ലോകം തന്നെ കൊറോണയുടെ പിടിയിലാണ്. ഈ സമയത്ത് ആരും ആരേയും രക്ഷിക്കാന്‍ സ്വ രക്ഷ നോക്കുന്ന കാലമാണ്. എന്നാല്‍ കൊറോണയെപ്പോലും തോല്‍പ്പിച്ച് കൊണ്ടോട്ടിക്കാര്‍ മാതൃകയാകുകയാണ്. സ്വന്തം ജീവനോ മാസ്‌കോ സുരക്ഷാ മുന്‍കരുതലുകളോ ഒന്നും ഇല്ലാതെ അവര്‍ രക്ഷാ പ്രവര്‍ത്തകരായി ഓടിയെത്തുകയാണ് ഉണ്ടായത്. വിമാനത്താവളത്തിന്റെ മതിലിനുള്ളിലായിരുന്നു അപകടമായതിനാല്‍ ആദ്യം കയറാന്‍ ബുദ്ധിമുട്ടി. അവസാനം അധികൃതര്‍ തന്നെ ഗേറ്റ് തുറന്ന് കൊടുത്തു. കിട്ടിയ വാഹനങ്ങളില്‍ അവര്‍ അപകടത്തില്‍ പെട്ടവരെ ആശുപത്രികളിലെത്തിച്ചു. അവര്‍ തന്നെയാണ് വാട്‌സാപ്പ് ഗ്രൂപ്പുകളിലൂടെ സന്നദ്ധപ്രവര്‍ത്തകരെ വിളിച്ച് വരുത്തിയത്.

കൊണ്ടോട്ടിയും വിമാനത്താവളവുമടങ്ങുന്ന പ്രദേശം കണ്ടെയിന്‍മെന്റ് സോണിലാണെങ്കിലും ജനങ്ങള്‍ക്ക് രക്ഷകരാകാന്‍ അതൊരു പ്രശ്‌നമേ അല്ലായിരുന്നു. രാത്രിയും മഴയും ഒന്നും വകവയ്ക്കാതെയാണ് വലിയൊരു ശബ്ദം കേട്ടപ്പോള്‍ അവര്‍ ഓടിയെത്തിയത്. വന്ദേഭാരത് മിഷന്റെ ഭാഗമായി വന്ന ആളുകളാണ്. പലര്‍ക്കും രോഗബാധ ഉണ്ടായിരുന്നിരിക്കണം. അതൊന്നും അവര്‍ കണക്കിലെടുത്തില്ല. അവര്‍ ഓടിയെത്തി രക്ഷാപ്രവര്‍ത്തനത്തില്‍ ഏര്‍പ്പെട്ടു. പരുക്കേറ്റവരെ ആശുപത്രിയില്‍ എത്തിക്കാനും കുഞ്ഞുങ്ങളെ മാതാപിതാക്കളെ ഏല്‍പ്പിക്കാനും അവര്‍ മുന്‍പന്തിയില്‍ നിന്നു.

രക്ഷാപ്രവര്‍ത്തനത്തില്‍ എടുത്തുപറയേണ്ട സാന്നിധ്യമായിരുന്നു നാട്ടുകാര്‍. വിമാനത്താവളത്തിനുള്ളില്‍ കയറി നാട്ടുകാര്‍ ആദ്യ ഘട്ടം മുതല്‍ നടത്തിയത് സജീവ ഇടപെടലുകളാണ്. ആംബുലന്‍സുകള്‍ക്ക് കാത്തുനില്‍ക്കാതെ കിട്ടിയ വാഹനങ്ങളിലെല്ലാം പരുക്കേറ്റവരെ ആശുപത്രിയിലെത്തിക്കാന്‍ ജനം മുന്നിട്ടിറങ്ങി. പ്രളയകാലത്തെ ചേര്‍ത്തുപിടിക്കലുകള്‍ പോലെ കര്‍മരംഗത്തേക്കിറങ്ങിയ ഒരുകൂട്ടം ആളുകളാണ് വലിയൊരു ദുരന്തം ആകുമായിരുന്ന കരിപ്പൂര്‍ വിമാന ദുരന്തത്തിന്റെ ആഘോതം തടഞ്ഞു നിര്‍ത്തിയത്.

നാട്ടുകാരെ സംബന്ധിച്ച് വന്‍ പേടിയോടെയാണ് സംഭവം ഓര്‍ക്കുന്നത്. വലിയ 2 സ്‌ഫോടന ശബ്ദങ്ങള്‍ കേട്ടാണ് ഓടിച്ചെന്നത്. ക്രോസ് റോഡില്‍ വിമാനത്താവള വളപ്പിന്റെ മതില്‍ തകര്‍ത്ത് വിമാനത്തിന്റെ ഒരു ഭാഗം പുറത്തേക്കു കാണാമായിരുന്നു. ഒപ്പം നിലവിളികളും ഉയര്‍ന്നു കേട്ടു. കാര്യമായി പരുക്കേല്‍ക്കാത്ത യാത്രക്കാര്‍ പലരും എമര്‍ജന്‍സി വാതില്‍ വഴിയും മറ്റും പുറത്തേക്ക് ഇറങ്ങുന്നുണ്ടായിരുന്നു.

വിമാനം വീണതിനു തൊട്ടടുത്ത് അകത്തേക്കു കയറാനുള്ള വലിയ ഗേറ്റുണ്ട്. അതു സുരക്ഷാ ഉദ്യോഗസ്ഥര്‍ തുറക്കാത്തതിനാല്‍ ഏറെ നേരം പുറത്തുനില്‍ക്കേണ്ടിവന്നു. പിന്നീട് ഗേറ്റ് തുറന്നെങ്കിലും അകത്തേക്കു കയറ്റി വിട്ടില്ല. ആ സമയം, അഗ്‌നിരക്ഷാസേനയുടെ ഒരു വാഹനവും ഒരു ആംബുലന്‍സും ആണ് അവിടെ ഉണ്ടായിരുന്നത്. എന്നാല്‍, യാത്രക്കാര്‍ പുറത്തിറങ്ങി നിന്ന ഭാഗത്തേക്ക് ആംബുലന്‍സിനും ഫയര്‍ ഫോഴ്‌സ് വാഹനത്തിനും എത്താനായില്ല.

റണ്‍വേയ്ക്കു ചുറ്റുമുള്ള ലിങ്ക് റോഡ് വഴി ആംബുലന്‍സും ഫയര്‍ എന്‍ജിനും എത്തിയതു വിമാനത്തിന്റെ മറുഭാഗത്തേക്കായിരുന്നു. ഈ സമയം, അവിടെയെത്തിയ മലയാളികളായ ഉദ്യോഗസ്ഥരോട് ഞങ്ങളുടെ സേവനം ആവശ്യമാണോ എന്നു ചോദിച്ചപ്പോള്‍ അവരാണ് അകത്തേക്കു കയറ്റിവിട്ടത്. ഉടന്‍ പ്രദേശവാസികളുടെ സ്വകാര്യ വാഹനങ്ങള്‍ എത്തിച്ച് യാത്രക്കാരെ ആശുപത്രികളിലേക്ക് കൊണ്ടുപോയി. പിന്നീട് പൊലീസും കൂടുതല്‍ ആംബുലന്‍സുകളും അഗ്‌നിരക്ഷാസേനയുടെ വാഹനങ്ങളും എത്തി. കണ്ടെയ്ന്‍മെന്റ് സോണ്‍ ആയതിനാല്‍ റോഡുകള്‍ അടച്ചതും ആദ്യം പ്രയാസമുണ്ടാക്കി.

അങ്ങനെ കൊണ്ടോട്ടി ഗ്രാമത്തിലെ ജനങ്ങളുടെ നന്മ ലോകത്തിന് തന്നെ മാതൃകയാകുകയാണ്. ഒരപകടം വന്നാല്‍ രക്ഷാ പ്രവര്‍ത്തനത്തില്‍ ഒട്ടും പിന്നില്‍ നില്‍ക്കുന്നവരല്ല മലയാളികള്‍. ആ ഒരു മഹത്തായ സന്ദേശമാണ് കൊണ്ടോട്ടിക്കാരെ ഈയവസരത്തില്‍ എല്ലാവരും നെഞ്ചിലേറ്റുന്നത്. ഒരിക്കലും മരിക്കാത്ത കൊണ്ടോട്ടി നന്മ.