നാട്ടുകാര്‍ നോക്കി നില്‍ക്കെ പട്ടാപ്പകല്‍ കെട്ടിടത്തിന് മുകളില്‍ ഫ്‌ലക്‌സ് ബോര്‍ഡ് അഴിയ്ക്കാന്‍ കയറിയ യുവാവ് കത്തിക്കരിഞ്ഞു. ആളെ തിരിച്ചറിഞ്ഞിട്ടില്ല. പത്ത് മണിയോടെ തൃശ്ശൂര്‍ പോസ്റ്റ് ഓഫീസ് റോഡിലാണ് നാടിനെ നടുക്കിയ സംഭവം ഉണ്ടായത്. പഴയ ഫ്‌ലക്‌സ് ബോര്‍ഡ് അഴിച്ചുമാറ്റി പുതിയ പരസ്യ ബോര്‍ഡ് സ്ഥാപിക്കാന്‍ ശ്രമിക്കുന്നതിനിടയിലാണ് യുവാവ് അപകടത്തില്‍ പെട്ടത്.

പരസ്യ ബോര്‍ഡിന് സമീപത്തെ വൈദ്യുത കമ്പിയില്‍ സ്പര്‍ശിച്ചത് മൂലമാകാം ഷോക്കേറ്റതെന്നാണ് പ്രാഥമിക നിഗമനം. നിമിഷങ്ങള്‍ക്കുള്ളില്‍ യുവാവ് കത്തിക്കരിഞ്ഞ് ചാരമായി മാറുകയായിരുന്നു. നാട്ടുകാര്‍ക്ക് ഇദ്ദേഹത്തെ രക്ഷിയ്ക്കാനായില്ല. പൊലീസും അഗ്‌നിശമന സേനയും സ്ഥലത്തെത്തി വൈദ്യുതി ബന്ധം വിച്ഛേദിച്ച ശേഷമാണ് മൃതദേഹം താഴെ ഇറക്കിയത്. അപ്പോഴും മൃതദേഹത്തില്‍ നിന്ന് പുക വമിക്കുന്നുണ്ടായിരുന്നു.