ഫേസ്ബുക്കില്‍ ആണ് പെണ്ണായും പെണ്ണ് ആണായും മറ്റുള്ളവരെ കബളിപ്പിച്ച് അതില്‍ സുഖം കണ്ടെത്തുന്ന സകലര്‍ക്കുമുള്ള സമര്‍പ്പണമായി ഈ കേസ് മാറുകയാണ്. പ്രസവിച്ചയുടന്‍ കരിയിലക്കുഴിയില്‍ ഉപേക്ഷിച്ച കുഞ്ഞ് മരിച്ച കേസില്‍ അമ്മ അറസ്റ്റിലാകുകയും അന്വേഷണം തുടരുന്നതിനിടെ 2 യുവതികളെ ആറ്റില്‍ മരിച്ച നിലയില്‍ കാണുകയും ചെയ്ത സംഭവത്തില്‍ വന്‍ വഴിത്തിരിവ് ഉണ്ടായിരിക്കുകയാണ്. കുഞ്ഞിനെ ഉപേക്ഷിച്ച രേഷ്മയുടെ അജ്ഞാത ഫെയ്‌സ്ബുക് കാമുകനായി നടിച്ചത് ഇത്തിക്കരയാറ്റില്‍ മരിച്ച നിലയില്‍ കണ്ടെത്തിയ ബന്ധുക്കളായ യുവതികളാണെന്നു പൊലീസ്.

അനന്തു എന്ന ഫെയ്‌സ്ബുക് കാമുകനൊപ്പം ജീവിക്കാന്‍ വേണ്ടിയാണ് പ്രസവിച്ചയുടന്‍ കുഞ്ഞിനെ ഉപേക്ഷിച്ചതെന്നാണു രേഷ്മ പൊലീസിനു നല്‍കിയ മൊഴി. കല്ലുവാതുക്കല്‍ മേവനക്കോണം, തച്ചക്കോട്ട് വീട്ടില്‍ രഞ്ജിത്തിന്റെ ഭാര്യ ആര്യ (23), രേഷ്മ ഭവനില്‍ രാധാകൃഷ്ണ പിള്ളയുടെ മകള്‍ ഗ്രീഷ്മ (ശ്രുതി 22) എന്നിവരാണ് അനന്തു എന്ന വ്യാജ ഫെയ്‌സ്ബുക് ഐഡിയിലൂടെ ഒന്നരവര്‍ഷത്തിലേറെ രേഷ്മയുമായി ചാറ്റ് ചെയ്തതെന്നു പൊലീസ് പറഞ്ഞു.

രേഷ്മയുടെ ഭര്‍ത്താവ് കല്ലുവാതുക്കല്‍ ഊഴായ്‌ക്കോട്, പേഴുവിള വീട്ടില്‍ വിഷ്ണുവിന്റെ സഹോദരന്റെ ഭാര്യയാണ് ആര്യ. ഗ്രീഷ്മ വിഷ്ണുവിന്റെ സഹോദരിയുടെ മകളും. ആര്യയെയും ഗ്രീഷ്മയെയും ചോദ്യംചെയ്യാന്‍ പൊലീസ് വിളിപ്പിച്ചതോടെ കാണാതായ ഇരുവരെയും 25ന് ഇത്തിക്കരയാറ്റില്‍ മരിച്ച നിലയില്‍ കണ്ടെത്തുകയായിരുന്നു.

ഗ്രീഷ്മയുടെ അടുത്ത സുഹൃത്ത്, പരവൂര്‍ സ്വദേശിയായ ഇരുപത്തിരണ്ടുകാരനെ ചോദ്യം ചെയ്തതാണ് കേസില്‍ വഴിത്തിരിവായത്. വ്യാജ ഫെയ്‌സ്ബുക് പ്രൊഫൈല്‍ ഉണ്ടാക്കി രേഷ്മയുമായി ചാറ്റ് ചെയ്ത വിവരം ഗ്രീഷ്മ ഇയാളോടു പറഞ്ഞിരുന്നു. രേഷ്മയെ കബളിപ്പിച്ചിരുന്നെന്നും തമാശയ്ക്കു ചെയ്തതാണെന്നും കാണാതാകുന്നതിന്റെ തലേദിവസം ആര്യ ഭര്‍തൃമാതാവിനോടും പറഞ്ഞിരുന്നു. ഇവരും പൊലീസിനു മൊഴി നല്‍കി.

അനന്തു എന്ന പേരില്‍ ഗ്രീഷ്മ തുറന്ന ഫെയ്‌സ്ബുക് അക്കൗണ്ട് വഴിയാണ് രേഷ്മയുമായി ഇരുവരും ചാറ്റ് ചെയ്തിരുന്നത്. കാമുകനോടൊത്തു ജീവിക്കാനാണ് കുഞ്ഞിനെ ഉപേക്ഷിച്ചതെന്ന രേഷ്മയുടെ മൊഴി വാര്‍ത്തയില്‍ കണ്ടപ്പോള്‍ മാത്രമാണ്, തങ്ങളുടെ തമാശ വലിയ പ്രശ്‌നമായെന്നു യുവതികള്‍ തിരിച്ചറിഞ്ഞതെന്ന് എസിപി വൈ. നിസാമുദ്ദീന്‍ പറഞ്ഞു. കുഞ്ഞിനെ ഉപേക്ഷിച്ച വിവരം കാമുകന് അറിയില്ലെന്നു രേഷ്മയും മൊഴി നല്‍കിയിരുന്നു.

ഒരേ വീട്ടില്‍ കഴിയുമ്പോള്‍ തന്നെയാണ് ഭര്‍ത്താവിന്റെ സഹോദരന്റെ ഭാര്യയുമായി ആര്യ വ്യാജ പ്രൊഫൈലില്‍ ചാറ്റ് ചെയ്തിരുന്നത്. തൊട്ടടുത്ത വീട്ടിലാണ് ഗ്രീഷ്മയും താമസിച്ചിരുന്നത്. തമാശയ്ക്കുള്ള ചാറ്റ് പിഞ്ചുകുഞ്ഞിന്റെ മരണത്തിലേക്കു നയിക്കുമെന്ന് ഇവര്‍ പ്രതീക്ഷിച്ചിരുന്നില്ലെന്നു പൊലീസ് പറയുന്നു. രേഷ്മ ഗര്‍ഭിണിയായതും പ്രസവിച്ചയുടന്‍ കുഞ്ഞിനെ ഉപേക്ഷിച്ചതുമൊന്നും ഭര്‍ത്താവോ അടുത്ത ബന്ധുക്കളോ 'അജ്ഞാത കാമുകനോ' പോലും അറിഞ്ഞിരുന്നില്ല.

എന്തായാലും സംഭവം വന്‍ ദുരന്തത്തിലേക്കാണ് നയിച്ചത്. മൂന്ന് ജീവനുകളാണ് തമാശ മൂലം എടുത്തത്. ഗര്‍ഭം മറച്ചുവയ്ക്കുമ്പോഴും ചോരക്കുഞ്ഞിനെ കരിയിലക്കുഴിയില്‍ ഉപേക്ഷിക്കുമ്പോഴും രേഷ്മയുടെ ആഗ്രഹം ഒന്നുമാത്രമായിരുന്നു, ഒരു ദിവസമെങ്കിലും കാമുകനൊപ്പം ജീവിക്കണം. അത്രയ്ക്കുള്ള ആവേശമായിരുന്നു ദുരന്തത്തില്‍ എത്തിച്ചത്.