സ്വപ്‌നക്ക് യു.എ.ഇ കോണ്‍സിലേറ്റില്‍ ജോലി വാങ്ങി നല്‍കിയത് താനാണെ്‌ന ആരോപണം തെറ്റെന്ന് ശശി തരൂര്‍ എം.പി. തന്റെ ഫെയ്‌സ്ബുക്ക് പോസ്റ്റിലൂടെയാണ് അദ്ദേഹം ഇക്കാര്യം വ്യക്തമാക്കിയത്. കോണ്‍സുലേറ്റില്‍ തന്റെ ശുപാര്‍ശയില്‍ ആരെയും നിയമിച്ചിട്ടില്ല. ആരോപണങ്ങള്‍ നിശേധിച്ച അദ്ദേഹം ഇത്തരം ആരോപണങ്ങള്‍ക്കെതിരെ നിയമ നടപടി സ്വീകരിക്കുമെന്നും ഫെയ്‌സ്ബുക്ക് പോസ്റ്റുലൂടെ വ്യക്തമാക്കി.

ശശി തരൂര്‍ എം.പിയുടെ ഫെയ്‌സ്ബുക്ക് പോസ്റ്റിന്റെ പൂര്‍ണ രൂപം...

ഈ ആരോപണത്തില്‍ ശക്തമായ ഒരന്വേഷണം വേണമെന്നും കുറ്റക്കാരെ മാതൃകാപരമായി ശിക്ഷിക്കണമെന്നുമുള്ള ആവശ്യത്തെ ഞാന്‍ ശക്തമായി പിന്തുണക്കുന്നു. തിരുവനന്തരപുരത്ത് യു എ ഇ യുടെ ഒരു കോണ്‍സുലേറ്റ് തുറന്നു പ്രവര്‍ത്തിക്കുന്നതിന് വേണ്ടി പ്രവര്‍ത്തിച്ചു എന്നതില്‍ എനിക്കിന്നും അഭിമാനമുണ്ട്; കുറച്ച് അഴിമതിക്കാരായ ഉദ്യോഗസ്ഥര്‍ കാരണം അതിന്റെ മൂല്യം കുറഞ്ഞു പോകരുത്.
ഒരു കാര്യം വളരെ വ്യക്തമായി പറയാന്‍ ഞാനാഗ്രഹിക്കുന്നു: ഈ ഒരു വിഷയവുമായി എന്നെ ബന്ധപ്പെടുത്താനുള്ള ചില അവസരവാദികളോട് പറയാനുള്ളത് കോണ്‍സുലേറ്റില്‍ എന്റെ ശുപാര്‍ശയില്‍ ആരെയും നിയമിച്ചിട്ടില്ല; കുറ്റാരോപിതരെ ഞാന്‍ കണ്ടിട്ടില്ല; എനിക്ക് അവരുമായി യാതൊരു ബന്ധവുമില്ല.
കോണ്‍സുലേറ്റ് ഉദ്ഘാടനം ചെയ്യപ്പെട്ട 2016ല്‍ ഞാന്‍ കേന്ദ്രത്തിലും കേരളത്തിലും പ്രതിപക്ഷ കക്ഷിയുടെ എം പി ആയിരുന്നു. അത് കൊണ്ട് തന്നെ ഇപ്പറഞ്ഞ ആളുകളെ നിയമിക്കുന്ന കാലത്ത് ഞാന്‍ മന്ത്രിയായിരുന്നു എന്ന ആരോപണം തികച്ചും വാസ്തവവിരുദ്ധമാണ്. ഇത്തരം കളവ് പ്രചരിപ്പിച്ചുകൊണ്ട് എന്നെ സമൂഹത്തില്‍ കരിവാരിതേക്കാനുള്ള ശ്രമത്തെ നിയമപരമായി ഞാന്‍ നേരിടുന്നതാണ്.
ദേശീയ താല്പര്യത്തിന് വിരുദ്ധമായ വളരെ ഗുരുതരമായ കുറ്റമാണ് പ്രസ്തുത വിഷയത്തിലുള്ള ആരോപണങ്ങള്‍. അത് കൊണ്ട് തന്നെ ബഹുമാനപ്പെട്ട പ്രതിപക്ഷ നേതാവ് ശ്രീ രമേശ് ചെന്നിത്തലയുടെ സി ബി ഐ അന്വേഷണത്തിന് വേണ്ടിയുള്ള ആവശ്യത്തെ ഞാന്‍ ശക്തമായി പിന്തുണക്കുന്നു. കുറ്റാരോപിതരുടെ ഫോണ്‍ കാളുകളും കോണ്ടാക്ടുകളും പരിശോധിക്കാനും അങ്ങിനെ യഥാര്‍ത്ഥ പ്രതികളെ കണ്ടു പിടിക്കാനും കഴിയേണ്ടതുണ്ട്.
ഈ വിഷയത്തെ അതര്ഹിക്കുന്ന ഗൗരവത്തോടെ സമീപിക്കണമെന്നും കുറ്റക്കാരെ മാതൃകാപരമായി ശിക്ഷിക്കണമെന്നും തിരുവനന്തപുരത്തിന്റെ പാര്‍ലിമെന്റിലെ ജനപ്രതിനിധി എന്ന നിലയില്‍ ഞാന്‍ ശക്തിയായി ആവശ്യപ്പെടുന്നു. ഈ വിഷയവുമായി എനിക്ക് യാതൊരു തരത്തിലുള്ള ബന്ധവുമില്ലെങ്കിലും അധികാരികള്‍ ആവശ്യപ്പെട്ടാല്‍ ഞാനും എന്റെ ഓഫീസും അന്വേഷണവുമായി പൂര്‍ണ്ണമായി സഹകരിക്കുമെന്ന് ഞാന്‍ ഉറപ്പ് തരുന്നു.