കോവിഡ് കാലത്ത് സംസ്ഥാനത്ത് കർശന നിയന്ത്രണമാണ് സർക്കാർ ഒരുക്കിയിരുന്നത് എന്നായിരുന്നു അനുമാനം. പ്രത്യേകിച്ച് അതിർത്തി പ്രദേശങ്ങളിൽ. കോവിഡ് വ്യാപനത്തിന്റെ ആദ്യ ഘട്ടങ്ങളിൽ അതിർത്തി കടക്കാൻ കഴിയാതെ കാത്തിരുന്നവർ നിരവധിയാണ്. ഇതിൽ ആശുപത്രിയിൽ എത്താൻ കഴിയാതെ ജീവൻ പൊലിഞ്ഞവരും ഉൾപ്പെടുന്നു.

എന്നാൽ സാധാരണക്കാർ ഇത്തരത്തിലുള്ള ദുരിതങ്ങൾ അനുഭവിക്കുമ്പോൾ കൊവിഡ് സമയത്തെ നിയന്ത്രണങ്ങളും കര്‍ശന പരിശോധനയും മറികടന്ന് സ്വപ്നയ്ക്ക് കേരളം വിട്ട് ബംഗളൂരുവിലേക്ക് പോകാന്‍ കഴിഞ്ഞത് സ്വപ്‌നയ്ക്ക് സംസ്ഥാന സര്‍ക്കാരിലും പൊലിസിലുമുള്ള വലിയ സ്വാധീനം കൊണ്ട്.

ചെക്ക് പോസ്റ്റുകളില്‍ സ്വന്തം പേരില്‍ സ്വപ്‌ന പാസെടുത്തത് പിടിക്കപ്പെടില്ലെന്ന് ഉറപ്പുള്ളത് കൊണ്ടായിരുന്നു. രോഗികളെ പോലും ചെക്ക് പോസ്റ്റില്‍ പരിശോധിക്കുമ്ബോഴാണ് സ്വപ്ന ഒരു തടസവും കൂടാതെ ബംഗളൂരുവില്‍ എത്തിയതെന്നും കസ്‌റ്റംസ് കോടതിയെ അറിയിച്ചു

ചെക്ക് പോസ്റ്റില്‍ സ്വന്തം ഐ.ഡി കാര്‍ഡ് കാണിച്ചിട്ടും സ്വപ്നയെ പൊലീസ് പിടികൂടിയില്ല. കൂട്ട് പ്രതിയ്‌ക്കൊപ്പം സ്വപ്‌ന ബംഗളൂരുവിലേക്ക് കടന്നത് ഗൂഢാലോചനയുടെ തെളിവാണ്. തെറ്റ് ചെയ്തിട്ടില്ലെങ്കില്‍ സ്വപ്നയ്ക്ക് സംസ്ഥാനം വിടേണ്ട ആവശ്യം ഉണ്ടായിരുന്നില്ല. എന്നാല്‍ ഭര്‍ത്താവും മക്കള്‍ക്കും ഒപ്പമായിരുന്നു തന്റെ യാത്രയെന്ന് സ്വപ്ന കോടതിയില്‍ പറഞ്ഞു. തെറ്റ് ചെയ്തതു കൊണ്ടാണ് സംസ്ഥാനം വിട്ടതെന്നത് കസ്റ്റംസിന്റെ അനുമാനമാണ്. കസ്റ്റംസിന്റെ അനുമാനവും തന്റെ ഉദ്ദേശ്യവും ഒന്നല്ലെന്നും സ്വ‌പ്‌ന കോടതിയെ അറിയിച്ചു.

ഒളിവില്‍ പോകാനായി തിരുവനന്തപുരത്ത് നിന്ന് സ്വപ്ന നേരെ എത്തിയത് വര്‍ക്കലയിലെ പണിതീരാത്ത റിസോര്‍ട്ടിലാണ്. അവിടെ പ്രാദേശിക നേതാവിനെ കണ്ടതോടെ അന്ന് രാത്രി തന്നെ എറണാകുളത്തേക്ക് കടന്നു. അവിടെ വച്ച്‌ അഭിഭാഷകനെ കണ്ട ശേഷമാണ് ബംഗളൂരുവിലേക്ക് പോയതെന്നും കസ്റ്റംസ് കോടതിയില്‍ വ്യക്തമാക്കി. സ്വപ്നയുടെ പേരിലുള്ള നീല എസ്-ക്രോസ് വാഹനത്തിലായിരുന്നു യാത്രകളെല്ലാം നടന്നത്. അതിനു ശേഷവും സംസ്ഥാനത്ത് ഒരിടത്ത് പോലും പൊലീസ് പരിശോധന നടത്തുകയോ പിടികൂടുകയോ ചെയ്തില്ലെന്നും കസ്റ്റംസ് കോടതിയെ അറിയിച്ചു.

നിറം പിടിപ്പിച്ച മാധ്യമ കഥയല്ലാതെ സ്വര്‍ണ്ണക്കടത്ത് കേസില്‍ ഒന്നുമില്ലെന്ന സ്വപ്നയുടെ വാദത്തിന്‍റെ മുന ഒടിക്കാനാണ് കസ്റ്റംസ് ഗൂഢാലോചനയുടെ വിവരങ്ങള്‍ കോടതിയില്‍ വെളിപ്പെടുത്തിയത്. പ്രതികള്‍ തിരുവനന്തപുരത്ത് വിവിധ സ്ഥലങ്ങളില്‍ വച്ച്‌ ഗൂഢാലോചന നടത്തിയിട്ടുണ്ട്. ഡിപ്ലൊമാറ്റിക് ബാഗേജ് തടഞ്ഞ് വച്ച ജൂലൈ 5 ന് രാത്രി ഒരു മണിക്ക് പ്രതികള്‍ സ്വപ്ന താമസിച്ച ഫ്ലാറ്റില്‍ ഒത്തുകൂടി.

ഇതുവരെ അറസ്റ്റു ചെയ്യാത്തതും കേസില്‍ പങ്കാളിത്തമുണ്ടെന്ന് സംശയിക്കുന്നതുമായ ഒരാളും ഈ സമയത്ത് ഇവര്‍ക്ക് ഒപ്പമുണ്ടായിരുന്നുവെന്ന് കസ്റ്റംസ് കോടതിയില്‍ വ്യക്തമാക്കി. ഇവരുടെ കൂടിക്കാഴ്ച പ്രാര്‍ത്ഥിക്കാനോ കോവിഡ് പ്രശ്നം ചര്‍ച്ച ചെയ്യാനോ ആയിരുന്നില്ലെന്ന് പരിഹാസരൂപത്തില്‍ കസ്റ്റംസ് അഭിഭാഷകന്‍ രാംകുമാര്‍ പറഞ്ഞു. മുഖ്യമന്ത്രിയുടെ മുന്‍ പ്രിന്‍സിപ്പല്‍ ശിവശങ്കരനുമായും സ്വപ്ന പല പ്രാവശ്യം കൂടിക്കാഴ്ച നടത്തിയിട്ടുണ്ട്. എന്നാല്‍ ഇവരുടെ കൂടിക്കാഴ്ചയില്‍ അസ്വാഭാവികത ഇല്ലെന്നായിരുന്നു പ്രതിഭാഗത്തിന്‍റെ വാദം. രണ്ടു പേര്‍ കൂടിക്കാണുന്നത് എങ്ങനെ ഗൂഢാലോചനയാണെന്ന് പറയുമെന്നും സ്വപ്നയുടെ അഭിഭാഷകന്‍ ചോദിച്ചു.