തിരുവനന്തപുരം വിമാനത്താവളത്തിൽ ഡിപ്ലോമാറ്റിക്​ ബാഗേജിലൂടെ സ്വർണം കടത്തിയ സംഭവം എൻ.ഐ.എ അന്വേഷിക്കും. കേസ്​ അന്വേഷിക്കാൻ കേന്ദ്ര ആഭ്യന്തര മന്ത്രാലയം എൻ.ഐ.എക്ക്​ അനുമതി നൽകി. രാജ്യസുരക്ഷക്ക്​ സ്വർണക്കടത്ത്​ ഭീഷണിയാണെന്ന്​ ചൂണ്ടിക്കാട്ടിയാണ്​ അനുമതി.

അതേസമയം, കേസിൽ വിവിധ കേന്ദ്ര ഏജൻസികൾ കേരള പൊലീസി​​െൻറ സഹായം തേടിയതായും റിപ്പോർട്ടുകളുണ്ട്​. സ്വപ്​ന സുരേഷിനേയും സന്ദീപ്​ നായരേയും കണ്ടെത്താനാണ്​ പൊലീസ്​ സഹായം തേടിയതെന്ന്​ വാർത്താ ഏജൻസി റിപ്പോർട്ട്​ ചെയ്യുന്നു. ഒളിവിലുള്ള ഇരുവരേയും കണ്ടെത്താൻ നിലവിൽ കേസ്​ അന്വേഷിക്കുന്ന കസ്​റ്റംസിന്​ സാധിച്ചിട്ടില്ല.

സ്വർണക്കടത്ത്​ കേസിൽ സമഗ്രമായ അന്വേഷണം കേന്ദ്രം നടത്തണമെന്ന്​ മുഖ്യമന്ത്രി പിണറായി വിജയനും വ്യക്തമാക്കി. സ്വർണക്കടത്ത്​ നമ്മുടെ നാടി​​െൻറ സാമ്പത്തിക അവസ്​ഥ തകർക്കുന്നതാണെന്നും അദ്ദേഹം പറഞ്ഞു. വാർത്താ സമ്മേളനത്തിൽ മാധ്യമപ്രവർത്തകരുടെ ചോദ്യങ്ങൾക്ക്​ മറുപടി പറയുകയായിരുന്നു അദ്ദേഹം.

കേന്ദ്രം നടത്തുന്ന അന്വേഷണത്തിന്​ ആവശ്യമായ എല്ലാ പിന്തുണയും സഹായവും കൊടുക്കാൻ സംസ്​ഥാനം തയാറാണെന്നും മുഖ്യമന്ത്രി പറഞ്ഞു. സ്വർണക്കടത്തിന്​ പിറകിലുള്ള എല്ലാവരെയും പിടികൂടേണ്ടതുണ്ടെന്നും അദ്ദേഹം പറഞ്ഞു.