കനത്ത മഴയെ തുടർന്ന് മൂന്നാർ രാജമല മണ്ണിടിച്ചിലിൽ അഞ്ച് പേർ മരിച്ചു. മണ്ണിനടിയിൽനിന്ന് നാലു പേരുടെ മൃതദേഹങ്ങളാണ് ഇതുവരെ ലഭിച്ചത്. പത്തു പേരെ രക്ഷപെടുത്തി. എൻഡിആർഎഫ് സംഘം ഏലപ്പാറയിൽനിന്നു രാജമലയിലേക്കു തിരിച്ചു

തോട്ടം തൊഴിലാളികള്‍ താമസിക്കുന്ന ലയത്തിനു മുകളിലേയ്ക്കാണ് മണ്ണിടിഞ്ഞത്. എണ്‍പതോളം പേരാണ് ലയങ്ങളില്‍ താമസിച്ചിരുന്നതെന്നും എഴുപതോളം പേര്‍ മണ്ണിനടിയില്‍ കുടുങ്ങിയിട്ടുണ്ടെന്നുമാണു സംശയിക്കുന്നത്. മണ്ണിനടിയില്‍നിന്നു പുറത്തെടുത്തവരെ മൂന്നാര്‍ കണ്ണന്‍ദേവന്‍ ആശുപത്രിയില്‍ എത്തിച്ചതായും റിപ്പോര്‍ട്ടുണ്ട്. വ്യാഴാഴ്ച പുലര്‍ച്ചെ രണ്ടുമണിയോടെയാണ് രാജമല മേഖലയില്‍ ഉരുള്‍പൊട്ടല്‍ ഉണ്ടായത്

അഞ്ചു ലയങ്ങള്‍ മണ്ണിനടിയില്‍ പെട്ടതായി ഇരവികുളം പഞ്ചായത്ത് അംഗം ഗിരി അറിയിച്ചു. പോലീസും ഫയര്‍ ഫോഴ്സും സ്ഥലത്തേയ്ക്ക് തിരിച്ചെന്നാണ് വിവരം. എന്നാൽ അപകടസ്ഥലത്തേയ്ക്ക് രക്ഷാപ്രവര്‍ത്തകര്‍ക്ക് എത്താൻ പ്രയാസമുണ്ടെന്നാണ് റിപ്പോര്‍ട്ടുകള്‍. ദിവസങ്ങളായി മേഖലയിൽ കനത്ത മഴ തുടരുകയാണ്. ഇവിടെ നിന്ന് തോട്ടം തൊഴിലാളികളോട് മാറി താമസിക്കാൻ നിര്‍ദേശം നല്‍കിയിരുന്നതായി ചില മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. മൂന്നാറില്‍ നിന്ന് 30 കിലോ മീറ്റര്‍ അകലെയാണ് ഈ പ്രദേശം. സംരക്ഷിതപ്രദേശമായ ഇവിടേയ്ക്ക് റോഡ് സൗകര്യത്തിന്റെ അപര്യാപ്തതയുണ്ട്

വൈദ്യുതി ഇല്ലാത്തതിനാല്‍ വിവരങ്ങള്‍ ലഭിക്കാനും പ്രയാസമാണ്. തമിഴ് തൊഴിലാളികളാണ് ഇവിടെ കൂടുതലായും താമസിക്കുന്നത്. തകർന്ന പെരിയവര പാലം ശരിയാക്കി. താൽക്കാലികമായുള്ള ഗതാഗതസാധ്യതയാണ് തയാറാക്കിയത്. രക്ഷാപ്രവര്‍ത്തനത്തെ ഇതു സഹായിച്ചേക്കുമെന്നാണ് വിലയിരുത്തൽ... പുതിയ പാലത്തിന്റെ നിര്‍മ്മാണം പൂര്‍ത്തിയായിട്ടില്ല. കഴിഞ്ഞ ദിവസമുണ്ടായ മഴയില്‍ താത്ക്കാലിക പാലവും തകര്‍ന്നതോടെ പ്രദേശം പൂര്‍ണമായും ഒറ്റപ്പെട്ടു.

സ്ഥലത്ത് ബിഎസ്എൻഎൽ മൊബൈൽ ടവർ തകരാറിലായതു മൂലം ആശയവിനിമയത്തിലും പ്രശ്നങ്ങളുണ്ട്. സ്ഥലത്തേയ്ക്ക് പോലീസും ഫയർ ഫോഴ്സും പുറപ്പെട്ടിട്ടുണ്ടെന്നും ഉടൻ തന്നെ അവർ സ്ഥലത്തെത്തുമെന്നും ദേവികുളം സബ് കളക്ടർ മാധ്യമങ്ങളോടു പറഞ്ഞു. ഇന്നലെ രാത്രിയാണ് മണ്ണിടിച്ചിലുണ്ടായതെന്നാണ് റിപ്പോർട്ട്. രാവിലെ കമ്പനി അധികൃതരാണ് വിവരം പുറത്ത് അറിയിച്ചത്