ഇത്രയ്ക്ക് പ്രതീക്ഷിച്ചില്ല... ലൈഫ് മിഷന്‍ അഴിമതിയില്‍ വെളിപ്പെടുത്തലുകള്‍ നടത്തിയ മുഖ്യമന്ത്രിയുടെ മാധ്യമ ഉപദേഷ്ടാവ് ജോണ്‍ ബ്രിട്ടാസിനെയും ധനമന്ത്രി തോമസ് ഐസക്കിനെയും സിബിഐ ചോദ്യം ചെയ്യും; മാധ്യമങ്ങള്‍ക്ക് മുമ്പില്‍ തുറന്ന് പറഞ്ഞ മൂവരും വെട്ടില്‍
ലൈഫ് മിഷന്‍ പദ്ധതി ക്രമക്കേടുമായി ബന്ധപ്പെട്ട് രജിസ്റ്റര്‍ ചെയ്ത കേസില്‍ യൂണിടാക് എംഡി സന്തോഷ് ഈപ്പനെ അറസ്റ്റ് ചെയ്യാന്‍ തീരുമാനിച്ചതോടെ സന്തോഷ് ഈപ്പന്റെ മൊഴി നിര്‍ണായകമാകും. കേസില്‍ സന്തോഷ് ഈപ്പനെ സിബിഐ വിളിച്ചു വരുത്തി ചോദ്യം ചെയ്തിരുന്നു. മുഖ്യമന്ത്രിക്കും സി പി എം നേതാക്കള്‍ക്കും തദ്ദേശ സ്വയംഭരണ വകുപ്പു മന്ത്രിക്കുമെതിരെ അദ്ദേഹം മൊഴി നല്‍കിയിട്ടുണ്ടെങ്കില്‍ അന്വേഷണം അവരിലേക്ക് വ്യാപിക്കും. അങ്ങനെയാണെങ്കില്‍ ലാവ് ലിന്‍ കേസിന് ശേഷം പിണറായി അനുഭവിക്കാന്‍ പോകുന്ന അന്വേഷണ വലയായിരിക്കും ലൈഫ് പദ്ധതി.
കേന്ദ്രാനുമതിയില്ലാതെ വിദേശസഹായം സ്വീകരിച്ചതിന് വിദേശ സംഭാവന നിയന്ത്രണ നിരോധന നിയമത്തിലെ 35ാം വകുപ്പ് പ്രകാരം ഗൂഢാലോചനക്കുറ്റവും ചുമത്തിയാണ് അന്വേഷണം. എന്നാല്‍ ഈപ്പനല്ല വിദേശ സഹായം സ്വീകരിച്ചത്. അത് സംസ്ഥാന സര്‍ക്കാരാണ്. അപ്പോള്‍ സര്‍ക്കാര്‍ മറുപടി പറഞ്ഞേ തീരൂ.സ്വര്‍ണക്കടത്ത് കേസ് പ്രതി സന്ദീപ് നായരുടെ ഐസോമോങ്ക് എന്ന ട്രേഡിങ് കമ്പനിയുടെ തിരുവനന്തപുരത്തെ അക്കൗണ്ടിലേക്കാണ് പണം നിക്ഷേപിച്ചതെന്ന് യൂണിടാക് ഉടമ സന്തോഷ് ഈപ്പന്‍ മൊഴി നല്‍കിയിട്ടുണ്ട്.
ലൈഫ് മിഷന്‍ അഴിമതിയില്‍ മുഖ്യമന്ത്രിയുടെ മാധ്യമ ഉപദേഷ്ടാവ് ജോണ്‍ ബ്രിട്ടാസിനെയും ധനമന്ത്രി തോമസ്‌ഐസക്കിനെയും സിബിഐ ചോദ്യം ചെയ്യും. നാലര കോടിയുടെ അഴിമതി നടന്നതായി ആദ്യം പറഞ്ഞത് ബ്രിട്ടാസാണ്. അദ്ദേഹം ഒരു മാധ്യമ പ്രവര്‍ത്തകന്‍ മാത്രമല്ല മുഖ്യമന്ത്രിയുടെ സ്റ്റാഫില്‍ ഉത്തരവാദപ്പെട്ട സ്ഥാനത്ത് ഇരിക്കുന്നയാളാണ്. ഒരു തെളിവുമില്ലാതെ അദ്ദേഹം ഒന്നും പറയാന്‍ പാടില്ല. അദ്ദേഹം പറഞ്ഞത് ഐസക്ക് ഏറ്റു പറഞ്ഞെങ്കില്‍ അതില്‍ സത്യം കാണണം. അഴിമതിയുണ്ടെങ്കില്‍ തടയാനുള്ള കടമ ഐസക്കിനും ബ്രിട്ടാസിനുമുണ്ട്.
ലൈഫ് മിഷന്‍ സിഇഒ യു,വി ജോസിനെയും ഉടന്‍ ചോദ്യം ചെയ്‌തേക്കും. അദ്ദേഹത്തെ അറസ്റ്റ് ചെയ്യാനും സാധ്യതയുണ്ട് . കള്ളപ്പണം വെളുപ്പിക്കല്‍ നിയമപ്രകാരം എന്‍ഫോഴ്‌സ്!മെന്റ് എടുത്ത കേസില്‍സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‌ടെ മകന്‍ ബിനീഷ് കോടിയേരിക്ക് എതിരായ അന്വേഷണവും ഊര്‍ജ്ജിതമാണ്.
കോണ്‍ഗ്രസും ബിജെപിയും ചേര്‍ന്ന് എല്‍ഡിഎഫ് ഭരണത്തെ അട്ടിമറിക്കാന്‍ ശ്രമിക്കുന്നു എന്ന സിപിഎം വാദം തടിതപ്പാനുള്ള ശ്രമം മാത്രമാണെന്ന് ബിജെപി അധ്യക്ഷന്‍ കെ സുരേന്ദ്രന്‍ പ്രതികരിച്ചത് ഇതിന്റെ ഭാഗമായാണ്. സിപിഎം വാദം നിലനില്‍ക്കില്ല. ലൈഫ് മിഷന്‍ അഴിമതി നീളുന്നത് മുഖ്യമന്ത്രിയിലേക്കാണെന്നാണ് ബിജെ പി പറയുന്നത്. മുഖ്യമന്ത്രിയും മന്ത്രിമാരും ഉന്നതരും കുടുങ്ങും എന്നുറപ്പ് ഉള്ളത് കൊണ്ടാണ് അന്വേഷണത്തെ സിപിഎം എതിര്‍ക്കുന്നത്. ഇത് തടയാനാണ് കോണ്‍ഗ്രസ്സ് ബിജെപി ബന്ധം ആരോപിക്കുന്നതെന്നും സുരേന്ദ്രന്‍ പറഞ്ഞു.
ലൈഫ് മിഷനിലെ സിബിഐ അന്വേഷണം സംബന്ധിച്ചുള്ള സിപിഎമ്മിന്റെ പ്രതികരണം എല്ലാ ജനാധിപത്യ മര്യാദകളും ലംഘിക്കുന്നതാണ്. സിബിഐ എഫ്‌ഐആര്‍ രജിസ്റ്റര്‍ ചെയ്തതിന് ശേഷം മാത്രമാണ് താന്‍ ഇത് സംബന്ധിച്ചു പരസ്യ പ്രതികരണം നടത്തിയതെന്നാണ് സുരേന്ദ്രന്‍ പറയുന്നത്. 24ന് എഫ്‌ഐആര്‍ രജിസ്റ്റര്‍ ചെയ്തു, 25നാണ് താന്‍ ഇതിനെ പറ്റി പറയുന്നത്. മധ്യമപ്രവര്‍ത്തകരില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ ആയിരുന്നു തന്റെ പ്രതികരണം.
മന്ത്രിമാര്‍ക്കോ ഉദ്യോഗസ്ഥര്‍ക്കോ ഒരു പങ്കും ഇല്ലെന്ന് സര്‍ക്കാര്‍ ആവര്‍ത്തിക്കുമ്പോഴും വിജിലന്‍സ് അന്വേഷണം പ്രഖ്യാപിച്ചതാണ് സര്‍ക്കാരിനെ കുഴക്കിയത് . ലൈഫ് മിഷനിലെ അഴിമതി മുഖ്യമന്ത്രിയുടെ മാധ്യമ ഉപദേഷ്ടാവായ ജോണ്‍ബ്രിട്ടസും ധനമന്ത്രി ഐസക്കും അംഗീകരിച്ചത് വഴി സര്‍ക്കാര്‍ തന്നെ അംഗീകരിച്ച അഴിമതി കേസായി മാറി. സിബിഐ അന്വേഷണം അട്ടിമറിക്കാന്‍ ആണ് വിജിലന്‍സ് അന്വേഷണമെന്ന് ഇതിനകം ആരോപണം ഉയര്‍ന്നിട്ടുണ്ട് . സിബിഐ വരുമെന്ന് ഉറപ്പായപ്പോള്‍ ആണ് വിജിലന്‍സ് സര്‍ക്കാര്‍ അന്വേഷണം പ്രഖ്യാപിച്ചത്. അന്വേഷണത്തിന്റെ പ്രാഥമിക ഘട്ടത്തില്‍ ഒരിക്കലും സെക്രട്ടേറിയറ്റില്‍ നിന്ന് ഫയലുകള്‍ വിജിലസിന് ശേഖരിക്കാനാവില്ല. എന്നിട്ടും ശേഖരിച്ചു.
ശിവശങ്കരനും സ്വപ്നയും വിദേശ യാത്ര നടത്തിയതിന് ശേഷം കേരളത്തിലേക്ക് പണം ഒഴുകിയിട്ടുണ്ട്. വടക്കാഞ്ചേരി ലൈഫ് മിഷന്‍ പദ്ധതിക്ക് വേണ്ടി പണം വന്ന ബാങ്ക് അക്കൗണ്ടിലേക്ക് വേറെ പണവും വന്നിട്ടുണ്ട്. ഇക്കാര്യങ്ങള്‍ എല്ലാം സി ബി ഐ അന്വേഷിക്കും. വരും ദിവസങ്ങളില്‍ ഇതിന്റെ വിശദാംശങ്ങള്‍ അറിയാം.
https://www.facebook.com/Malayalivartha
