കിഫ്ബിക്ക് വീണ്ടും നോട്ടീസ് അയയ്ക്കാന്‍ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി). ചോദ്യം ചെയ്യലിന് ഹാജരാകാന്‍ ആവശ്യപ്പെട്ടാണ് നോട്ടീസ് നല്‍കുക.

കിഫ്ബി ഉദ്യോഗസ്ഥരെ ചോദ്യം ചെയ്യുന്നതിന് തെരഞ്ഞെടുപ്പ് പെരുമാറ്റച്ചട്ടം തടസമാകില്ലെന്ന് ഇഡി വൃത്തങ്ങള്‍ പറയുന്നു.കിഫ്ബി സിഇഒ ഉള്‍പ്പെടെയുള്ളവര്‍ക്ക് നോട്ടീസ് നല്‍കാനാണ് ഇഡിയുടെ തീരുമാനം. ഇഡിയുടെ സമന്‍സിന് അര്‍ധ ജുഡീഷല്‍ അധികാരം ഉണ്ടെന്നും ഉദ്യോഗസ്ഥര്‍ പറഞ്ഞു.

കിഫ്ബിക്കെതിരെ എന്‍ഫോഴ്സ്മെന്റ് ഡയറക്ടറേറ്റ് കേസെടുത്തിരുന്നു. കേന്ദ്രാനുമതിയില്ലാതെ കിഫ്ബി മസാല ബോണ്ട് ഇറക്കി വിദേശഫണ്ട് സ്വീകരിച്ചതിനായിരുന്നു കേസ്.

അതേസമയം നിയമസഭാ തിരഞ്ഞെടുപ്പിനു കളമൊരുങ്ങിയതോടെ ഒരിടവേളയ്ക്കുശേഷം കിഫ്ബി വിവാദം വീണ്ടും മുന്നണികള്‍ രാഷ്ട്രീയ ആയുധമാക്കുന്നു. കേന്ദ്രാനുമതിയില്ലാതെ മസാലബോണ്ടിറക്കി വിദേശത്തുനിന്ന് വായ്പയെടുത്തത് നിയമലംഘനമാണെന്നു ചൂണ്ടിക്കാട്ടി എന്‍ഫോഴ്സ്മെന്റ് ഡയറക്ടറേറ്റ് (ഇ.ഡി.) നോട്ടീസ് അയച്ചതോടെയാണ് വിഷയം വീണ്ടും ചൂടുപിടിച്ചത്.

തദ്ദേശ തിരഞ്ഞെടുപ്പിനുശേഷം ആറിത്തണുത്ത കിഫ്ബി ഇതോടെ രാഷ്ട്രീയ വേദികളില്‍ ചര്‍ച്ചയാവുകയാണ്. കേന്ദ്രമന്ത്രി നിര്‍മലാ സീതാരാമനു പിന്നാലെ സംസ്ഥാന ബി.ജെ.പി.നേതൃത്വവും സംസ്ഥാനസര്‍ക്കാര്‍ നടപടിയെ വിമര്‍ശിച്ച് രംഗത്തെത്തിയതോടെ വീണ്ടും വിവാദം കത്തിപ്പടരുകയായിരുന്നു. ഇതോടെ, കേന്ദ്രത്തിനെതിരേ വാളോങ്ങി മുഖ്യമന്ത്രിയും ധനമന്ത്രിയും കളത്തിലിറങ്ങി.

കേന്ദ്രമന്ത്രിമാരുടെ നിര്‍ദേശത്തിനു വഴങ്ങി കേന്ദ്ര ഏജന്‍സികള്‍ തിരഞ്ഞെടുപ്പ് പെരുമാറ്റച്ചട്ടം ലംഘിച്ചിരിക്കുകയാണെന്ന് ആരോപിച്ച് മുഖ്യമന്ത്രി തിരഞ്ഞെടുപ്പ് കമ്മിഷന് കത്തുനല്‍കിയതിനൊപ്പം ചോദ്യംചെയ്യലിന് ഉദ്യോഗസ്ഥരെ വിട്ടുനല്‍കില്ലെന്ന കടുത്ത നിലപാടുകൂടി സര്‍ക്കാര്‍ സ്വീകരിച്ചിരിക്കുകയാണ്.

അതോടെ കേന്ദ്രവുമായി പരസ്യ ഏറ്റുമുട്ടലിനാണ് സംസ്ഥാന സര്‍ക്കാര്‍ തയ്യാറായിട്ടുള്ളത്. 2019 മുതല്‍ തങ്ങള്‍ ആരോപണം ഉന്നയിച്ചിട്ടും കേസെടുക്കാത്ത ഇ.ഡി.യുടെ ഇപ്പോഴത്തെ നടപടി സി.പി.എമ്മും ബി.ജെ.പി.യും തമ്മിലുള്ള ഒത്തുകളിയെന്നാണ് യു.ഡി.എഫ്. ആരോപിക്കുന്നത്.