കാലവര്‍ഷം തുടങ്ങും മുമ്പേ ശക്തമായ കാറ്റും മഴയുമായി അറബിക്കടലിലൂടെ ടൗക്തേ ചുഴലിക്കാറ്റ് വരുന്നതായി കേന്ദ്ര കാലാവസ്ഥാ കേന്ദ്രം മുന്നറിയിപ്പു നല്‍കി.

കഴിഞ്ഞ ജൂണില്‍ മഹാരാഷ്ട്രയില്‍ വന്‍നാശം വിതച്ച നിസര്‍ഗ ചുഴലിക്കാറ്റിനു സമാനമാണ് ടൗക്തേ എന്നാണ് സൂചനകള്‍. ഭീകരശബ്ദത്തോടെ ചിലയ്ക്കുന്ന ഗൗളി എന്നാണ് മ്യാന്‍മര്‍ ഭാഷയില്‍ ഈ വാക്കിന്റെ അര്‍ത്ഥം.ചുഴലിയുടെ ഫലമായി തെക്കന്‍ജില്ലകളില്‍ വരും ദിവസങ്ങളില്‍ അതിശക്തമായ മഴയ്ക്കു സാദ്ധ്യതയുണ്ടെന്നാണ് മുന്നറിയിപ്പ്.

ഇന്ന് കേരള തീരത്തും നാളെ തമിഴ്‌നാട് തീരത്തും മറ്റന്നാള്‍ മഹാരാഷ്ട്ര തീരങ്ങളിലും കനത്ത ജാഗ്രത പാലിക്കാനാണ് നിര്‍ദ്ദേശം. ഈ പ്രദേശങ്ങളിലും മാലിദ്വീപ്, ലക്ഷദ്വീപ് മേഖലകളിലും മീന്‍പിടിത്തത്തിന് അടുത്ത മൂന്ന് ദിവസത്തേക്ക് ആരും ഇറങ്ങരുതെന്നും ആരെങ്കിലും പോയിട്ടുണ്ടെങ്കില്‍ തൊട്ടടുത്തുള്ള കരയിലേക്ക് മാറണമെന്നും നിര്‍ദ്ദേശിച്ചിട്ടുണ്ട്.


അറബിക്കടലിന്റെ തെക്കുപടിഞ്ഞാറന്‍ മേഖലയിലാണ് ചുഴലിക്കാറ്റിന്റെ ആദ്യരൂപമായ ന്യൂനമര്‍ദ്ദം രൂപംകൊണ്ടിരിക്കുന്നത്. കേരള തീരത്തുനിന്ന് ആയിരത്തോളം കിലോമീറ്റര്‍ അകലെയാണിത്. അവിടെനിന്ന് അടുത്ത 72 മുതല്‍ 96 മണിക്കൂറിനിടെ ഇത് ആഞ്ഞടിക്കാനിടയുണ്ടെന്നാണ് മുന്നറിയിപ്പ്.

ന്യൂനമര്‍ദ്ദം ശക്തിപ്രാപിച്ച് വടക്ക്,വടക്കുപടിഞ്ഞാറന്‍ ഭാഗങ്ങളിലേക്കു നീങ്ങാനാണ് സാദ്ധ്യത. ശനിയാഴ്ചയോടെ കരതൊടും. കേരളതീരത്ത് അടിക്കാന്‍ സാദ്ധ്യതയില്ലെങ്കിലും ശക്തമായ കാറ്റിനും മഴയ്ക്കും കടല്‍ ക്ഷോഭത്തിനും കേരളത്തിന്റെ തെക്കന്‍ തീരങ്ങളില്‍ സാദ്ധ്യതയുണ്ട്.

ഈ വര്‍ഷത്തെ അറബിക്കടലിലെ ആദ്യ ചുഴലിയാണ് ടൗക്തേ. അറബിക്കടലിലും ബംഗാള്‍ ഉള്‍ക്കടലിലും രണ്ടുമൂന്നു വര്‍ഷമായി ചുഴലിക്കാറ്റുകള്‍ വര്‍ദ്ധിക്കുന്നത് കാലാവസ്ഥാ വിദഗ്ദ്ധരിലും ദുരന്തനിവാരണ വകുപ്പിനും ആശങ്കയുണ്ടാക്കുന്നുണ്ട്. പല ചുഴലിക്കാറ്റുകളും ശക്തികൂടി തീവ്ര ചുഴലിക്കാറ്റായി മാറുന്നുമുണ്ട്.