കൊവിഡ് രോഗം കേരളത്തില്‍ അതിരുവിടുന്നു. പലയിടത്തും സമൂഹ വ്യാപനം ആയിക്കഴിഞ്ഞു എന്നാണ് കരുതപ്പെടുന്നത്. അത്രയേറെ കാര്യങ്ങള്‍ വഷളാണ്. തലസ്ഥാനത്തിനു പുറമേ എറണാകുളം നഗരത്തിലെ അഞ്ച് പ്രദേശങ്ങളെ കൂടി കണ്ടെയിന്മെന്റ് സോണായി പ്രഖ്യാപിച്ചു. കൊച്ചി നഗരസഭയിലെ അഞ്ച് ഡിവിഷനുകളെയാണ് കണ്ടെയിന്മെന്റ് സോണുകളായി പ്രഖ്യാപിച്ചിരിക്കുന്നത്.

പാലാരിവട്ടം നോര്‍ത്ത്, കാരണക്കോടം, ചക്കരപ്പറമ്പ്, ഗിരിനഗര്‍, പനമ്പിള്ളി നഗര്‍ മേഖലകളിലാണ് ഇപ്പോള്‍ കടുത്ത നിയന്ത്രണങ്ങള്‍ ഏര്‍പ്പെടുത്തിയിരിക്കുന്നത്. തൃക്കാക്കര നഗരസഭയിലെയും, പറവൂര്‍ നഗരസഭയിലെയും പ്രദേശങ്ങള്‍ കണ്ടെയിന്മെന്റ് ഉള്‍പ്പെട്ടിട്ടുണ്ട്.

കടുങ്ങല്ലൂര്‍ പഞ്ചായത്തിലെ എട്ടാം വാര്‍ഡും കണ്ടെയിന്മെന്റ് സോണാണ്. ജില്ലയില്‍ ഇന്ന് 13 പേര്‍ക്കാണ് കൊവിഡ് രോഗം സ്ഥിരീകരിച്ചത്. ഇക്കൂട്ടത്തില്‍ അഞ്ചുപേര്‍ക്ക് സമ്ബര്‍ക്കത്തിലൂടെയാണ് രോഗം വന്നത്. സ്വകാര്യ ആശുപത്രികളില്‍ പ്രവേശിപ്പിച്ചിരുന്ന നാല് പേര്‍ക്ക് രോഗം സ്ഥിരീകരിച്ചിട്ടുണ്ട്. ആലുവയിലുള്ള ഓട്ടോ ഡ്രൈവറിലും രോഗം കണ്ടെത്തി.

അതേസമയം മലപ്പുറം ജില്ലയില്‍ 37 പേര്‍ക്ക് കൂടി ഇന്നലെ കോവിഡ് സ്ഥിരീകരിച്ചു. ഒരാള്‍ക്ക് മാത്രമാണ് ഇന്നലെ സന്പര്‍ക്കത്തിലൂടെ രോഗബാധ സ്ഥിരീകരിച്ചത്. നാല് പേര്‍ ഇതര സംസ്ഥാനങ്ങളില്‍ നിന്നും 32 പേര്‍ വിവിധ വിദേശ രാജ്യങ്ങളില്‍ നിന്നും എത്തിയവരാണെന്ന് ജില്ലാ കളക്ടര്‍ കെ.ഗോപാലകൃഷ്ണന്‍ അറിയിച്ചു. ഇവരില്‍ ആറ് പേര്‍ കോഴിക്കോട് ജില്ലയിലും മൂന്ന് പേര്‍ കണ്ണൂര്‍ ജില്ലയിലും ശേഷിക്കുന്നവര്‍ മഞ്ചേരി ഗവ.മെഡിക്കല്‍ കോളജ് ആശുപത്രിയിലുമാണ് ചികിത്സയിലുള്ളത്.