ദീപങ്ങള്‍ തെളിയട്ടെ... തിന്മയ്ക്കുമേല്‍ നന്മ നേടിയ വിജയത്തിന്റെ ഓര്‍മ്മയില്‍ ദീപാവലി ആഘോഷിക്കുന്നു. ദീപങ്ങള്‍ കൊണ്ട് ആഘോഷിക്കുന്ന ഉല്‍സവമാണ് ദീപാവലി . ദീപം കൊളുത്തിയും മധുരം പങ്കിട്ടും രാജ്യം ഇന്ന് ദീപാവലി കൊണ്ടാടും. വനവാസം കഴിഞ്ഞ് ശ്രീരാമന്‍ അയോദ്ധ്യയിലെത്തുന്നതിന്റെ ആഘോഷമാണ് ദീപാവലിയെന്നും ശ്രീകൃഷ്ണന്‍ നരകാസുരനെ വധിച്ചതിന്റെ ആഘോഷമാണെന്നും ഐതീഹ്യമുണ്ട്.

സംസ്ഥാനത്ത് ദീപാവലി ദിവസം പടക്കം പൊട്ടിക്കാന്‍ അനുമതി രാത്രി 8 മുതല്‍ 10 മണി വരെ മാത്രം. ആഭ്യന്തര വകുപ്പാണ് ഇത് സംബന്ധിച്ച ഉത്തരവ് ഇറക്കിയത്. ഹരിത പടക്കങ്ങള്‍ മാത്രമെ വില്‍ക്കാനും ഉപയോഗിക്കാനും പാടുള്ളുവെന്നും ആഭ്യന്തര വകുപ്പിന്റെ ഉത്തരവില്‍ വ്യക്തമാക്കുന്നു.ദേശീയ ഹരിത െ്രെടബ്യൂണലിന്റേയും സംസ്ഥാന മലിനീകരണ നിയന്ത്രണ ബോര്‍ഡിന്റേയും നിര്‍ദ്ദേശങ്ങള്‍ കണക്കിലെടുത്താണ് ഉത്തരവ്. ബേരിയം നൈട്രേറ്റ് ഇല്ലാതെയാണ് ഹരിത പടക്കങ്ങള്‍ നിര്‍മ്മിക്കുന്നത്.

ഹരിത പടക്കങ്ങള്‍ക്ക് സാധാരണ പടക്കങ്ങളേക്കാള്‍ 30 ശതമാനം വയുമലിനീകരണ തോത് കുറവാണ്. ദീപാവലി ആഘോഷങ്ങളിലെ പ്രധാന താരമാണ് പടക്കങ്ങളെങ്കിലും കോവിഡ് പ്രതിസന്ധി പടക്ക വിപണിയെയും സാരമായി ബാധിച്ചു. പലയിടങ്ങളിലും പടക്ക വില്‍പന പേരിനുമാത്രമാണ്. മറയൂര്‍, തൊടുപുഴ തുടങ്ങി വിവിധ സ്ഥലങ്ങളില്‍ പടക്കങ്ങള്‍ വില്‍പനയ്ക്കുണ്ടെങ്കിലും പ്രതീക്ഷിച്ചത്ര കച്ചവടമില്ല.

ലോകമെമ്പാടുമുള്ള കേരളീയര്‍ക്ക് ഗവര്‍ണര്‍ ശ്രീ ആരിഫ് മുഹമ്മദ് ഖാന്‍ സന്തോഷകരവും ഐശ്വര്യപൂര്‍ണവുമായ ദീപാവലി ആശംസിച്ചു.'ദീപങ്ങളുടെ ഈ ആഘോഷവേളയില്‍,നമ്മുടെ വാക്കിലും പ്രവൃത്തിയിലും അറിവിന്റെയും കരുണയുടെയും ഒരുമയുടെയും ദിവ്യപ്രകാശം പ്രതിഫലിക്കട്ടെ'അദ്ദേഹംപറഞ്ഞു