സ്വപ്ന സുരേഷിനോടൊപ്പം ഫോട്ടോയില്‍ ഉള്‍പ്പെട്ട പ്രമുഖര്‍ ഇപ്പോള്‍ എങ്ങനെ മറുപടി പറയണമെന്നറിയാതെ കുഴങ്ങുകയാണ്. ഒന്നുമല്ലാതിരുന്ന സ്വപ്ന സുരേഷ് തീര്‍ത്ത മായിക ലോകത്ത് സകലരും പെട്ടുപോകുകയായിരുന്നു. ഉന്നതരുമായുള്ള സ്വാധീനം എല്ലായിടത്തും ദുരുപയോഗം ചെയ്ത് വിലസുകയായിരുന്നു സ്വപ്‌ന. കോണ്‍സലാര്‍ ജനറലിന്റെ എക്‌സിക്യുട്ടീവ് സെക്രട്ടറി എന്ന നിലയില്‍ യു.എ.ഇ കോണ്‍സലേറ്റിലെ അധികാരകേന്ദ്രം സ്വപ്നയായിരുന്നു. ഔദ്യോഗിക പരിപാടികളില്‍ പോലും അറബികളെ പുറകിലാക്കി സ്വപ്ന വേദി കൈയ്യടക്കിയിരുന്നു. അതിനാല്‍ തന്നെ മന്ത്രിമാരും ഉന്നത ഉദ്യോഗസ്ഥരും പ്രതിപക്ഷ നേതാക്കളും അവര്‍ എന്തെക്കയോ ആണ് എന്ന് തെറ്റിദ്ധരിക്കുകയും ചെയ്തു. പല ഔദ്യോഗിക യോഗത്തില്‍പോലും കോണ്‍സലേറ്റ് പ്രതിനിധിയെപ്പോലെ പങ്കെടുത്തു. നയതന്ത്ര അഭിപ്രായങ്ങള്‍ പറഞ്ഞു. അവരെ ഡിപ്ലോമാറ്റ് അഥവാ നയതന്ത്ര പ്രതിനിധി എന്നു കരുതിയെന്നാണ് സ്പീക്കര്‍ പി. ശ്രീരാമകൃഷ്ണന്‍ ഇന്നലെ പറഞ്ഞത്. യഥാര്‍ത്ഥത്തില്‍ യു.എ.ഇ പൗരന് മാത്രമേ നയതന്ത്ര പ്രതിനിധിയാകാന്‍ കഴിയൂ. പക്ഷെ സ്വപ്നയാകട്ടെ എല്ലാവരേയും തെറ്റിദ്ധരിപ്പിക്കുകയായിരുന്നു.

ബഹുമാനം എന്നും സ്വപ്ന ചോദിച്ച് വാങ്ങിച്ചിരുന്നു. മണക്കാട്ടെ കോണ്‍സലേറ്റിലേക്ക് ഡ്യൂട്ടിക്കെത്തുമ്പോള്‍ ഗേറ്റില്‍ സുരക്ഷാ ചുമതലയിലുണ്ടായിരുന്ന മൂന്ന് പൊലീസുകാര്‍ സല്യൂട്ട് ചെയ്തില്ല. അവരെ ഉടന്‍ സസ്‌പെന്‍ഡ് ചെയ്യണമെന്ന് കോണ്‍സലേറ്റില്‍ നിന്ന് പോലീസ് ഉന്നതരില്‍ ശുപാര്‍ശയെത്തി. കോണ്‍സലേറ്റ് ഉദ്യോഗസ്ഥയെ അപമാനിച്ചെന്നായിരുന്നു ആക്ഷേപം. ഇതേത്തുടര്‍ന്ന് പൊലീസുകാരെ മാറ്റി. ആറുമാസം മുമ്പ് തിരിമറി കാട്ടിയതിനെ തുടര്‍ന്ന് കോണ്‍സലേറ്റിലെ ജോലി ഇല്ലാതായെങ്കിലും ഇക്കാര്യം മറച്ചുവച്ചാണ് സ്വപ്ന അധികാര കേന്ദ്രങ്ങളില്‍ നിത്യസന്ദര്‍ശകയായത്.

എയര്‍ ഇന്ത്യ ഉദ്യോഗസ്ഥനെതിരെ വ്യാജ പീഡനപരാതി നല്‍കിയ കേസില്‍ ക്രൈംബ്രാഞ്ച് ചോദ്യം ചെയ്യാന്‍ വിളിപ്പിച്ചപ്പോള്‍ അവരും അറിഞ്ഞു സ്വപ്നയുടെ പവര്‍. ചോദ്യം ചെയ്യാന്‍ വിളിപ്പിച്ചിട്ട് വൈകിപ്പിക്കുന്നതെന്തെന്ന് ചോദിച്ച് കയര്‍ത്തു. അന്ന് ചിലരുടെ ഇടപെടല്‍ കാരണം ഉടനടി സ്വപ്നയെ വിട്ടയച്ചുവെന്നാണ് പറയുന്നത്. എന്നാല്‍ ക്രൈംബ്രാഞ്ച് ഇതില്‍ പെടാതെ പിന്നീട് വിശദമായ അന്വേഷണം നടത്തിയാണ് തട്ടിപ്പുകേസില്‍ പ്രതിയാക്കാന്‍ ക്രൈംബ്രാഞ്ച് ഹൈക്കോടതിയില്‍ സത്യവാങ്മൂലം നല്‍കിയത്. ഇത് തടയാന്‍ ഉന്നതന് കഴിഞ്ഞില്ല. അതേസമയം അന്വേഷണം ശക്തമാക്കുകയും സ്വപ്ന സുരേഷ് എയര്‍ ഇന്ത്യ ഉദ്യോഗസ്ഥനെ ജോലിയില്‍നിന്ന് പുറത്താക്കാന്‍ ആള്‍മാറാട്ടം നടത്തിയതായി ക്രൈംബ്രാഞ്ച് റിപ്പോര്‍ട്ട് നല്‍കുകയും ചെയ്തു. ഈ റിപ്പോര്‍ട്ട് നിലനില്‍ക്കെയാണ് ഐടി വകുപ്പില്‍ സ്വപ്ന സുരേഷിന് ജോലി നല്‍കിയത് എന്നത് മറ്റൊരു വിരോധാഭാസം.

എയര്‍ഇന്ത്യ ജീവനക്കാരനായ സിബുവിനെതിരെ 17 പെണ്‍കുട്ടികളുടെ പേരില്‍ എയര്‍പോര്‍ട്ട് ഡയറക്ടര്‍ക്ക് പരാതി തപാലില്‍ ലഭിക്കുകയായിരുന്നു. പരാതിയിലെ രണ്ടാംപേരുകാരിയായ പാര്‍വതി സാബു മൊഴി നല്‍കിയതിന്റെ അടിസ്ഥാനത്തിലാണ് സിബുവിനെതിരെ ആഭ്യന്തര അന്വേഷണ സമിതി അച്ചടക്ക നടപടി സ്വീകരിച്ചത്.

ആഭ്യന്തര അന്വേഷണ സമിതി കുറ്റക്കാരനാണെന്ന് കണ്ടെത്തിയതിനെത്തുടര്‍ന്ന് സിബു നല്‍കിയ പരാതിയില്‍ ക്രൈംബ്രാഞ്ച് അന്വേഷണം നടത്തി. സിബുവിനെതിരെയുള്ള പരാതി വ്യാജമാണെന്ന് ക്രൈംബ്രാഞ്ച് കണ്ടെത്തിയിരുന്നു.സ്വപ്ന സുരേഷാണ് പാര്‍വതി സാബു എന്നപേരില്‍ നീതു മോഹന്‍ എന്ന പെണ്‍കുട്ടിയെ ആഭ്യന്തര അന്വേഷണ സമിതിക്കു മുന്നില്‍ ഹാജരാക്കി തെറ്റായ മൊഴി കൊടുത്തതെന്ന് ക്രൈംബ്രാഞ്ച് കണ്ടെത്തി. സ്വപ്ന സുരേഷിനെ ചോദ്യം ചെയ്തപ്പോള്‍, രണ്ടു മാസം മുന്‍പാണ് സാറ്റ്‌സില്‍ ജോലിയില്‍ പ്രവേശിച്ചതെന്നും സാമ്പത്തിക ബുദ്ധിമുട്ടുകള്‍ നേരിട്ടിരുന്ന തന്നെകൊണ്ട് വൈസ് പ്രസിഡന്റും ചിലരും ചേര്‍ന്ന് തെറ്റായ പല കാര്യങ്ങളും ചെയ്യിച്ചതായും മൊഴി നല്‍കി. 17 പെണ്‍കുട്ടികളുടേതായി തയാറാക്കിയ പരാതി ഡ്രാഫ്റ്റ് ചെയ്തത് സ്വപ്ന സുരേഷാണെന്ന അനുമാനത്തില്‍ ക്രൈംബ്രാഞ്ച് എത്തിയെങ്കിലും തെളിവുകള്‍ ലഭിച്ചില്ല. അതാണിപ്പോള്‍ സ്വര്‍ണക്കടത്തോടെ വീണ്ടും പൊങ്ങി വരുന്നത്.