മാരണങ്ങള് വരുന്ന വഴി... ഐഫോണ് വിവാദത്തില് കസ്റ്റംസിന് പിന്നാലെ വിനോദിനിയെ ഇ.ഡി. ചോദ്യം ചെയ്യും; ലൈഫ്മിഷന് കോഴപ്പണം ഡോളറാക്കി വിദേശത്തേക്കു കടത്തിയതിലും ലൈഫ് മിഷന് കോഴയിടപാടിലും ഇ.ഡി. നിലപാട് കടുപ്പിക്കുന്നു
തെരഞ്ഞെടുപ്പ് അടുത്തതോടെ കസ്റ്റംസിന് പിന്നാലെ ഇഡിയും അന്വേഷണം ശക്തമാക്കുകയാണ്. ഒരിക്കലും പ്രതീക്ഷിക്കാതെ ഐ ഫോണ് വിവാദത്തില് സി.പി.എം. പോളിറ്റ് ബ്യൂറോ അംഗം കോടിയേരി ബാലകൃഷ്ണന്റെ ഭാര്യ വിനോദിനി കൂടി വന്നതോടെ മറ്റൊരു രാഷ്ട്രീയ മുഖമാണ് വന്നിരിക്കുന്നത്. ഈ ഫോണ് ആര് കൈപറ്റി എന്ന വിവാദം കൊഴുക്കുകയാണ്.
അതേസമയം കസ്റ്റംസിന് പിന്നാലെ വിനോദിനിയെ എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്യാനൊരുങ്ങുകയാണ്. ലൈഫ്മിഷന് ഇടപാടുമായി ബന്ധപ്പെട്ട ഐഫോണുകളില് ഒന്നു വിനോദിനിക്കു കിട്ടിയെന്ന ആരോപണമാണു ഇ.ഡി. പരിശോധിക്കുന്നത്.
ലൈഫ്മിഷന്, ഡോളര് കടത്തു വിവാദവുമായി ബന്ധപ്പെട്ടു യൂണിടാക് കമ്പനിയുടമ സന്തോഷ് ഈപ്പനെ ഒന്നാംപ്രതിയാക്കി കഴിഞ്ഞ ദിവസം ഇ.ഡി.
പുതിയ കേസ് രജിസ്റ്റര് ചെയ്തിരുന്നു. ഈ കേസിലാണു വിനോദിനിയെ വിളിപ്പിക്കുന്നത്. ലൈഫ്മിഷന് കോഴപ്പണം ഡോളറാക്കി വിദേശത്തേക്കു കടത്തിയതിലും ലൈഫ് മിഷന് കോഴയിടപാടിലും കള്ളപ്പണം വെളുപ്പിക്കലിലും കൂടുതല് ഉന്നതര് ഉള്പ്പെട്ടിട്ടുണ്ടെന്നാണു ഇ.ഡി. സംശയിക്കുന്നത്.
ലൈഫ്മിഷന് ഇടപാടില് കരാര് ലഭിച്ചതിന്റെ പേരില് ആറുകോടി രൂപ സ്വര്ണക്കടത്തു പ്രതി സ്വപ്ന സുരേഷിനു നല്കിയെന്നാണു സന്തോഷ് ഈപ്പന് മൊഴി നല്കിയത്.
പിന്നീടു ആറുമൊബൈല് ഫോണുകള് കൂടി സ്വപ്ന ആവശ്യപ്പെട്ടതായും താന് വാങ്ങിനല്കിയതായും സന്തോഷ് സമ്മതിച്ചിട്ടുണ്ട്. വിനോദിനിക്കു താന് ഫോണ് നല്കിയിട്ടില്ലെന്നു സന്തോഷ് ഈപ്പനും തനിക്കു സന്തോഷ് ഈപ്പനെ അറിയില്ലെന്നു വിനോദിനിയും പ്രതികരിച്ചിട്ടുണ്ട്. പിന്നെയെങ്ങനെ ഫോണ് തന്റെ പക്കലെത്തിയെന്നു വിനോദിനി വ്യക്തമാക്കേണ്ടി വരും.
സന്തോഷ് ഈപ്പന് സ്വര്ണക്കടത്ത് കേസ് മുഖ്യപ്രതിയായ സ്വപ്ന സുരേഷിന് വാങ്ങി കൊടുത്ത ആറ് ഐഫോണുകളില് ഒന്ന് ഉപയോഗിച്ചത് വിനോദിനിയാണെന്നാണു കസ്റ്റംസിന്റെ കണ്ടെത്തല്. വിനോദിനിയുടെ പേരിലുള്ള സിം കാര്ഡാണു ഫോണില് ഉപയോഗിച്ചതെന്നു കസ്റ്റംസ് പറയുന്നു. 1.13 ലക്ഷം രൂപ വില വരുന്ന ഐഫോണ്, സന്തോഷ് ഈപ്പന് വാങ്ങി നല്കിയ ഐഫോണുകളില് ഏറ്റവും വില കൂടിയതായിരുന്നു.
ബുധനാഴ്ച വിശദീകരണം നല്കാന് കസ്റ്റംസ് വിനോദിനിക്കു കസ്റ്റംസ് നോട്ടീസ് നല്കിയിട്ടുണ്ട്. കസ്റ്റംസിന്റെ ചോദ്യംചെയ്യല് പൂര്ത്തിയായശേഷം ഇ.ഡി. വിനോദിനിയെ വിളിപ്പിക്കും. അതിനുമുമ്പായി സ്വപ്നയെ ജയിലിലെത്തി വീണ്ടും ചോദ്യംചെയ്യും. വൈകാതെ സന്തോഷ് ഈപ്പന്റെ അറസ്റ്റ് ഇ.ഡി. രേഖപ്പെടുത്തും.
ഡോളര് കടത്തിലും സ്വര്ണക്കടത്തിലും ലൈഫ് മിഷനിലും ഇടപെട്ടതിനു സ്വപ്നയ്ക്കു കൈക്കൂലി എന്ന നിലയിലാണു സന്തോഷ് ഈപ്പന് ഐഫോണുകള് വാങ്ങി നല്കിയത് എന്നാണു കേന്ദ്ര ഏജന്സികളുടെ നിഗമനം. സ്വര്ണക്കടത്ത് കേസ് വാര്ത്തയായതിനു പിന്നാലെ ഈ ഫോണ് സ്വിച്ച് ഓഫായെങ്കിലും ഐ.എം.ഇ.ഐ. നമ്പര് ഉപയോഗിച്ച് കസ്റ്റംസ് സിം കാര്ഡും അതുപയോഗിച്ച ആളേയും കണ്ടെത്തിയെന്നാണു സൂചന.
മകന് ബിനീഷ് അറസ്റ്റിലായതിനു പിന്നാലെ ഭാര്യ വിനോദിനിക്കെതിരെ കസ്റ്റംസിന്റെ ഐ ഫോണ് ആരോപണം കൂടി ഉയര്ന്നതോടെ വിവാദങ്ങള് വീണ്ടും കോടിയേരിയെ വേട്ടയാടുകയാണ്. സന്തോഷ് ഈപ്പനെ അറിയില്ലെന്നാണ് കോടിയേരി പറയുന്നത്.
ഈ പറയുന്ന ഫോണ് കിട്ടിയിട്ടുമില്ല. ഇതാണ് വസ്തുത. അവര് ഉപയോഗിക്കുന്ന ഫോണ് അവര് തന്നെ പൈസ കൊടുത്തു വാങ്ങിയതാണ്. സന്തോഷ് ഈപ്പനുമായി ഞങ്ങള്ക്ക് ഒരു തരത്തിലും പരിചയപ്പെടേണ്ടി വന്നിട്ടില്ല. കോണ്സുലേറ്റ് ജനറലുമായും ഞങ്ങള്ക്ക് ബന്ധമില്ല.
പിന്നെ എങ്ങനെയാണ് അദ്ദേഹത്തിനു കൊടുത്ത ഫോണ് കിട്ടുക. ആ ഫോണ് ഇപ്പോള് വേറെ ആരോ ആണ് ഉപയോഗിക്കുന്നുവെന്നും പറയുന്നു. എങ്കില് പിന്നെ എങ്ങനെയാണ് ഫോണ് കിട്ടിയത് എന്ന് അയാളെ വിളിച്ചു ചോദിച്ചാല് മതിയില്ലേ? ഇതൊരു കെട്ടുകഥയാണ്. ഐ ഫോണ് ഉപയോഗിക്കുന്നുണ്ട്. പക്ഷേ അത് ഈ പറഞ്ഞ ഫോണ് അല്ല.
സ്വപ്നാ സുരേഷിനെ ഒരു കാലത്തും കണ്ടിട്ടില്ല. സാധാരണ ഗതിയില് ഭരണ രംഗത്ത് ഇടപെടുമ്പോഴാണല്ലോ ഇത്തരക്കാരുമായി ബന്ധം.എനിക്കോ വിനോദിനിക്കോ അങ്ങനെ ഉണ്ടായിട്ടില്ല. സന്തോഷ് ഈപ്പന്, സ്വപ്നാ സുരേഷ്, കോണ്സുലേറ്റ് ജനറല്. ഈ മൂന്നുപേരെയും ഞങ്ങള് ഇതുവരെ കണ്ടിട്ടില്ലെന്നും കോടിയേരി വ്യക്തമാക്കി.
https://www.facebook.com/Malayalivartha