ആളുകളുടെ മുന്നില്‍ വച്ച് കായലില്‍ ചാടിയ യുവതിയെ പൊലീസുകാരനും ഓട്ടോ ഡ്രൈവറും ചേര്‍ന്ന് രക്ഷിച്ചു
ഫോര്‍ട്ട്‌കൊച്ചി ജങ്കാര്‍ ജെട്ടിയിലുള്ള കൗണ്ടറില്‍ നിന്ന് ഇന്നലെ വൈകിട്ട് മൂന്നരയോടെ ജീന്‍സും ടീ ഷര്‍ട്ടുമിട്ട ഒരു യുവതി ടിക്കറ്റ് എടുത്തു. തുടര്‍ന്ന് ആളൊഴിഞ്ഞ ഭാഗത്തു കൂടെ കായലിനരികിലേക്ക് നടന്നു. ഇത് കണ്ടപ്പോള്‍ തന്നെ ആളുകള്‍ക്ക് സംശയം തോന്നി. പട്രോളിങ്ങിന്റെ ഭാഗമായി ഇന്‍സ്‌പെക്ടര്‍ ജി.പി.മനുരാജും ഡ്രൈവര്‍ എം.വി.ലെവനും ഈ സമയം അവിടെയുണ്ടായിരുന്നു.
യുവതി കായലില്‍ ചാടാന്‍ പോകുന്നുവെന്ന് ആരോ പറഞ്ഞതായി ലെവന്‍ പറയുന്നു. ഇത് കേട്ടയുടന്‍ ഇന്‍സ്‌പെക്ടര്‍ മനുരാജും ലെവനും ഓടിയടുത്തു. മനുരാജ് യുവതിയുടെ അടുത്തെത്തിയെങ്കിലും പിടികൂടുന്നതിന് മുന്‍പ് യുവതി വെള്ളത്തില്‍ ചാടിക്കഴിഞ്ഞിരുന്നു. നീന്തല്‍ അറിയാവുന്ന ലെവനും ഓട്ടോ ഡ്രൈവറായ പി.യു. ഇക്ബാലും പിന്നാലെ വന്ന മറ്റൊരാളും കായലിലേക്ക് ചാടി.
അടിയൊഴുക്ക് ശക്തമായിരുന്നുവെങ്കിലും മുടിയില്‍ പിടിച്ച് മുകളിലേക്ക് എത്തിച്ചു. ഓട്ടോ ഡ്രൈവര്‍മാരുടെയും യാത്രക്കാരുടെയും സഹായത്തോടെ കണ്‍ട്രോള്‍ റൂം വാഹനത്തില്‍ ഫോര്‍ട്ട്‌കൊച്ചി താലൂക്ക് ആശുപത്രിയില്‍ എത്തിച്ചു. അവിടെ നിന്ന് എറണാകുളം ജനറല്‍ ആശുപത്രിയിലേക്ക് മാറ്റി. തുരുത്തി സ്വദേശിനിയായ യുവതി അപകടനില തരണം ചെയ്തതായി പൊലീസ് അറിയിച്ചു.
കായലില്‍ നീന്തി പരിചയമുണ്ടെങ്കിലും ജങ്കാര്‍ ജെട്ടി പോലെ ആഴവും അടിയൊഴുക്കും ഉള്ളിടത്ത് ചാടുന്നത് റിസ്‌ക് ആയിരുന്നുവെന്ന് കുത്തിയതോട് സ്വദേശിയായ ലെവന്‍ പറഞ്ഞു.
ലെവന്റെ മനഃസാന്നിധ്യത്തെ അഭിനന്ദിച്ച് ഇന്‍സ്‌പെക്ടര്‍ മനുരാജ് സമൂഹ മാധ്യമങ്ങളില്‍ ഇട്ട പോസ്റ്റ് വൈറലായി.
https://www.facebook.com/Malayalivartha
