സംസ്ഥാനത്ത് ദുരന്തം വിതച്ച് കനത്ത മഴ തുടരുന്നു... നാല് ജില്ലകളില് റെഡ് അലര്ട്ട് പ്രഖ്യാപിച്ചു, പെട്ടിമുടി രാജമല ദുരന്തഭൂമിയില് രണ്ടാം ദിവസത്തെ തിരച്ചില് തുടങ്ങി
സംസ്ഥാനത്ത് ദുരന്തം വിതച്ച് കനത്ത മഴ തുടരുന്നു. ഉരുള്പൊട്ടലിലും മണ്ണിടിച്ചിലിലും നിരവധി ജീവനുകളാണ് കഴിഞ്ഞ ദിവസങ്ങളില് പൊലിഞ്ഞത്. ഇന്നും നാല് ജില്ലകളില് റെഡ് അലര്ട്ട് പ്രഖ്യാപിച്ചിരിക്കുകയാണ്. ഇടുക്കി, തൃശൂര്, പാലക്കാട്, വയനാട് ജില്ലകളിലാണ് റെഡ് അലര്ട്ട്. 8 ജില്ലകളില് ഓറഞ്ച് അലര്ട്ടായിരിക്കും. അടുത്ത മൂന്നുമണിക്കൂറിനിടെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് എന്നീ ജില്ലകളില് ചിലയിടങ്ങളില് മണിക്കൂറില് 40 കിലോമീറ്റര് വരെ വേഗതയിലുള്ള കാറ്റിനും മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥാവകുപ്പ് .
പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂര്, കാസര്ഗോഡ് ജില്ലകളിലാണ് ഓറഞ്ച് അലര്ട്ട്. നാളെ ബംഗാള് ഉള്ക്കടലില് പുതിയ ന്യൂനമര്ദം രൂപപ്പെടാന് സാധ്യതയുണ്ട്. ഇത് ശക്തമാവാന് സാധ്യതയില്ലെന്നും കാലാവസ്ഥ നിരീക്ഷണ കേന്ദ്രം വ്യക്തമാക്കി. പല ജില്ലകളിലും പ്രളയസാഹചര്യമാണുള്ളത്. താഴ്ന്ന പ്രദേശങ്ങളെല്ലാം പൂര്ണമായും വെള്ളത്തിലായി. ദുരിതബാധിതരെ ക്യാംപുകളിലേക്ക് മാറ്റിക്കൊണ്ടിരിക്കുകയാണ്.
കനത്ത മഴയില് ഉരുള് പൊട്ടിയതിനെത്തുടര്ന്ന് നദികളിലെ ജലനിരപ്പ് ഉയര്ന്നതാണ് പ്രതിസന്ധി രൂക്ഷമാക്കിയത്. സംഭരണശേഷി കവിഞ്ഞതിനെത്തുടര്ന്ന് ഡാമുകളുടെ ഷട്ടറുകള് തുറന്നു. ഇതും വെള്ളപ്പൊക്കത്തിനിടയാക്കിയിട്ടുണ്ട്. മുല്ലപ്പെരിയാര് ഡാമിന്റെ ജലനിരപ്പ് അപകടരമാംവിധം ഉയരുകയാണ്. അണക്കെട്ടിലെ ജലനിരപ്പ് 132 അടിയിലെത്തിയതോടെ ആദ്യ ജാഗ്രതാ നിര്ദേശം പുറപ്പെടുവിച്ചു. 136 അടിയിലെത്തിയാല് രണ്ടാം നിര്ദേശം നല്കും. 142 അടിയാണ് അണക്കെട്ടിലെ അനുവദനീയമായ സംഭരണശേഷി. ഈ ഘട്ടത്തിലെത്തിയാല് സ്പില്വെഷട്ടറുകളിലൂടെ വെള്ളം പുറത്തേക്ക് ഒഴുക്കും. പെരിയാറിന്റെ തീരത്തുള്ളവര് അതീവ ജാഗ്രത പുലര്ത്തണമെന്നാണ് ജില്ലാ ഭരണകൂടത്തിന്റെ അറിയിപ്പ്. ചപ്പാത്ത്, വള്ളക്കടവ്, ഉപ്പുതറ തുടങ്ങിയ മേഖലകളിലെ ആളുകളെ മാറ്റിപ്പാര്പ്പിക്കാനുള്ള നടപടികളും തുടങ്ങിക്കഴിഞ്ഞു. മഴ കനത്തതോടെ രണ്ടുദിവസത്തിനിടെ പത്ത് അടിയോളം വെള്ളമാണ് അണക്കെട്ടില് ഉയര്ന്നത്. സെക്കന്റില് പതിനാലായിരം ഘനയടി വെള്ളമാണ് അണക്കെട്ടിലേക്ക് ഒഴുകിയെത്തുന്നത്.
അതേസമയം, 18 പേര് മരണപ്പെട്ടതായി സ്ഥിരീകരിച്ച പെട്ടിമുടി രാജമല ദുരന്തഭൂമിയില് രണ്ടാം ദിവസത്തെ തിരച്ചില് തുടങ്ങി. അരക്കോണത്തുനിന്നുള്ള 58 അംഗ എന്ഡിആര്എഫ് സംഘമാണ് തിരച്ചിലിന് നേതൃത്വം കൊടുക്കുന്നത്. മന്ത്രി എം എം മണി ഉടന് മൂന്നാറിലെത്തും
"
https://www.facebook.com/Malayalivartha