വലിയ നിലയില്‍ കഴിഞ്ഞിരുന്ന സ്വപ്ന സുരേഷ് സ്വര്‍ണക്കടത്ത് കേസില്‍ പിടിയിലായ ശേഷം കഴിച്ചു കൂട്ടിയ ആദ്യ രാത്രി സംഭവ ബഹുലമായിരുന്നു. കോവിഡ് സംശയമുള്ളതിനാല്‍ സ്വപ്‌ന സുരേഷിനെ തൃശൂര്‍ അമ്പിളിക്കലയിലെ കോവിഡ് നിരീക്ഷണ കേന്ദ്രത്തിലാണ് താമസിപ്പിച്ചത്. ഏതാണ്ട് ജയിലിന് സമാനമായ അന്തരീക്ഷമാണ് അമ്പിളിക്കലയിലും ഒരുക്കിയിരുന്നത്. കോവിഡ് കാലത്ത് അറസ്റ്റിലാകുന്ന പ്രതികളെ ആദ്യം പാര്‍പ്പിക്കുന്ന കേന്ദ്രങ്ങളിലൊന്നാണ് അമ്പിളിക്കലയിലേത്. പരിശോധനാഫലം നെഗറ്റീവെന്ന് തെളിഞ്ഞാല്‍ മാത്രമേ അന്വേഷണ ഏജന്‍സികള്‍ക്കോ ജയിലിലേക്കോ കൈമാറുകയുള്ളൂ. പിടിയിലാകും മുമ്പ് സ്വപ്‌ന ആത്മഹത്യാ ഭീഷണി മുഴക്കിയതിനാല്‍ കര്‍ശന സുരക്ഷയാണ് ഒരുക്കിയത്.

ആ രാത്രി സ്വപ്ന സുരേഷ് കഴിഞ്ഞത് പ്രമാദമായ കൊലക്കേസ് പ്രതിയായ യുവതിയ്‌ക്കൊപ്പമാണ്. തൊഴിലന്വേഷിച്ച് എത്തിയ യുവാവിനെ ഫ്‌ളാറ്റില്‍ കൊലപ്പെടുത്തിയ കേസില്‍ കുറ്റക്കാരിയെന്ന് കണ്ടെത്തിയ ശാശ്വതി പ്രമോദിന്റെ മുറിയിലാണ് സ്വപ്‌ന കഴിഞ്ഞത്.

പ്രമുഖ ചാനലിയെ റിയാലിറ്റി ഷോയിലൂടെ ശ്രദ്ധ നേടിയ ശാശ്വതി പ്രമോദിന്റെ കഥ രക്തം മരവിപ്പിക്കുന്നതാണ്. തൃശൂര്‍ അയ്യന്തോള്‍ പഞ്ചിക്കലിലെ ഫ്‌ളാറ്റില്‍ കൊല്ലപ്പെട്ട ഷൊര്‍ണൂര്‍ സ്വദേശി സതീശന്റെ കൊലപാതകത്തിലാണ് 36 വയസുള്ള ശാശ്വതി പിടിയിലായത്. സതീശനെ മുറിയില്‍ കെട്ടിയിട്ട് അലക്കുകല്ലിന് അടിച്ചുകൊന്നത് താനാണെന്ന് ശാശ്വതി പോലീസില്‍ സമ്മതിക്കുകയും ചെയ്തു.

കേസിലെ പ്രതിയും യുവ നേതാവുമായ റഷീദടക്കം മൂന്നുപേരുമായി ഒരേസമയം യുവതിക്കുണ്ടായിരുന്ന ബന്ധമാണു കൊലപാതകത്തിലേക്കു നയിച്ചത്. ശാശ്വതിക്ക് 5 വയസുള്ള കുട്ടിയുണ്ട്. ഭര്‍ത്താവുമായി ഉടക്കി വിവാഹിതനും ഒരു കുട്ടിയുടെ പിതാവുമായ റഷീദിനൊപ്പമായിരുന്നു താമസം.

റഷീദുമായി കുടുംബ ജീവിതം പ്ലാന്‍ ചെയ്ത ശാശ്വതി റഷീദിനേയും വഞ്ചിച്ച് കൊല്ലപ്പെട്ട സതീശനോടും രണ്ടാംപ്രതി കൊടകര വാസുപുരം സ്വദേശി കൃഷ്ണപ്രസാദുമായും ബന്ധം പുലര്‍ത്തിയിരുന്നു. എന്നാല്‍ പരസ്പരം അറിയാതെയാണ് ബന്ധം പുലര്‍ത്തിയത്. ഇതിന് ഇടിവ് വന്നതോടെയാണ് കൊലപാതകത്തില്‍ കലാശിച്ചത്.

സതീശനും താനുമായുള്ള ബന്ധം തൊഴിലന്വേഷിച്ച് വന്ന് കാമുകനായി മാറിയ സതീഷ് റഷീദിനോട് പറഞ്ഞതാണ് മര്‍ദ്ദിക്കാന്‍ ഇടയായതെന്ന് ശാശ്വതി പറയുന്നു. ശാശ്വതിയും താനുമായി ബന്ധമുണ്ടെന്ന് സതീശന്‍ റഷീദിനെ അറിയിച്ചതില്‍ കുപിതയായ ശാശ്വതി സതീശനെ മറ്റുപ്രതികള്‍ക്കൊപ്പം ചേര്‍ന്ന് കെട്ടിയിടുകയും ക്രൂരമായി മര്‍ദ്ദിക്കുകയുമായിരുന്നു.

സംഭവദിവസം താന്‍ കഴിച്ച ബിയറില്‍ ആരോ മദ്യം കലര്‍ത്തിയിരുന്നെന്നും അതിന്റെ ലഹരിയിലാണു സതീശനെ മര്‍ദിച്ചതെന്നും ശാശ്വതി പോലീസില്‍ നല്‍കിയ മൊഴിയില്‍ പറയുന്നു. മൂന്നുദിവസം ഫ്‌ളാറ്റില്‍ കെട്ടിയിട്ട് മര്‍ദിച്ചുവെന്നാണ് ശാശ്വതിയുടെ മൊഴി. ബാത്ത്‌റൂമില്‍ തുണികള്‍ അലക്കാന്‍ ഉപയോഗിച്ച കല്ലുകൊണ്ടു സതീശന്റെ മുതുകത്ത് ആഞ്ഞടിച്ചതാണ് മരണത്തിന് കാരണമായത്. ശരീരം ചതഞ്ഞു രക്തം കട്ടപിടിച്ചാണ് മരണം സംഭവിച്ചതെന്നു പോസ്റ്റ്‌മോര്‍ട്ടം റിപ്പോര്‍ട്ടിലും വ്യക്തമായിരുന്നു. അതേസമയം ശാശ്വതി മദ്യത്തിനും ലഹരിമരുന്നിനും അടിമയായിരുന്നു എന്നാണ് പോലീസ് പറയുന്നത്.

കേസില്‍ പ്രതിയായ ശാശ്വതിയേയും കോവിഡ് നിരീക്ഷണത്തിനായാണ് അമ്പിളിക്കലയിലെ കോവിഡ് നിരീക്ഷണ കേന്ദ്രത്തില്‍ താമസിപ്പിച്ചത്. ഒറ്റ രാത്രി മാത്രമേ സ്വപ്നയ്ക്ക് ശാശ്വതിയുമായി കഴിയേണ്ടി വന്നുള്ളൂ. കോവിഡ് ഫലം നെഗറ്റീവായതിനെ തുടര്‍ന്ന് സ്വപ്നയിപ്പോള്‍ എന്‍ഐഎ കസ്റ്റഡിയിലാണ്. അതേസമയം ജിവീതത്തില്‍ മറക്കാന്‍ പറ്റാത്ത രാത്രിയായി മാറി അമ്പിളിക്കലയും ശാശ്വതി പ്രമോദും.