ശബരിമല മണ്ഡലകാല തീര്‍ത്ഥാടനം വെര്‍ച്വല്‍ ക്യൂ വഴി മാത്രം; അന്തിമ തീരുമാനം ഉന്നതതല സമിതി റിപ്പോര്‍ട്ടിന് ശേഷം
ഈ വര്‍ഷത്തെ ശബരിമല മണ്ഡല മകരവിളക് തീര്‍ത്ഥാടനം കൊവിഡ് പ്രോട്ടോകോള്‍ പാലിച്ച്‌ നടത്താന്‍ തീരുമാനം. ദേവസ്വം ബോര്‍ഡ് യോഗത്തിലാണ് തീരുമാനം. ശബരിമല തീര്‍ത്ഥാടനം വേണമെന്ന് തന്നെയാണ് സര്‍ക്കാര്‍ നിലപാടെന്നും ദേവസ്വംബോര്‍ഡ് പ്രസിഡന്റ് എന്‍.വാസു അറിയിച്ചു. വെര്‍ച്വല്‍ ക്യൂ വഴിയാണ് ഭക്തരെ പ്രവേശിപ്പിക്കാന്‍ തീരുമാനിച്ചതെന്ന് ദേവസ്വംബോര്‍ഡ് പ്രസിഡന്റ് പറഞ്ഞു.
ദര്‍ശന സമയം സ്വീകരിക്കേണ്ട മാര്‍ഗനിര്‍ദ്ദേശങ്ങള്‍ ചീഫ്സെക്രട്ടറി അദ്ധ്യക്ഷനായി ഉന്നതതല സമിതി സമര്‍പ്പിക്കുമെന്നും ഈ റിപ്പോര്‍ട്ടിന്റെ അടിസ്ഥാനത്തില്‍ അന്തിമ തീരുമാനമുണ്ടാകുമെന്നും അദ്ദേഹം അറിയിച്ചു. കൊവിഡ് പ്രോട്ടോകോള്‍ പാലിച്ച്‌ മറ്റ് സംസ്ഥാനങ്ങളില്‍ നിന്നുള‌ള അയ്യപ്പ ഭക്തര്‍ക്കും പ്രവേശനമാകാം.നെയ്യഭിഷേകമോ സന്നിധാനത്ത് വിരി വയ്‌ക്കാനുള‌ള സൗകര്യമോ ഉണ്ടാകില്ല. നെയ്യഭിഷേകത്തിന് പകരമായി ഒരു സംവിധാനം ഏര്‍പ്പെടുത്തുമെന്നും എന്‍.വാസു അറിയിച്ചു. അന്നദാനം വേണ്ടെന്ന് വയ്‌ക്കില്ല. പരിമിതമായ തോതില്‍ ഉണ്ടാകും. പൊതുവായ പാത്രം എടുക്കാതെ പകരം സംവിധാനമുണ്ടാകും.
വെര്‍ച്വല്‍ ക്യു വഴി എത്ര പേരെ പ്രവേശിപ്പിക്കാം, ഒരു ദിവസം എത്ര ഭക്തര്‍ക്ക് പ്രവേശനം നല്‍കാം, തീര്‍ത്ഥാടകര്‍ക്കുള‌ള പ്രോട്ടോകോള്‍ എന്നിവ തീരുമാനിക്കാനാണ് ഉന്നതതല സമിതി. ചീഫ് സെക്രട്ടറി അദ്ധ്യക്ഷനായ സമിതിയില്‍ ആരോഗ്യവകുപ്പ് സെക്രട്ടറി, ആഭ്യന്തര സെക്രട്ടറി, പൊലീസ് മേധാവി,ദേവസ്വം സെക്രട്ടറി എന്നിവര്‍ സമിതി അംഗങ്ങളാകും.
കൊവിഡ് ലോക്‌ഡൗണിന് ശേഷം ഭക്തര്‍ക്ക് പ്രവേശനമില്ലാത്ത ശബരിമലയില്‍ തീര്‍ത്ഥാടന കാലത്തെ പ്രവേശനം ആലോചിക്കാനാണ് മുഖ്യമന്ത്രി അവലോകനയോഗം വിളിച്ചത്. കര്‍ശന നിയന്ത്രണത്തോടെ ദര്‍ശനമാകാമെന്ന് മുഖ്യമന്ത്രി പറഞ്ഞു.
https://www.facebook.com/Malayalivartha
