ഇനിയുള്ള രണ്ടുദിവസങ്ങള്‍ തിരുവനന്തപുരത്ത് നിര്‍ണായകമാണെന്ന് മന്ത്രി കടകംപള്ളി സുരേന്ദ്രന്‍... തിരുവനന്തപുരത്ത് കോവിഡ് സ്ഥിരീകരിച്ച പൊലീസുകാരന്റെ സമ്പര്‍ക്കപ്പട്ടികയില്‍ 28 പേര്‍, ഇവരോടു ക്വാറന്റീനില്‍ പോകാന്‍ നിര്‍ദേശം .. സ്രവപരിശോധന ഇന്ന് നടത്തും
ഇനിയുള്ള രണ്ടുദിവസങ്ങള്‍ തിരുവനന്തപുരത്ത് നിര്‍ണായകമാണെന്ന് മന്ത്രി കടകംപള്ളി സുരേന്ദ്രന്‍. തിരുവനന്തപുരത്ത് പൊലീസുകാരന് കോവിഡ് ബാധിച്ചത് സമരക്കാരില്‍ നിന്നാകാം എന്നാണ് വിലയിരുത്തല്‍ . പൊലീസുകാരന് എല്ലാദിവസവും സമരക്കാരെ നേരിട്ടയാളാണ്. വീട്ടുകാര്‍ക്കോ, എ.ആര്‍ ക്യാംപിലെ മറ്റു പൊലീസുകാര്‍ക്കോ രോഗമില്ലെന്നും മന്ത്രി മാധ്യമങ്ങളോടു പറഞ്ഞു.
തിരുവനന്തപുരത്ത് കോവിഡ് സ്ഥിരീകരിച്ച പൊലീസുകാരന്റെ സമ്പര്‍ക്കപ്പട്ടികയില്‍ 28 പേരാണുള്ളത്. ഇവരോടു ക്വാറന്റീനില്‍ പോകാന്‍ നിര്‍ദേശിച്ചു. സ്രവപരിശോധന ഇന്ന് നടത്തും. തിരുവനന്തപുരം എആര്‍ ക്യാംപ് കന്റീന്‍ മൂന്നുദിവസത്തേക്ക് അടച്ചു. തിരുവനന്തപുരത്ത് പകലും നിയന്ത്രണം വേണമെന്ന് ഡിസിപി ദിവ്യാ ഗോപിനാഥ് പറഞ്ഞു. ജനങ്ങള്‍ കൂടുതല്‍ സ്വയംനിയന്ത്രണം പാലിക്കണം. വൈകുന്നേരം വെറുതെ പുറത്തിറങ്ങരുത്.
നന്ദാവനം എആര്‍ ക്യാംപിലെ പൊലീസുകാരനു പുറമേ പൂന്തുറ, മണക്കാട്, പാറവിള സ്വദേശികളായ 3 പേര്‍ക്കു കൂടി കോര്‍പറേഷന്‍ പരിധിയില്‍ രോഗം സ്ഥിരീകരിച്ചിട്ടുണ്ട്. പൊലീസുകാരന് രോഗം സ്ഥിരീകരിച്ച സാഹചര്യത്തില്‍ സെക്രട്ടേറിയറ്റില്‍ നിയന്ത്രണങ്ങള്‍ കര്‍ക്കശമാക്കി. പാളയം സാഫല്യം കോംപ്ലക്‌സിനു പുറമേ പാളയം മാര്‍ക്കറ്റും അടച്ചു. സാഫല്യം കോംപ്ലക്‌സ് സ്ഥാപനത്തിലെ ജീവനക്കാരനും വഞ്ചിയൂരിലെ ലോട്ടറി വില്‍പനക്കാരനും അമ്പലത്തറ കുമരിച്ചന്തയിലെ മത്സ്യവില്‍പനക്കാരനും രോഗം ബാധിച്ചത് എവിടെ നിന്നാണെന്നു കണ്ടെത്താനായിട്ടില്ല.വിഎസ്എസ്സിയില്‍ ജോലി ചെയ്യുന്ന 2 പേര്‍ക്കു രോഗം ബാധിച്ച സാഹചര്യത്തില്‍, ഇതര സംസ്ഥാനങ്ങളില്‍ നിന്നു വിഎസ്എസ്സിയില്‍ ജോലിക്കെത്തുന്നവര്‍ക്കു കോവിഡ് പരിശോധന നിര്‍ബന്ധമാക്കും. പൂന്തുറ, വഞ്ചിയൂര്‍, പാളയം വാര്‍ഡുകളിലെ ചില പ്രദേശങ്ങളും നെയ്യാറ്റിന്‍കര മുനിസിപ്പാലിറ്റിയിലെ വഴുതൂര്‍ വാര്‍ഡും ബാലരാമപുരം പഞ്ചായത്തിലെ തളിയില്‍ വാര്‍ഡും കണ്ടെയ്ന്‍മെന്റ് സോണുകളായി.
കോവിഡ് രോഗികള്‍ കൂടിയതോടെ തിരുവനന്തപുരത്തും കൊച്ചിയിലും പൊലീസ് നിയന്ത്രണങ്ങള്‍ കടുപ്പിച്ചിരിക്കുകയാണ്. കൊച്ചി ചമ്പക്കര മാര്‍ക്കറ്റില്‍ കോവിഡ് നിയന്ത്രണങ്ങള്‍ ലംഘിച്ച അന്‍പതോളം പേരെ കസ്റ്റഡിയിലെടുത്തു. ഒരു കട പൂട്ടിച്ചു. പൊലീസും നഗരസഭാ അധികൃതരും ചേര്‍ന്നായിരുന്നു പരിശോധന. നിബന്ധന പാലിച്ചില്ലെങ്കില്‍ മാര്‍ക്കറ്റ് അടയ്ക്കുമെന്നാണ് മുന്നറിയിപ്പ്.
ന്മ നഗരപരിധിയിലെ വീടുകളില്‍ നിന്ന് പുറത്തിറങ്ങുന്നവര്‍ ബ്രേക്ക് ദ ചെയിന്‍ ഡയറി സൂക്ഷിക്കണം. പുറത്തിറങ്ങുന്നവര്‍ യാത്ര ചെയ്ത വിവരം, എവിടെയൊക്കെ സന്ദര്‍ശിച്ചു തുടങ്ങിയ മുഴുവന്‍ സഞ്ചാര പഥവും ഡയറില്‍ രേഖപ്പെടുത്തണം.
നിയന്ത്രണങ്ങളുടെ ഭാഗമായി മാര്‍ക്കറ്റുകളിലെ കടകള്‍ക്ക് ഏര്‍പ്പെടുത്തുന്ന ക്രമീകരണം
പഴം,പച്ചക്കറി കടകള്‍ തിങ്കള്‍, ചൊവ്വ, വെള്ളി, ശനി ദിവസങ്ങളില്‍ പ്രവര്‍ത്തിക്കാം
പലവ്യഞ്ജനം, സ്റ്റേഷനറി, ചിക്കന്‍ എന്നിവ വില്‍ക്കുന്ന വ്യാപാര സ്ഥാപനങ്ങള്‍ ഒന്നിടവിട്ട ദിവസങ്ങളില്‍ പ്രവര്‍ത്തിക്കണം.
മത്സ്യം, മാംസം എന്നിവ വില്‍ക്കുന്ന സ്ഥാപനങ്ങളുള്‍പ്പെടെ മറ്റുവ്യാപാര സ്ഥാപനങ്ങള്‍ ഓരോ കാറ്റഗറിയിലും മൊത്തം സ്ഥാപനങ്ങളുടെ 50 % സ്ഥാപനങ്ങള്‍ മാത്രം ഓരോ ദിവസവും പ്രവര്‍ത്തിക്കണം.
മാളിലെ സൂപ്പര്‍ മാര്‍ക്കറ്റ് ക്രമീകരണം
തിങ്കള്‍, ബുധന്‍, വെള്ളി, ശനി ദിവസങ്ങളില്‍ മാത്രം സൂപ്പര്‍ മാര്‍ക്കറ്റുകള്‍ പ്രവര്‍ത്തിക്കണം..അവധി ദിവസങ്ങളില്‍ ഹോം ഡെലിവറി മാത്രം.
പാളയം വാര്‍ഡ് കണ്ടെയ്‌മെന്റ് സോണായ സാഹചര്യത്തില്‍ പാളയം കണ്ണിമേറ മാര്‍ക്കറ്റ് അടച്ചുപൂട്ടി. സാഫല്യം കോംപ്ലക്‌സിലെ സ്റ്റോര്‍ ജീവനക്കാരനായ അസം സ്വദേശിക്കു കോവിഡ് സ്ഥിരീകരിച്ചതിനെ തുടര്‍ന്നാണ് നിയന്ത്രണം . സാഫല്യം കോംപ്ലക്‌സ് വ്യാഴാഴ്ച അടച്ചിരുന്നു. എന്നാല്‍ മാര്‍ക്കറ്റ് നിയന്ത്രണങ്ങളോടെ പ്രവര്‍ത്തിപ്പിക്കാനായിരുന്നു കോര്‍പറേഷന്‍ തീരുമാനിച്ചത്. ഇതില്‍ ജില്ലാഭരണകൂടം ആശങ്ക അറിയിച്ചതോടെ കോര്‍പറേഷന്‍ തീരുമാനം മാറ്റുകയായിരുന്നു. മാര്‍ക്കറ്റും ഈ ഭാഗത്തെ മറ്റു കടകളും ഹോട്ടലുകളും 7 ദിവസത്തേക്കു അടച്ചിടാന്‍ മേയര്‍ കെ.ശ്രീകുമാര്‍ നിര്‍ദേശം നല്‍കി. രാവിലെ മാര്‍ക്കറ്റിലും സാഫല്യം കോംപ്ലക്സിലും അണുനശീകരണം നടത്തുകയും ചെയ്തു.
രോഗബാധിതനുമായി നേരിട്ട് സമ്പര്‍ക്കം പുലര്‍ത്തിയവരുടെ പട്ടിക തയാറാക്കാന്‍ നടപടി തുടങ്ങി. 18നാണു രോഗ ലക്ഷണങ്ങള്‍ ഉണ്ടായത്. 27നു കടയില്‍ ജോലിക്കെത്തി. സ്ഥാപനത്തിലെ ജീവനക്കാര്‍ തുടങ്ങി ഒട്ടേറെ ആളുകളുമായി സമ്പര്‍ക്കം പുലര്‍ത്തുകയും ചെയ്തു. ഇതില്‍ ഭൂരിഭാഗം പേരും നഗരത്തിലെ താമസക്കാരാണ്. വഞ്ചിയൂരില്‍ ലോട്ടറി കച്ചവടക്കാരനു കോവിഡ് ബാധ സ്ഥിരീകരിച്ചതോടെ ഇവിടെയും നിയന്ത്രണം കടുപ്പിച്ചു. സെക്രട്ടേറിയറ്റ് റോഡ്, ആയുര്‍വേദ കോളജ് ജംക്ഷന്‍, വഞ്ചിയൂര്‍ എന്നിവിടങ്ങളിലും അണുനശീകരണം നടത്തി.
https://www.facebook.com/Malayalivartha
