മുഖ്യമന്ത്രിയുടെ ഓഫീസിന് പങ്കില്ലെന്ന് വരുത്തി മുഖ്യമന്ത്രി പിണറായി വിജയന് ക്ലിന്‍ ചീട്ട് നല്‍കാന്‍ ശ്രമിച്ച അന്വേഷണ ഉദ്യോഗസ്ഥന് പണികിട്ടി. കൊച്ചി കസ്റ്റംസ് ജോയിന്റ് കമ്മീഷായ അനീഷ് ബി. രാജിനെ കേസന്വേഷണത്തില്‍ നിന്നും കസ്റ്റംസ് ഒഴിവാക്കി. കേന്ദ്ര ആഭ്യന്തരമന്ത്രി അമിത് ഷായുടെ നിര്‍ദേശ പ്രകാരം കേന്ദ്ര ആഭ്യന്തര മന്ത്രാലയം ഇടപ്പെട്ടതിനെ തുടര്‍ന്നാണ് ഇയാളെ മാറ്റിയത്.

അനീഷ് ബി രാജിനെതിരെ കോണ്‍ഗ്രസും ബി.ജെ.പിയും രംഗത്തെത്തിയിരുന്നു. മുഖ്യമന്ത്രിയുടെ ഓഫീസില്‍ നിന്നും ആരെങ്കിലും വിളിച്ചിരുന്നോയെന്ന മാധ്യമങ്ങളുടെ ചോദ്യത്തിന് ആരും വിളിച്ചിട്ടില്ലെന്നും കേസ് അന്വേഷണഘട്ടത്തിലായതിനാല്‍ മറ്റൊന്നും വെളിപ്പെടുത്താനാവില്ലെന്നുമാണ് അനീഷ് രാജ് പറഞ്ഞത്. ഈ ഉദ്യോഗസ്ഥന്റെ സി.പി.എം ബന്ധമാണ് ഇയാളെക്കൊണ്ട് ഇങ്ങനെ പറയിപ്പിച്ചതെന്നാണ് പ്രധാന ആരോപണം. അനീഷ് ബി രാജിന്റെ സഹോദരന്‍ പി.ആര്‍ റെനീഷ് മുന്‍ സി.പി.എം വാര്‍ഡ് കൗണ്‍സിലറും ജില്ലാ ടൂറിസം പ്രൊമോഷന്‍ കൗണ്‍സില്‍ അംഗവുമാണ്. 2010-2015 കാലാളവിലാണ് പി.ആര്‍ റെനീഷ് കൊച്ചി കോര്‍പ്പറേഷന്‍ കൗണ്‍സിലറാകുന്നത്. അനീഷും കടുത്ത പാര്‍ട്ടി അനുഭാവിയുമാണ്. അദ്ദേഹത്തിന്റെ ചില ഫെയ്‌സ്ബുക്ക് പോസ്റ്റുകള്‍ പരിശോധിച്ചാല്‍ ഇക്കാര്യം വ്യക്താമാകും. കുടുംബം നവോത്ഥാന മതിലില്‍ പങ്കെടുത്തതിന്റെ ചിത്രവും പാര്‍ട്ടി അനുഭാവം പുലര്‍ത്തുന്ന മറ്റ് പോസ്റ്റുകളും കണാം. അതിനാല്‍ തന്നെ അനീഷിനെ കൊണ്ട് മുഖ്യമന്ത്രിയുടെ ഓഫീസിന് പങ്കില്ലെന്ന് പറയിച്ചതാണെന്നാണ് ആരോപണം.

ജോയിന്റ് കമ്മീഷ്ണര്‍ മാധ്യമങ്ങള്‍ക്ക് ഇത്തരത്തില്‍ ഒരു പ്രസ്താവന നല്‍കിയത് അന്വേഷണ ഉദ്യോഗസ്ഥനായ കസ്റ്റംസ് കമ്മീഷ്ണര്‍ സുമിത് കുമാറിനെ പ്രകോപിച്ചിരുന്നു. മാധ്യമങ്ങള്‍ക്ക് യാതൊരുവിധ പ്രസ്താവനകളും അനുമതി ഇല്ലാതെ നല്‍കരുതെന്ന നിര്‍ദേശം അനീഷ് പാലിച്ചില്ല. കഴിഞ്ഞ ദിവസം മാധ്യമങ്ഹളെ കാണുമെന്ന് കമ്മീഷ്ണര്‍ അറിയിച്ചിരുന്നതാണ്. അനീഷിന്റെ പ്രസ്താവനയില്‍ പ്രകോപിതനായ കമ്മീഷ്ണര്‍ പിന്നീട് മാധ്യമങ്ങളെ കണ്ടതുമില്ല. ഇതിനെ തുടര്‍ന്ന് നടപടി ആവശ്യപ്പെട്ട് കമ്മീഷ്ണര്‍ അനീഷിനെതിരെ മേല്‍ ഉദ്യോഗസ്ഥരെ സമീപിച്ചു. തുടര്‍ന്ന് ഉദ്യോഗസ്ഥന്റെ വിശദീകരണം കേട്ട ശേഷമാണ് കസ്റ്റംസിന്റെ പുതിയ തീരുമാനം. കേന്ദ്രസര്‍ക്കാര്‍ സ്വര്‍ണ കടത്ത് സി.ബി.ഐക്കൊണ്ട് അന്വേഷിക്കണോ എന്‍.ഐ.എ കൊണ്ട് അന്വേഷിപ്പിക്കണമോയെന്ന ആശയ കുഴപ്പത്തിലാണ്. ഇതിനിടെയാണ് അന്വേഷണത്തിന് തുരങ്കം വയ്ക്കുന്ന ഉദ്യോഗസ്ഥന്റെ നിലപാട്. ഇതിനെതിരെ ശക്തമായ നടപടിയെടുത്തതോടെ സ്വര്‍ണ കടത്ത് കേസില്‍ കേന്ദ്ര സര്‍ക്കാരിന്റെ നിലപാട് കൂടി വ്യക്തമാകുകയാണ്.