ജയിലില് കിടന്നയാള് പൊതുമേഖലയുടെ രക്ഷക്ക് കുഞ്ഞാലികുട്ടിയുടെ വിശ്വസ്തന് പിണറായിയുടെ സമ്മാനം
പൊതുമേഖലാ സ്ഥാപനങ്ങളുടെ തലപ്പത്ത് അഴിമതി കേസില് ജയിലില് കിടന്നയാള്ക്ക് സുഖവാസം.
പൊതുമേഖലാ സ്ഥാപനങ്ങളുടെ പുനരുദ്ധാരണത്തിനായി സംസ്ഥാന സര്ക്കാര് രൂപം കൊടുത്തിട്ടുള്ള റിയാബിന്റെ തലപ്പത്താണ് നിരവധി അഴിമതി കേസുകളില് പ്രതിയായ എം പത്മ കുമാറിനെ തുടുരാന് സി പി എം അനുവദിച്ചത്. വിജിലന്സ് കേസുള്ളവരെയും അഴിമതിക്കാരെയും കെട്ടുകെട്ടിക്കുമെന്ന് പറഞ്ഞ മുഖ്യമന്ത്രിയും അദ്ദേഹത്തിന്റെ പാര്ട്ടിയുമാണ് പത്മകുമാറിനെ മാറ്റേണ്ടതില്ലെന്ന് വ്യവസായ വകുപ്പുമന്ത്രിക്ക് നിര്ദ്ദേശം നല്കിയത്.
പൊതുമേഖലാ സ്ഥാപനങ്ങളുടെ തലപ്പത്ത് അഴിമതിക്കാരെ വയ്ക്കില്ലെന്നും വിജിലന്സ് ക്ലിയറന്സ് ഉള്ളവരെ മാത്രമേ നിയമിക്കൂവെന്നുള്ള വ്യവസായ മന്ത്രിയുടെ വാക്കാണ് ഇതോടെ പാഴ്വാക്കായത് .
പൊതുമേഖലാസ്ഥാപനങ്ങളുടെ നടത്തിപ്പിന്റെ മേല്നോട്ടമാണ് റിയാബിനുള്ളത്. പത്മകുമാര് നാല് വിജിലന്സ് കേസുകളില് പ്രതിയാണ്. അഴിമതിക്കേസില് ജയിലില് കഴിഞ്ഞയാളാണ് അദ്ദേഹം. ഇദ്ദേഹം സി പി എമ്മുകാരനോ ഇടതുപക്ഷ അനുഭാവിയോ അല്ല.വലത് ഇടത് പക്ഷങ്ങളുമായി അടുത്ത ബന്ധം പുലര്ത്തുന്ന ഉദ്യോഗസ്ഥനാണ്. എന്നിട്ടും അദ്ദേഹത്തെ ഇടതുപക്ഷം ഹ്യദയപക്ഷത്ത് നിര്ത്തുന്നു.
ഓരോ പൊതുമേഖലാ സ്ഥാപനത്തിനും പ്രത്യേകം മാസ്റ്റര് പ്ലാന് ഉണ്ടാക്കുന്നതിനും അവയുടെ സാങ്കേതിക വൈദഗ്ധ്യം വര്ധിപ്പിക്കുന്നതിനുമുള്ള നടപടികള് സര്ക്കാര് ആരംഭിച്ചിരുന്നു.
ഇതിന്റെ മേല്നോട്ടം റിയാബിനാണ്. മലബാര് സിമന്റ്സ് അഴിമതിക്കേസിലാണ് പത്മകുമാര് പത്ത് ദിവസം ജയില് വാസം അനുഭവിച്ചത്. മുന് സര്ക്കാരിന്റെ കാലത്ത് തന്നെ ആക്ഷേപങ്ങളുയര്ന്ന വിഷയത്തില് പുതിയ വ്യവസായ മന്ത്രി അധികാരമേറ്റിട്ടും വിവാദത്തില്പ്പെട്ട ഉദ്യോഗസ്ഥന് തന്നെ തുടരുന്നത് പാര്ട്ടിയിലും സര്ക്കാരിലുമുള്ള ഇദ്ദേഹത്തിന്റെ സ്വാധീനമാണ് വ്യക്തമാക്കുന്നത്.
ഇ.പി. ജയരാജന് വ്യവസായ മന്ത്രിയായിരിക്കെ പത്മകുമാറിന് എല്ലാ സ്വാതന്ത്ര്യവും നല്കിയിരുന്നു. ഇ.പിക്ക് വ്യക്തിപരമായ ബന്ധമല്ല പത്മകുമാറുമായുള്ളത്. സി പി എം നോമിനി എന്ന നിലയിലാണ് പത്മകുമാറിനെ ജയരാജന് സഹായിച്ചിരുന്നത്. മന്ത്രി മാറി വന്നിട്ടും പത്മകുമാറിനെ തൊടുന്നില്ല.മന്ത്രി മാറുമ്പോള് റിയായില് അഴിച്ചുപണി ഉണ്ടാകുമെന്നാണ് എല്ലാവരും കരുതിയിരുന്നത്.
റിയാബ് സെക്രട്ടറിയുടെ യോഗ്യതെ ചോദ്യം ചെയ്ത് 2016ല് ഐഎന്ടിയുസി ഹൈക്കോടതിയെ സമീപിച്ചിരുന്നു. ഏത് നിലയ്ക്കാണ് പദ്മകുമാര് റിയാബ് സെക്രട്ടറിയായതെന്നറിയണമെന്നും നിയമപരമല്ലാത്ത രീതിയില് റിയാബ് സെക്രട്ടറിയായ പദ്മകുമാറിനെ നീക്കം ചെയ്യണമെന്നുമായിരുന്നു ഹര്ജിയിലെ ആവശ്യം.
2016 ല് നല്കിയ ഹര്ജി ഹൈക്കോടതി ചീഫ് ജസ്റ്റിസ് എസ്. മണികുമാറും ജസ്റ്റിസ് ഷാജി പി. ചാലിയും ചേര്ന്ന ബെഞ്ച് 2021 ഫെബ്രുവരി 4 ന് തള്ളിയിരുന്നു. ഈ സമയത്ത് പദ്മകുമാര് റിയാബ് സെക്രട്ടറിയല്ലെന്ന കാരണത്താലാണ് ഹര്ജി കോടതി തള്ളിയത്. എന്നാല് ഒരാഴ്ച കഴിഞ്ഞ് ഫെബ്രുവരി 12ന് പദ്മകുമാറിനെ വീണ്ടും റിയാബ് സെക്രട്ടറിയാക്കി സര്ക്കാര് ഉത്തരവിറക്കി. മലബാര് സിമന്റ്സിലെ എംഡി ആയിരിക്കേയാണ് പദ്മകുമാറിനെ അഴിമതിക്കേസില് 2016 സെപ്തംബര് 5ന് അറസ്റ്റ് ചെയ്യുന്നത്.
പി.കെ. കുഞ്ഞാലിക്കുട്ടിയുമായി ഉള്ള അടുത്ത ബന്ധം ഉപയോഗിച്ചാണ് പത്മകുമാര് ഇക്കാലമത്രയും വ്യവസായ വകുപ്പില് തുടര്ന്നത്. യു ഡി എഫ് സര്ക്കാരിന്റെ കാലത്തും പത്മകുമാറിനെതിരെ ആരോപണങ്ങള് ഉയര്ന്നിരുന്നെങ്കിലും അന്നത്തെ പ്രത്യേക സാഹചര്യത്തില് അതൊന്നും വിലപ്പോയിരുന്നില്ല.പി.കെ. കുഞ്ഞാലിക്കുട്ടിയുമായുള്ള സ്വാധീനമാണ് പത്മകുമാറിനെ തുടര്ന്നു വന്ന വ്യവസായ മന്ത്രിമാരെയും കൈയിലെടുക്കാന് സഹായിച്ചത്. പി.രാജീവും മുന്ഗാമികളുടെ വഴി തന്നെ തെരഞ്ഞടുക്കുന്നു.
ഏത് പൊതുമേഖലാ സ്ഥാപനത്തിലും കൈകടത്താനുള്ള അധികാരം റിയാബിനുണ്ട്. പൊതുമേഖലയില് നിയമനം ഉള്പ്പെടെയുള്ളവ നടത്താനും റിയാബിന് കഴിയും. സംസ്ഥാനത്തെ പൊതുമേഖലാസ്ഥാപനങ്ങളുടെ മേധാവികളെ നിശ്ചയിക്കുന്നതും റിയാബാണ്. എന്തു വേണമെങ്കിലും എപ്പോള് വേണമെങ്കിലും ചെയ്യാം എന്നതാണ് ഇതിന്റെ അര്ത്ഥം.
"
https://www.facebook.com/Malayalivartha
