നയതന്ത്ര ചാനല്‍ വഴിയുള്ള സ്വര്‍ണക്കടത്ത് കേസില്‍ പലവെട്ടം കസ്റ്റംസും എന്‍ഐഎയും മാറിമാറി ചോദ്യം ചെയ്തിട്ടും രക്ഷപ്പെട്ടയാളാണ് സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍. എന്നാല്‍ ഇടിത്തീ പോലെ വന്നിറങ്ങുകയാണ് സാമ്പത്തിക കുറ്റം അന്വേഷിക്കുന്ന ഇ.ഡി. അഥവാ എന്‍ഫോഴ്‌സ്‌മെന്റ് ഡയറക്ടറേറ്റ്. ഇ.ഡിയുടെ ചടുലമായ നീക്കം നേരത്തേ കണ്ടതാണ്. സ്വപ്ന സുരേക്ഷിന്റേയും കൂട്ടരുടേയും സ്വത്തുക്കള്‍ എല്ലാം ഒറ്റ രാത്രി കൊണ്ട് കണ്ട് കെട്ടിയവരാണ് ഇഡി., ഇപ്പോഴിതാ ശിവശങ്കറിനെ പൂട്ടാനുള്ള ശ്രമത്തിലാണ് ഇ.ഡി.

സ്വര്‍ണക്കടത്ത് കേസുമായി ബന്ധപ്പെട്ട് രജിസ്റ്റര്‍ ചെയ്ത കള്ളപ്പണക്കേസില്‍ എം.ശിവശങ്കറിനെ വീണ്ടും ചോദ്യം ചെയ്യണമെന്നാണ് എന്‍ഫോഴ്‌സ്‌മെന്റ് ഡയറക്ടറേറ്റ് കോടതിയില്‍ ആവശ്യപ്പെട്ടതോടെയാണ് മറ്റൊരു കുരുക്ക് കൂടി മുറുകുന്നത്. വീണ്ടും ചോദ്യം ചെയ്യണമെന്നാണ് ഇ.ഡി. കോടതിയില്‍ പറഞ്ഞത്. അതായത് നേരത്തെ ചോദ്യം ചെയ്‌തെന്ന്. കള്ളപ്പണമിടപാടുമായി ബന്ധപ്പെട്ട് ആദ്യം ചോദ്യം ചെയ്തത് എന്നാണെന്ന് ആര്‍ക്കും അറിയില്ല. പെട്ടിമുടി ദുരന്തമുണ്ടായ ദിവസമാണെന്ന് സൂചനയുണ്ട്. ചാനലുകാര്‍ ആരും അറിയാതെയാണ് ഇഡിയുടെ നീക്കമെന്ന് ഇതില്‍ നിന്നു തന്നെ വ്യക്തമല്ലേ.

നേരത്തെ ശിവശങ്കറിനെ എന്‍.ഐ.എ കൊച്ചിയില്‍ വിളിച്ചുവരുത്തി രണ്ടു ദിവസം മുഴുവനും ചോദ്യം ചെയ്തിരുന്നു. അതിനു മുന്‍പ് കസ്റ്റംസ് തിരുവനന്തപുരത്ത് അഞ്ചു മണിക്കൂറും ശിവശങ്കറിനെ ചോദ്യം ചെയ്തിരുന്നു. അന്ന് വിട്ടയച്ചെങ്കിലും കൂടുതല്‍ തെളിവുകള്‍ ശേഖരിച്ച് വേണ്ടിവന്നാല്‍ വീണ്ടും ചോദ്യം ചെയ്യാനാണ് രണ്ട് അന്വേഷണ ഏജന്‍സികളുടെയും ശ്രമം. അതിനിടെയാണ് ഇ.ഡി വീണ്ടും ചോദ്യം ചെയ്യണമെന്ന ആവശ്യവുമുന്നയിക്കുന്നത്.

സ്വര്‍ണക്കടത്തിലെ കള്ളപ്പണ ഉപയോഗം, സാമ്പത്തിക ഇടപാടുകള്‍ എന്നിവയാണ് ഇ.ഡി അന്വേഷിക്കുന്നത്. അറസ്റ്റുണ്ടായാല്‍ ആറു മാസം വരെ ജാമ്യം കിട്ടില്ല.സ്വപ്ന, സരിത്ത്, സന്ദീപ് എന്നീ പ്രതികളുടെ കസ്റ്റഡി നീട്ടണമെന്നാവശ്യപ്പെട്ട് ഇന്നലെ സാമ്പത്തിക കുറ്റകൃത്യങ്ങള്‍ കൈകാര്യം ചെയ്യുന്ന എറണാകുളം ചീഫ് ജുഡിഷ്യല്‍ മജിസ്‌ട്രേട്ട് കോടതിയെ സമീപിച്ചപ്പോഴാണ് ശിവശങ്കറിനെയും ചോദ്യം ചെയ്യണമെന്ന് ഇ.ഡി അസി. ഡയറക്ടര്‍ പി. രാധാകൃഷ്ണന്‍ ആവശ്യപ്പെട്ടത്.ശിവശങ്കറുമായുള്ള അടുപ്പം സ്വപ്‌ന ചോദ്യം ചെയ്യലില്‍ വെളിപ്പെടുത്തിയിരുന്നു.

സ്വപ്‌നയുടെ വിശ്വാസ്യത സംശയകരമാണെന്ന് ശിവശങ്കറിന് പൂര്‍ണമായും അറിയാമായിരുന്നെന്നും റിപ്പോര്‍ട്ടില്‍ പറയുന്നു. സ്വര്‍ണക്കടത്തില്‍ കെ.ടി. റമീസിന്റെ പങ്കും സ്വപ്നയും സന്ദീപും സരിത്തും ഇ.ഡിയോടു വെളിപ്പെടുത്തിയിട്ടുണ്ട്. പ്രതികള്‍ക്ക് ഉന്നതരുമായി ബന്ധമുണ്ടെന്നും സമ്മതിച്ചിട്ടുണ്ട്. ഇക്കാര്യങ്ങളില്‍ കൂടുതല്‍ അന്വേഷണം വരുത്തണം. മുഖ്യമന്ത്രിയുടെ ഓഫീസില്‍ കാര്യമായ സ്വാധീനമുണ്ടെന്ന് സ്വപ്ന വെളിപ്പെടുത്തിയെന്നും ഇ.ഡി കോടതിയില്‍ പറഞ്ഞു.

സ്വപ്ന, ശിവശങ്കര്‍ കൂടിക്കാഴ്ച യു.എ.ഇയിലും ഉണ്ടായെന്ന വെളിപ്പെടുത്തലുമുണ്ടായി. യു.എ.ഇയിലെ ഇന്ത്യക്കാരില്‍ നിന്ന് പ്രളയ ദുരിതാശ്വാസ സഹായം സ്വീകരിക്കാന്‍ സര്‍ക്കാര്‍ മെഷിനറി 2018 ഒക്ടോബര്‍ 17 മുതല്‍ 21 വരെ അവിടെയുണ്ടായിരുന്നു. സ്വപ്‌ന ഇക്കാലയളവില്‍ ശിവശങ്കറുമായി കൂടിക്കാഴ്ച നടത്തി. ഈ പുതിയ വെളിപ്പെടുത്തലുകളുടെ അടിസ്ഥാനത്തിലാണ് ശിവശങ്കറിനെ വീണ്ടും ചോദ്യം ചെയ്യാന്‍ ഇ.ഡി ഒരുങ്ങുന്നത്. സ്വപ്നയടക്കമുള്ള പ്രതികളെ കൂടുതല്‍ ചോദ്യം ചെയ്യേണ്ടതുണ്ടെന്ന അപേക്ഷ പരിഗണിച്ച് മൂന്നു പേരെയും തിങ്കളാഴ്ചവരെ വീണ്ടും കസ്റ്റഡിയില്‍ വിട്ടു. 7 ദിവസം ചോദ്യം ചെയ്തശേഷം പ്രതികളെ കോടതിയില്‍ ഹാജരാക്കിയാണ് ഇന്നലെ കസ്റ്റഡി നീട്ടിവാങ്ങിയത്. ഇതിന് പിന്നാലെയാണ് ഇഡിയുടെ നിര്‍ണായക നീക്കം.