ഇനിയും സമയം വൈകിയിട്ടില്ല... കോവിഡ് കേസുകള് ഏറ്റവും ഉയര്ന്ന് നില്ക്കുമ്പോഴുള്ള ഇന്നത്തെ സര്വകക്ഷിയോഗം ഏറെ നിര്ണായകം; ലോക് ഡൗണ് വേണമോ വേണ്ടയോ എന്ന ചര്ച്ച നടക്കുമ്പോള് അനുകൂലിച്ചും പ്രതികൂലിച്ചും വാദങ്ങള്
സംസ്ഥാനത്തെ കോവിഡ് വ്യാപനം ഏറ്റവും ഉയര്ന്ന അവസ്ഥയിലാണ്. ഇപ്പോഴും കേരളം പിടിവിട്ടിട്ടില്ല. ഇനിയെങ്കിലും നിയന്ത്രിച്ചാല് പിടിച്ചു നിര്ത്താന് സാധിക്കും. ഈയൊരു സാഹചര്യത്തിലാണ് ഇന്നത്തെ സര്വകക്ഷി യോഗം നടക്കുന്നത്. ലോക് ഡൗണ് വേണമോ വേണ്ടയോ എന്ന ചോദ്യമാണ് ഇപ്പോള് എവിടേയും നടക്കുന്നത്.
സംസ്ഥാനത്ത് സമ്പൂര്ണ ലോക്ഡൗണ് ഒഴിവാക്കി പകരം ഓരോ പ്രദേശത്തും രോഗവ്യാപനത്തിന്റെ തോതനുസരിച്ച് മൈക്രോ ലോക്ഡൗണ് ഏര്പ്പെടുത്താനും വാരാന്ത്യ കര്ഫ്യൂ തുടരാനുമാണ് സാധ്യത. ലോക്ഡൗണിലൂടെ പൂര്ണമായും അടച്ചിടുന്നത് വലിയ തിരിച്ചടിയാകുമെന്ന വിലയിരുത്തലില് കടുത്ത നിയന്ത്രണങ്ങളാകും ഇനിയുണ്ടാകുക. ഇന്ന് ചേരുന്ന സര്വകക്ഷിയോഗം നിര്ണായകമാണ്.
ലോക്ഡൗണ് ഒഴിവാക്കിയുള്ള പ്രതിരോധ നടപടികളോട് കോണ്ഗ്രസ് പിന്തുണ അറിയിച്ചിട്ടുണ്ട്. കടുത്ത നിയന്ത്രണങ്ങള് വേണമെന്നതാണ് ഇടതുമുന്നണിയുടെ അഭിപ്രായമെങ്കിലും പൂര്ണമായ അടച്ചിടലിനോട് എല്.ഡി.എഫും യോജിക്കില്ല. ഈ സാഹചര്യത്തില് നിയന്ത്രണങ്ങള് ഏതുരീതിയില് വേണമെന്നത് ചര്ച്ചചെയ്യാനും പ്രതിരോധനടപടികള് ഊര്ജിതമാക്കാനുമാണ് മുഖ്യമന്ത്രി പിണറായി വിജയന് സര്വകക്ഷിയോഗം വിളിച്ചത്.
കോവിഡ് ബാധിച്ചുതുടങ്ങിയ കഴിഞ്ഞവര്ഷം ഏപ്രിലിലെ സ്ഥിതിയല്ല ഇക്കൊല്ലം ഏപ്രിലിലേത്. അന്ന് ആശുപത്രിയില് കിടക്കകള്, വെന്റിലേറ്റര് ഉള്പ്പെടെയുള്ള സൗകര്യങ്ങള്, ഓക്സിജന് ലഭ്യത, കോവിഡ് പ്രോട്ടോക്കോള് എങ്ങനെ നടപ്പാക്കണം എന്നിവയില് മുന്നൊരുക്കങ്ങളോ ധാരണയോ ഉണ്ടായിരുന്നില്ല. ഇന്ന് അതല്ല സ്ഥിതി. ഏതുസാഹചര്യവും നേരിടാന് സംസ്ഥാനം സജ്ജമായതിനാല് അടച്ചിടല് ഒഴിവാക്കാമെന്ന വിലയിരുത്തലാണ് ഇതുവരെയുള്ളത്.
അതേസമയം സംസ്ഥാനത്ത് കോവിഡ് വ്യാപനം രൂക്ഷമായ സാഹചര്യത്തില് സര്ക്കാര് ഏര്പ്പെടുത്തിയ നിയന്ത്രണങ്ങള് കര്ശനമായി നടപ്പാക്കുകയാണ് പോലീസ്. വരും ദിവസങ്ങളിലും കൂടുതല് ഉദ്യോഗസ്ഥരെ വിന്യസിച്ച് നിയന്ത്രണങ്ങള് നടപ്പാക്കാനാണ് തീരുമാനം. ഇതുവരെ ബോധവത്കരണത്തിനാണ് പ്രാധാന്യം നല്കിയതെങ്കില് ഇനി പിഴയും നിയമനടപടികളും കൈക്കൊള്ളാനാണ് തീരുമാനം. കോവിഡുമായി ബന്ധപ്പെട്ട് സാമൂഹിക മാധ്യമങ്ങളിലൂടെ വ്യാജപ്രചാരണം നടത്തുന്നതിനെതിരേയും നടപടി കര്ശനമാക്കും.
സേനയിലെ 90 ശതമാനം ഉദ്യോഗസ്ഥരെയും പ്രതിരോധ പ്രവര്ത്തനങ്ങള്ക്കായി വിനിയോഗിക്കും. പോലീസ് സ്റ്റേഷനുകളിലെ ക്രമസമാധാന വിഭാഗം എസ്.ഐ.യുടെ നേതൃത്വത്തിലായിരിക്കും നിയന്ത്രണങ്ങള് നടപ്പാക്കുക. ലോക്കല് പോലീസിനെക്കൂടാതെ സ്പെഷ്യല് യൂണിറ്റുകളില്നിന്നുള്ള ഉദ്യോഗസ്ഥരെയും പ്രതിരോധ, നിയന്ത്രണ പ്രവര്ത്തനങ്ങള്ക്ക് വിന്യസിക്കും.
മുഖാവരണം ധരിക്കാത്തവര്ക്കെതിരേയും കോവിഡ് നിയന്ത്രണങ്ങള് ലംഘിക്കുന്നവര്ക്കെതിരേയും പിഴ ഈടാക്കുന്നതിനൊപ്പം ദുരന്തനിവാരണ നിയന്ത്രണ നിയമം, പോലീസ് നിയമം എന്നിവ പ്രകാരവും കേസെടുക്കും. ശരിയായി മുഖാവരണം ധരിക്കാത്തവര്ക്കെതിരേയും നടപടിയെടുക്കും. ശനിയാഴ്ച 65 ലക്ഷം രൂപയാണ് പിഴയിനത്തില് പോലീസ് ഈടാക്കിയത്.
സാമൂഹിക മാധ്യമങ്ങളിലൂടെ വാസ്തവമല്ലാത്ത കാര്യങ്ങള് പ്രചരിപ്പിക്കുന്നത് നിയന്ത്രിക്കാന് സൈബര് പട്രോളിങ് ശക്തമാക്കി. എല്ലാ ജില്ലാ ഹൈടെക് സെല്ലുകളിലും സാമൂഹിക മാധ്യമങ്ങള് നിരീക്ഷിക്കാന് നിര്ദേശം നല്കിയിട്ടുണ്ട്. സംസ്ഥാന ഹൈടെക് സെല്ലും സൈബര്ഡോമും സാമൂഹിക മാധ്യമങ്ങളിലൂടെയുള്ള വ്യാജ പ്രചാരണങ്ങള് നിരീക്ഷിക്കന്നുണ്ട്.
"
https://www.facebook.com/Malayalivartha
