്കും ആശുപത്രി അധികൃതര്‍, കൂടെ വന്നവര്‍ പറഞ്ഞ പ്രകാരം 'ഫൊട്ടിക്കല്‍' എന്ന പേരാണു രേഖപ്പെടുത്തിയത്. ഫലം നെഗറ്റീവായതോടെ തൃശൂര്‍ മെഡിക്കല്‍ കോളജ് ആശുപത്രിയില്‍ പോസ്റ്റ് മോര്‍ട്ടം നടത്തി മൃതദേഹം എംബാം ചെയ്തു ശനിയാഴ്ച വൈകിട്ട് 6.45-നുള്ള വിമാനത്തില്‍ കൊല്‍ക്കത്തയിലേക്കു കൊണ്ടു പോകാന്‍ കൊച്ചി വിമാനത്താവളത്തിലെത്തിച്ചു.

എന്നാല്‍ ആധാറില്‍ ഫാത്തിക് എന്നായിരുന്നു പേരു രേഖപ്പെടുത്തിയിരുന്നത്. പേരിലെ വ്യത്യാസം മൂലം മൃതദേഹം കൊണ്ടു പോകാന്‍ വിമാനത്താവള അധികൃതര്‍ വിസമ്മതിച്ചു. ഒടുവില്‍ അര്‍ധരാത്രിയോടെ രേഖകളിലെ പിശക് തിരുത്തി അയച്ചു. 12 മണിക്കൂറിനു ശേഷം ഇന്നലെ പുലര്‍ച്ചെ 4.45-നുള്ള വിമാനത്തില്‍ ഡല്‍ഹി വഴി മൃതദേഹം കൊല്‍ക്കത്തയിലേക്കു കൊണ്ടുപോയി.