ഒരു പെണ്ണുകേസില്‍ ആരേയും എപ്പോള്‍ വേണമെങ്കിലും കുടുക്കാന്‍ പറ്റുന്ന സാഹചര്യമാണുള്ളത്. അത് മുതലെടുക്കുമ്പോള്‍ തകരുന്നത് പലരുടേയും ജീവിതങ്ങളാണ്. പലരും വിധിയെന്ന് വിചാരിച്ച് ജീവിതം ഹോമിക്കുകയാണ് ചെയ്യുക. എന്നാല്‍ അതിലൊന്നും തളരാതെ ഏതറ്റം വരേയും പോകാനുള്ള മനസ് ആ ഉദ്യോഗസ്ഥനുണ്ടായിരുന്നു. മറ്റാരുമല്ല സ്വപ്ന സുരേഷിന്റെ കള്ള പരാതിയില്‍ കുടുങ്ങിയ എയര്‍ ഇന്ത്യയിലെ ഗ്രൗണ്ട് ഹാന്‍ഡ്‌ലിംഗ് ഓഫീസര്‍ പട്ടം സ്വദേശിയായ എല്‍.എസ്.ഷിബുവാണ് ആ വ്യക്തി.

തന്റെ ദുരവസ്ഥ പറയുമ്പോള്‍ ഷിബുവിന്റെ കണ്ണ് നിറയുകയായിരുന്നു. അന്ന് എന്റെ പരാതി പൊലീസ് നേരെ ചൊവ്വെ അന്വേഷിച്ച് കുറ്റക്കാരെ പ്രതി ചേര്‍ത്തിരുന്നുവെങ്കില്‍ സ്വപ്ന സുരേഷ് എന്ന ഈ പ്രതി ഒരു കോണ്‍സുലേറ്റിലും ജോലി ചെയ്യില്ലായിരുന്നു, മുഖ്യമന്ത്രിയുടെ ഓഫീസില്‍ പോകില്ലായിരുന്നു,?ഒരു ഐ.എ.എസ് ഉദ്യോഗസ്ഥനെ വീഴ്ത്തില്ലായിരുന്നു. ഈ നാണക്കേട് ഉണ്ടാകില്ലായിരുന്നു...

ഷിബു തിരുവനന്തപുരം വിമാനത്താവളത്തില്‍ ജോലി ചെയ്യുമ്പോഴാണ് എയര്‍ ഇന്ത്യ സാറ്റ്‌സിന്റെ മാനേജരായി സ്വപ്ന സുരേഷ് എത്തുന്നത്. ക്രമക്കേട് കണ്ടില്‍ കൃത്യമായി ഇടപെടുന്ന വിമാനത്താവളത്തില്‍ നിന്ന് ഷിബുവിനെ ഒഴിവാക്കേണ്ടത് പലരുടേയും ആവശ്യമായിരുന്നു. അങ്ങനെയാണ് ഒരു വ്യാജപരാതി വലിയതുറ പൊലീസ് സ്‌റ്റേഷനിലെത്തുന്നത്. അതാകട്ടെ ഷിബുവിന് ഏറെ അപമാനമുണ്ടാക്കുന്നതായിന്നു. കരളുറപ്പില്‍ ഭ്രാന്ത് പിടിക്കാതെ രക്ഷപ്പെടുകയായിരുന്നു അദ്ദേഹം.
എയര്‍ ഇന്ത്യ സാറ്റ്‌സിലെ തട്ടിപ്പുകളെ കുറിച്ച് ഞാന്‍ സി.ബി.ഐക്ക് ഉള്‍പ്പെടെ പരാതി നല്‍കിയിരുന്നു. എയര്‍ഇന്ത്യ സാറ്റ്‌സിന്റെ വൈസ് ചെയര്‍മാനായിരുന്ന ബിനോയ് ജേക്കബും സ്വപ്നയും എയര്‍പോര്‍ട്ടിലെ ചില ഉന്നതരും എനിക്കെതിരെ തിരിയാന്‍ അത് കാരണമായി. എന്നെ പുറത്താക്കാനാണ് സ്ത്രീകളോട് മോശമായി പെരുമാറി എന്ന പരാതി നല്‍കുന്നത്. അതില്‍ 16 പേരും എന്നെ അറിയില്ല എന്നു പൊലീസിനോട് പറഞ്ഞു.17ാമത്തെ ആളിനു പകരം വേറൊരാളെ സ്‌റ്റേഷനിലെത്തിച്ചു. അതില്‍ സ്വപ്നയ്ക്കു മാത്രമല്ല, എയര്‍പോര്‍ട്ടിലെ ഉന്നതര്‍ക്കും പങ്കുണ്ട്.

ആള്‍മാറാട്ടം വരെ നടത്തി എന്നെ ക്രൂശിക്കാന്‍ ശ്രമിച്ചപ്പോള്‍ എന്റെ കുടുംബം അനുഭവിച്ച വേദന വിവരിക്കാനാവില്ല. ഭ്രാന്ത് പിടിക്കാതിരിക്കാന്‍ പകല്‍ മുഴുവനും ഞാന്‍ കറങ്ങി നടന്നിരുന്നു. അങ്ങനെ മൂന്നരവര്‍ഷം. വ്യാജപരാതിക്കെതിരെ ബിനോയ് ജേക്കബിനും മറ്റുള്ളവര്‍ക്കും എതിരെ ഞാന്‍ പരാതി നല്‍കി. ആദ്യം അന്വേഷിച്ച ഉദ്യോഗസ്ഥര്‍ ആ കേസ് അട്ടിമറിച്ചപ്പോഴാണ് ഹൈക്കോടതിയെ സമീപിച്ചത്. ഹൈക്കോടതി ഉത്തരവ് പ്രകാരമാണ് ഇപ്പോള്‍ കേസന്വേഷണം നടക്കുന്നത്. അന്വേഷണ ഉദ്യോഗസ്ഥര്‍ സ്വപ്നയെ ചോദ്യം ചെയ്തിരുന്നു. അവര്‍ കുറ്റം ഏറ്രെന്നാണ് അറിഞ്ഞത്.ഉന്നതങ്ങളിലെ സ്വാധീനം കാരണമാണ് പ്രതികള്‍ രക്ഷപ്പെട്ടത്. എനിക്കെതിരെ പരാതി ഉയര്‍ന്ന ശേഷം സ്വപ്ന എയര്‍പോര്‍ട്ട് വിട്ടു. ബിനോയ് ജേക്കബ് മറ്റൊരു കമ്പനിയുടെ ആളായി ഇപ്പോഴും അവിടെയുണ്ട്. എനിക്കെതിരെ വ്യാജപരാതി ചമച്ചതിലും ആള്‍മാറാട്ടം നടത്തിയതിലും ഇവര്‍ രണ്ടു പേര്‍ക്ക് മാത്രമല്ല, എയര്‍ ഇന്ത്യയിലെ ഉന്നത ഉദ്യോഗസ്ഥര്‍ക്കും പങ്കുണ്ട്. വ്യക്തമായ അന്വേഷണം നടന്നാല്‍ ഇപ്പോള്‍ കണ്ടെത്തിയതിനെക്കാളും വലിയ സത്യങ്ങള്‍ തെളിയും എന്നാണ് ഷിബു പറഞ്ഞത്.

ജീവിതം മാറിമറിഞ്ഞതാണ് ഷിബുവിന്റെ ജീവിതം. നാട്ടിലെ അപമാനത്തിന് ശേഷം ഇപ്പോള്‍ ഹൈദരാബാദിലെ എയര്‍പോര്‍ട്ട് ഗ്രൗണ്ട് ഓഫീസറാണ് ഷിബു. തന്റെ എല്ലാ സമ്പാദ്യവും ചെലവഴിച്ചായാലും കേസിന്റെ പുറകെ പോകാനാണ് അദ്ദേഹത്തിന്റെ തീരുമാനം. കാരണം അത്രയേറെ വേദനയാണ് അവര്‍ കാരണം അനുഭവിച്ചത്. ഇനിയൊരാള്‍ക്കും ഇത് വരാതിരിക്കാന്‍ പൊരുതുക തന്നെ ചെയ്യുമെന്നും ഷിബു വ്യക്തമാക്കി.