ഉത്തര്‍ പ്രദേശിന്റെ വിജയം എപ്പോഴും ദേശീയ തലത്തില്‍ തന്നെ പ്രതിഫലിക്കുന്നതാണ്. യോഗി ആദിത്യനാഥ് എന്ന ചെറുപ്പക്കാരനെ മുഖ്യമന്ത്രിയാക്കി നരേന്ദ്ര മോദി വലിയ കളിയാണ് യുപിയില്‍ കളിച്ചത്. അതിനിടെ യുപിയിലെ പല വിവാദ സംഭവങ്ങളും യോഗിയുടെ ശോഭ കെടുത്തി. ഇനി യോഗിക്ക് തിരിച്ചു വരാന്‍ പോലും കഴിയില്ലെന്ന് പലരും വിലയിരുത്തി. എന്നാല്‍ എഴുതി തള്ളിയവരെ അത്ഭുതപ്പെടുത്തി യോഗി വീണ്ടും താരമാകുകയാണ്.

ഉത്തര്‍പ്രദേശ് ജില്ലാ പഞ്ചായത്ത് ചെയര്‍മാന്‍ തിരഞ്ഞെടുപ്പില്‍ 75 സീറ്റുകളില്‍ 67 എണ്ണവും നേടിയെന്ന് ബിജെപി അവകാശപ്പെട്ടു. 21 ജില്ലകളില്‍ ബിജെപി സ്ഥാനാര്‍ഥികള്‍ എതിരില്ലാതെ ജയിച്ചിരുന്നു. ഒരിടത്ത് സമാജ്‌വാദി പാര്‍ട്ടി (എസ്പി) സ്ഥാനാര്‍ഥിയും ജയിച്ചു. ബാക്കി 53 ജില്ലകളിലേക്കായിരുന്നു തിരഞ്ഞെടുപ്പ് നടന്നത്.

ഇതില്‍ 46 എണ്ണത്തിലും ബിജെപി ജയിച്ചു. ബഹുജന്‍ സമാജ് പാര്‍ട്ടി (ബിഎസ്പി) തിരഞ്ഞെടുപ്പില്‍ നിന്നു വിട്ടു നിന്നു. പാര്‍ട്ടി ചിഹ്നത്തിലല്ല തിരഞ്ഞെടുപ്പു നടന്നത്. അതുകൊണ്ട് തിരഞ്ഞെടുപ്പു കമ്മിഷന്‍ കക്ഷിനില പ്രഖ്യാപിച്ചിട്ടില്ല.വോട്ടര്‍മാരെ ബിജെപി തട്ടിക്കൊണ്ടുപോയെന്നും ബലമായി തടഞ്ഞുവച്ചെന്നും സമാജ്‌വാദി പാര്‍ട്ടി ആരോപിച്ചു.

പ്രധാനമന്ത്രി നരേന്ദ്രമോദിയുടെ ജനപ്രീതിയും സര്‍ക്കാരിന്റെ ജനക്ഷേമ നയങ്ങളുമാണു ബിജെപിയുടെ വന്‍ വിജയത്തിനു കാരണമായതെന്നു യുപി മുഖ്യമന്ത്രി യോഗി ആദിത്യനാഥ് ട്വീറ്റ് ചെയ്തു.

അതേസമയം ഉത്തര്‍പ്രദേശ് ജില്ലാ പഞ്ചായത്ത് തിരഞ്ഞെടുപ്പിലെ ബിജെപി വിജയത്തില്‍ യോഗി ആദിത്യനാഥ് സര്‍ക്കാരിനെ അഭിനന്ദിച്ച് നടനും ബിജെപി നേതാവുമായ കൃഷ്ണകുമാര്‍ രംഗത്തെത്തി. പെട്രോള്‍ വില വര്‍ധനയും ലക്ഷദ്വീപ് പ്രക്ഷോഭങ്ങളും തിരഞ്ഞെടുപ്പിനെ ബാധിച്ചില്ലെന്ന് സമൂഹമാധ്യമത്തില്‍ കുറിച്ച അദ്ദേഹം, പ്രതിപക്ഷത്തെ രൂക്ഷമായി വിമര്‍ശിച്ചു. ഇത് 2022ലെ നിയമസഭാ തിരഞ്ഞെടുപ്പിന്റെ റിഹേഴ്‌സലാണെന്നും അഭിപ്രായപ്പെട്ടു.

ഉത്തര്‍പ്രദേശ് ജില്ലാ പഞ്ചായത്ത് തിരഞ്ഞെടുപ്പ് ഫലം വന്നു. 2022ലെ നിയമസഭാ തിരഞ്ഞെടുപ്പിന്റെ ഒരു റിഹേഴ്‌സല്‍. 75 സീറ്റില്‍ 67ഉം ബിജെപിക്ക്. പ്രതിപക്ഷത്തെ ആപ്പ ഊപ്പ അണ്ടന്‍ അടകോടന്‍ എല്ലാത്തിനേം കൂടി കൂട്ടിയപ്പോള്‍ 7 എണ്ണം. ബെസ്റ്റ്. ഒരു ഇന്നോവ ടാസ്‌കി വിളിയെടാ. റിഹേഴ്‌സല്‍ ഇങ്ങനെ എങ്കില്‍ 2022 ലെ ടേക്കില്‍ എന്താവും അവസ്ഥ. തിരഞ്ഞെടുപ്പ് നടത്തുന്നതിനായി കോടികള്‍ ചെലവാക്കണോ. അല്ല വെറുതെ പറഞ്ഞെന്നേ ഉള്ളൂ.

പെട്രോള്‍, ഷേവ് ലക്ഷദ്വീപ്, ടൂള്‍ക്കിറ്റ് ടീമുകള്‍ നിശബ്ദമാണ്. ആഴ്ചകളായി കരയുന്നവര്‍ക്ക് ഒരു ദിവസം റെസ്റ്റ്. അത് നല്ലതാണ്. ഇത്തവണ ബാലറ്റ് പേപ്പറിലായതിനാല്‍ ഇവിഎമ്മിന്റെ പേരിലും കരയാന്‍ കഴിഞ്ഞില്ല. മികച്ച ഭരണം കാഴ്ച വച്ച മുഖ്യമന്ത്രി യോഗിക്കും മറ്റു മന്ത്രിസഭാ അംഗങ്ങള്‍ക്കും അഭിനന്ദനങ്ങള്‍. ഒപ്പം യുപിയിലെ പ്രബുദ്ധരായ ജനങ്ങള്‍ക്ക് ഒരായിരം നന്ദിയും. ജയ് ഹിന്ദ്.

അതേസമയം ഗാസിയാബാദില്‍ മുസ്!ലിം വയോധികന്‍ ആക്രമിക്കപ്പെട്ട സംഭവത്തെ അപലപിച്ചു ട്വീറ്റ് ചെയ്ത കോണ്‍ഗ്രസ് നേതാവ് രാഹുല്‍ ഗാന്ധിക്കെതിരെ വിമര്‍ശനവുമായി യോഗി ആദിത്യനാഥ് രംഗത്തെത്തി. രാഹുല്‍ നുണകളിലൂടെ വിഷം പരത്തുകയാണ്. യുപിയിലെ ജനത്തെ അപമാനിക്കുന്നതു രാഹുല്‍ മതിയാക്കണമെന്നും യോഗി ആവശ്യപ്പെട്ടു.

ലോനിയില്‍നിന്നു ജൂണ്‍ 5ന് ഒരു സംഘം ആളുകള്‍ അബ്ദുല്‍ സമദ് എന്നയാളെ തട്ടിക്കൊണ്ടുപോവുകയും കത്തി കാണിച്ചു ഭീഷണിപ്പെടുത്തുകയും ചെയ്തിരുന്നു. പാക്കിസ്ഥാന്‍ ചാരനാണെന്ന് ആരോപിച്ച് സംഘത്തിലെ ഒരാള്‍ ഇദ്ദേഹത്തിന്റെ താടി മുറിച്ചതായും 'ജയ് ശ്രീറാം', 'വന്ദേമാതരം' എന്നിങ്ങനെ വിളിക്കാന്‍ നിര്‍ബന്ധിച്ചുവെന്നുമായിരുന്നു റിപ്പോര്‍ട്ട്.

ഇതിന്റെ വിഡിയോ സമൂഹമാധ്യമങ്ങളില്‍ പ്രചരിച്ചു. ഇതുസംബന്ധിച്ച വാര്‍ത്ത പങ്കുവച്ചാണു രാഹുല്‍ അഭിപ്രായം രേഖപ്പെടുത്തിയത്. എന്നാല്‍ മണിക്കൂറുകള്‍ക്കുള്ളില്‍ ഇതിനു മറുപടിയുമായി യോഗി രംഗത്തെത്തി. ഈ സംഭവങ്ങള്‍ക്കൊടുവിലാണ് യോഗിയുടെ മിന്നും ജയം വന്നത്.