സ്വപ്ന സുരേഷിന്റെയും സരിത്തിന്റേയും നേതൃത്വത്തില്‍ കോണ്‍സലേറ്റ് വഴി നടന്നു വന്നിരുന്ന സ്വര്‍ണ കള്ളക്കടത്ത് ആദ്യമായി പിടികൂടിയത് കസ്റ്റംസ് കമീഷണര്‍ സുമിത് കുമാറാണ്. നയതന്ത്ര പ്രാധാന്യമുള്ള ബാഗ് പരിശോധിക്കുന്നത് രണ്ട് രാജ്യങ്ങളും തമ്മിലുള്ള ബന്ധത്തെ കാര്യമായി ബാധിക്കും. അത് വലിയ പ്രശ്‌നങ്ങളിലേക്ക് കലാശിക്കും. അപ്പോള്‍ ഉത്തരം പറയേണ്ടതും താനാണ്. എന്ന് കരുതി വിട്ടുകളയാന്‍ സുമിത് കുമാര്‍ ഒരുക്കമായിരുന്നില്ല. ഡിപ്ലോമാറ്റിക് ബാഗേജിന്റെ മറവിലുള്ള സ്വര്‍ണക്കടത്ത് പിടികൂടാന്‍ സഹായകമായത് കസ്റ്റംസ് കമീഷണര്‍ സുമിത് കുമാറിന്റെ ദൃഢനിശ്ചയം ഒന്നുമാത്രമാണ്. പരിശോധന പാളിയാല്‍ തകരുന്നത് ജോലിയും ഇന്ത്യ യു.എ.ഇ നയതന്ത്ര ബന്ധവുമാണെന്നറിഞ്ഞിട്ടും വിവരം നല്‍കിയ ആളിലുള്ള ഉറച്ചവിശ്വാസത്തില്‍ കമീഷണര്‍ നടപടി നീക്കുകയായിരുന്നു. രഹസ്യവിവരത്തെ തുടര്‍ന്ന് കമീഷണര്‍ തിരുവനന്തപുരത്ത് കാര്‍ഗോ ചുമതലയുള്ള അസിസ്റ്റന്റ് കമീഷണര്‍ രാമമൂര്‍ത്തിയെ വിളിച്ച് ലഗേജുകള്‍ സ്‌കാന്‍ ചെയ്യാന്‍ നിര്‍ദേശം നല്‍കി.

അതേസമയം ഇത് മണത്തറിഞ്ഞ സ്വപ്നയും കൂട്ടരും പല ഉന്നതരേയും സ്വാധീനിച്ച് ശുപാര്‍ശ നടത്തി. എന്നാല്‍ അതിലൊന്നും പതറാതെ സുമിത് കുമാര്‍ ഉറച്ച് നിന്നു. പിന്നാലെ പല ഭീഷണികളുമുണ്ടായി. അതൊന്നും സുമിത് കുമാര്‍ പണ്ടേ വകവയ്ക്കില്ലായിരുന്നു. തനിക്കെതിരേ ഉയരുന്ന ഭീഷണികളെ മുഖവിലയ്‌ക്കെടുക്കിന്നില്ലെന്ന് സുമിത് കുമാര്‍ നേരത്തെ തന്നെ വ്യക്തമാക്കിയിരുന്നു.

പല ഭാഗങ്ങളില്‍ നിന്ന് ഭീഷണി വരുന്നുണ്ട്. പക്ഷെ ഇതെല്ലാം ജോലിയുടെ ഭാഗമായി കാണുന്നു. ഭീഷണിയെക്കുറിച്ച് ഉത്തരവാദിത്തപ്പെട്ട കേന്ദ്രങ്ങള്‍ അന്വേഷിക്കുമെന്നും സുമിത് കുമാര്‍ അറിയിച്ചു.

വിമാനത്താവളത്തിലെ ഡ്യൂട്ടിഫ്രീ തട്ടിപ്പ്, നെടുമ്പാശ്ശേരിയിലെ സ്വര്‍ണക്കടത്ത് എന്നിവയിലെല്ലാം ശക്തമായ നടപടി സ്വീകരിച്ച് പോരുന്നതിനാല്‍ തനിക്കെതിരെ പല കേന്ദ്രങ്ങളില്‍ നിന്ന് ഭീഷണിയുണ്ടെന്ന് സുമിത് കുമാര്‍ തന്റെ ഫെയ്‌സ്ബുക്ക് പോസ്റ്റില്‍ കുറിച്ചിരുന്നു. ഇതുമായി ബന്ധപ്പെട്ടാണ് അദ്ദേഹത്തിന്‍രെ പ്രതികരണം.

കസ്റ്റംസ് അനേഷണത്തോടെ മുങ്ങിയ സ്വര്‍ണക്കടത്ത് കേസിലെ മുഖ്യപ്രതി സ്വപ്ന സുരേഷിനായി തിരച്ചില്‍ കസ്റ്റംസ് ഊജ്ജിതമാക്കിയിരിക്കുകയാണ്. യുവതി തിരുവനന്തപുരത്ത് തന്നെയുണ്ടെന്ന് സൂചന. സ്വപ്‌നയുടെ ഫ്‌ളാാറ്റില്‍ കഴിഞ്ഞ ദിവസം ആറുമണിക്കൂര്‍ റെയ്ഡ് നടത്തിയെങ്കിലും അവരെ കണ്ടെത്താന്‍ സാധിച്ചിരുന്നില്ല. യുവതിയുടെ സഹോദരന്റെ സാന്നിദ്ധ്യത്തിലായിരുന്നു റെയ്ഡ്.

സ്വപ്നയുടെ വീട്ടില്‍ നിന്നും കിട്ടിയ ലാപ്‌ടോപ്പും പെന്‍െ്രെഡവും,സിസിടിവി ദൃശ്യങ്ങളും അന്വേഷണ സംഘം വിശദമായി പരിശോധിക്കും. അതേസമയം സ്വപ്ന ഇന്ന് ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിക്കും. വ്യാഴാഴ്ച കസ്റ്റംസിനു മുന്നില്‍ കീഴടങ്ങുമെന്നും സൂചനയുണ്ട്.

ദുബായില്‍ നിന്നെത്തിയ ബാഗ് കസ്റ്റംസ് തുറന്നതായി വിവരം കിട്ടിയപ്പോഴാണ് സ്വപ്‌ന ഒളിവില്‍ പോയത്. അതിന് തൊട്ടുമുന്‍പ് ബാഗ് വിട്ടു നല്‍കാന്‍ ആവശ്യപ്പെട്ട് അവരുടെ ഫോണില്‍ എത്തിയ വിളികള്‍ കസ്റ്റംസ് ശേഖരിച്ചു. കേരളത്തില്‍ നിന്നും കൊച്ചി, ഡല്‍ഹി, മുംബയ് എന്നിവിടങ്ങളില്‍ നിന്നും വിളികളെത്തി. ഉന്നതങ്ങളില്‍ നിന്നുള്ള വിളി വന്നപ്പോള്‍ ബഗേജ് പരിശോധിച്ചാല്‍ പണി തെറിക്കുമോ എന്ന് പോലും പല ഉദ്യോഗസ്ഥരും പേടിച്ചു. എന്നാല്‍ എന്തുതന്നെയായാലും ബാഗേജ് വിട്ടുകൊടുക്കേണ്ടതില്ലെന്നാണ് സുമിത് കുമാര്‍ തീരുമാനിച്ചത്. ബഗേജിന് വേണ്ടി വന്ന വിളികളെല്ലാം ശേഖരിക്കാനും നിര്‍ദേശം നല്‍കി. ഇത് വാര്‍ത്തയായതോടെയാണ് വിളിച്ചവര്‍ വീണ്ടും വിളിക്കാന്‍ ധൈര്യപ്പെടാതെ പത്തിമടക്കിയത്. അങ്ങനെയാണ് കൂടുതല്‍ ഇടപെടലുകള്‍ ഒഴിവാക്കാന്‍ കഴിഞ്ഞതും സ്വപ്നയുടേയും കൂട്ടരുടേയും കള്ളക്കളികള്‍ പുറത്തായതും.